أقارب صاحب فيديو "عايز أنام ربع ساعة يا حاجة": "ابننا مش سرسجي بس رجله مكسورة"

خرج صديق والد الطفل محمد احمد صالح، صاحب الفيديو الشهير "عايز أنام ربع ساعة يا حجة"، ليرد على جميع المنتقدين قائلًا "بعد إذنكم يا جماعة محدش يقول عليه سرسجي وحلاقة شعره وأسلوبه، ده محمد ومش حالق أهو، بس هو كان رجله مكسورة وعامل عملية وبنحاول نراضيه وهو عنده 6 سنين وأول يوم في المدرسة يعني مش عارف يفصل بين المدرسة والشارع، الموضوع مش محتاج استظراف".
اقرأ أيضًا.. تلميذ مدرسة ابتدائي لمعلمته: "يا حاجة عايز أنام ربع ساعة بس" (فيديو)
وتابع خلال مكالمة هاتفية مع الاعلامي معتز الدمرداش ببرنامج "آخر النهار"، "الناس اللي داخلة تقول إنه مش متربي وأن الأهل مهملة والمفروض أنه ينام بدري ده طفل يعني بينام براحته ويصحى براحته وبقاله فترة مش بينام بسبب رجله وبسبب العلاج فأكيد مش من أول يوم يصحى الساعة 7 الصبح هيقدر يقاوم إحنا كبار ومش بنقدر نقاوم إزاي طفل زي ده يصحى من الساعة 7 ويرجع الساعة 2، سيبته اللي بيصور واللي الأستاذة اللي ماسكة العصاية والأستاذة اللي بتزعق وأن الطفل بيعيط كده ومسكتوا في الحلاقة وكلمة يا حاجة".
وأضاف: "بيقول يا حاجة للي كانت جنب اللي بيصور مش للآبلة لأن الآبلة كانت ماسكة العصاية مش اللي كان بيقولها يا حاجة، ده لو ابن اللي بيصوره كان هيخليه ينام وكان هياخده ويروح ولا لو الأستاذة دي هي اللي عاوزه تنام كانت هتروح، بعد إذنكم بلاش تريقة، وبلاش حد يشارك الفيديو اعتبره زي ابنك، وإحنا هناخد حقه طبعًا وبالقانون".
يذكر أن وزارة التربية والتعليم والتعليم، قررت إحالة المعلم الذى قام بتصوير التلميذ محمد احمد صالح، صاحب الفيديو الشهير "عايز انام ربع ساعة يا حاجة"، الذي انتشر على مواقع السوشيال ميديا بسرعة كبيرة، إلى الشئون القانونية، خاصة وأن الوزارة قد قررت منع دخول المحمول فى المدارس سواء مع الطلاب أو المعلمين.