جدل بعد إنشاء فتيات "جروب" للحصول على الشباب عبر "فيس بوك"

أثار إعلان عدد من الفتيات، تدشين "جروب" على موقع التواصل الاجتماعي "فيس بوك"، من أجل الحصول على الشباب، حالة من الجدل الواسع.
يأتي هذا بالتزامن مع الانتشار الواسع ل"جروب" "جت في السوستة" الذكوري، والذي تخطى عدد المشتركين فيه 700 ألف عضو.
التجمع النسوي الجديد، اخترن له اسم "كيف تشقطين ذكرا"، وهو خاص بالفتيات فقط، كما نجح إلى الآن في جلب 6,725 عضوة.
وكأي "جروب" مشابه، وضعت القائمات عليه عددًا من الشروط التنظيمية، التي تهدف في النهاية إلى الحصول على شاب بمساعدة من له القدرة.
وكان أحد النشطاء قد اطلع على "الجروب" وكتب ما يلي:
"الجروب معمول عشان البنات يساعدوا بعض في شقط "الولاد" !! اه والله هو ده هدف الجروب بجد مش نكتة
المهم اني لفيت لفه سريعة في الجروب فلقيت الاتي:
العضوة اللي عايزة تشقط حد كل اللي بتعمله انها تكتب بوست يتوافق عليه من الادارة يكون موجود فيه صورة "الضحية" ومعاها كل البيانات اللي تقدر تعرفها عنه وبروفايل فيسبوك بتاعه.
ممنوع الهزار والاستظراف والألش على البوستات اللي من النوع ده اللي تقدر تساعد بس هي اللي تعلق عليه
واعضاء الجروب اللي هيساعدوا بيبدأو يسألوها عن تفاصيل وبعدين يبدأو في مرحلة جمع المعلومات من الاصدقاء المشتركين بينهم وبين الضحية. وكل واحدة تنزل سكرين شوت او ملخص المعلومات اللي قدرت تجيبها على نفس البوست عشان ميحصلش ان اتنين يسألوا شخص واحد عن نفس الضحية.
بعد مرحلة جمع المعلومات بيبدأو يخططوا ازاي هيبدأو عملية الشقط بيحب ايه، بيكره ايه، السكة الاقرب ليه تبتدي منين، وبيتفقوا كل واحدة ليها دور بتنفذه وبيساعدوا بعض سواء بالاتصال بالضحيه او توريطه في مشكلة او المزاولات والمعاكسات وحتى المقابلات وبطريقة مدروسة تصب في صالح العضوة وتفتحلها سكه معاه واللي بتنتهي في الغالب بكلمة.
وبعدين تبدأ مرحلة ما بعد الشقط اللي بتكون عبارة عن اسئله من العضوة وردود من الاعضاء بيساعدوها بيها على توطيد علاقتها بالمشقوط سواء بالنصايح او الحيل والحوارات اللي تخلي العلاقة دايما مشتعله مش علاقه مملة.
المهم ان ادمنز الجروب عندهم مجموعة مبادئ ملتزمين بيها في الجروب اهمها:
1- انهم ميساعدوش على مشاكل او ضرر لحد
2- ممنوع عضوة تشقط ضحيه من عضوة تانيه.
3- ممنوع شقط حد مرتبط وكاتبين (شقط الذكور المرتبطين اسهل من شقط السناجل لكن المبادئ لا تتجزأ ) الاهم من كل ده انهم كاتبين سبب اختيارهم لإسم الجروب "كيف تشقطين (ذكراً)" مش (رجلا) !! ليه بقى ؟؟.. لأن الرجاله مبتتشقطش".