بالفيديو.. "أهل مصر" يسأل: لو مرتبك 1500 جنية هتعمل بيهم إيه؟

إرتفاع جنوني في الأسعار، وأجور ومرتبات تظل ساكنة على عادتها، المواطن يبحث عن حل، لإشباع احتياجاته المعيشية، إلا أن وزارة التموين التي تلقب ب "وزارة الغلابة"، فاجأت الجميع بوجود نية لرفع الدعم عن من يصل راتبه الشهرى ل 1500 جنية.
ويرصد "أهل مصر" أراء الشارع المصري حول هذا القرار، وهل يكفى مرتب 1500 لتغطية متطلبات معيشة المواطن؟.
مش عاوز دعم
يقول "م.ع": "هعمل بيهم إيه ال 1500 جنية، أنا كده بضحك على نفسي، بركب من عبد المنعم رياض لحد الدقي بجنية وربع، ومن عبد المنعم رياض لركن فاروق الموجود في منطقة حلوان ب 3 جنيهات، وكمان جنية ونص لحد البيت كده بقوا 5 جنية ونص، وزيهم وأنا جاي، أكلت بإيه وشربت بإيه بقى".
وأضاف: "نجيب منين طيب، بشتغل من الساعة 11 الصبح لحد الساعة 12 باليل ومش مكفي، وأروح أقبض ألاقي نفسى أصلا واخدهم سلف، فمش بقبض".
وتابع: "لو دخلي 5000 جنية مش همضي على عريضة تنازل ومش عاوز دعم".
ثمن الحذاء
أكد "م.م"، أن هناك من يحصل على رغيف الخبز من سلة القمامة، موجهًا حديثه إلى وزير التموين قائلًا، " يا سيادة الوزير أنت نفسك لابس حذاء ب 1500 جنية، لو تقدر تعيش بالمبلغ دا إحنا مش هنتكلم".
3000 جنية
أما عن الحد الأدنى للأجور فطالب "أ.ر" بأن تحدد الدولة راتبًا شهريًا لا يقل عن 3000 جنيهًا كحد أدنى للأجور، لافتًا النظر إلى أن أسعار جميع السلع ارتفعت، وهو ما أربك حسابات جميع المواطنين وزاد من أعباءهم.
هاكل وأشرب منين
"إيجار الشقة ب 1000 جنيه"، هكذا كان رد "أ.ج" الذي بدى على وجهه علامات استفهام شديدة من أسعار السلع، موضحًا، "بدفع مياة ونور 500 جنية، كده دفعت ال 1500 هاكل وأشرب منين بقى أنا وأسرتي".
ووصف نفقات اليوم الواحد بأنها لا تقل عن 100 جنيهًا يوميًا، ما يعنى أن أقل حد للمرتب الشهري يجب أن يكون 3000 جنيهًا.
800 جنية دروس
وقال"ح.أ"، "أنا معايا 5 أولاد، بياخدوا ب 800 جنية دروس، غير أكل ولبس وشرب ومدارس، لما الواحد بقى يتعب، بيكون قدامي حلين يا إما ربنا يشفيه، يا إما يفتكره علشان مش هعرف أعالجه".