أنا أقدر اشتري مسرح.. مصطفى جاد زوج كارمن سليمان يرد على الهجوم ضد أحمد حلمي

بعد الجدل الذي دار مؤخرا علق الملحن مصطفى جاد، زوج الفنانة كارمن سليمان، لأول مرة على حالة الهجوم ضد الفنان أحمد حلمي، بسبب الموقف الذي حدث خلال عرض مسرحية 'بني آدم' في السعودية.
وقال مصطفى جاد عبر مقطع فيديو نشره على حسابه الشخصي على موقع تبادل الصور والفيديوهات 'إنستجرام' 'أنا عندي شهادة حق، وشهادة الحق مينفعش نكتمها ولا ينفع نفكر تتقال ولا لاء، ولا ينفع تفكر تستنى عليها ولا لاء، وبجِملة سوء النية والاستباحة والاستسهال اللي بقا عند الناس، لمجرد إن شخص معاه تليفون أو قال حاجة مع على هواه، وأنا استنيت الأيام اللي فاتت عشان محدش يقول إني بركب تريند، ولا عايز أدخل في الخناقة دي، ولا بحب اللي بيعملوا كدا بمنتهى الوضوح'.
وأضاف جاد في حديثه: 'أنا اسمي مصطفى جاد، ملحن ومنتج موسيقي مصري، وبشتغل من 2011، وعندي شركتين إنتاج اشتغلت من خلالهم مع أكبر شركات في العالم مش بس الوطن العربي، ومبحبش اشتغل بالطريقة دي، لكن الظروف تحكم، وأنا بتكلم عن الهجوم اللي حاصل على أحمد حلمي وعن شخصي أنا كمان، وأنا عايز أرد غيبة الراجل المحترم أحمد حلمي'.
A post shared by Mostafa Gad (@mostafagadofficial)
وتابع قائلا: 'الموضوع بدأ إن زوجتي النجمة كارمن سليمان، طلبت مني إنها تحضر مسرحية أحمد حلمي، وأنا كلمته وروحنا حضرنا المسرحية، وحصل الموقف اللي أنتم شوفتوه، ولازم نكون متفقين على حاجة، من حق كل مصري فينا إنه يغير على بلده، وإننا نكون إيد واحدة ضد أي حاجة تهدد بلدنا لأن كلنا بنحب مصر، ومينفعش حد يقول أنا وطني أكتر منك إلا لو كان حارب وأنا محاربتش، ولازم كلنا يكون عندنا الغضب الرهيب دا لما يكون فيه سبب واضح، والموضوع ينهيه إن أنا وحلمي نعرف بعض من 5 سنين، اتقابلنا في مكان ومن وقتها فيه تواصل، وحلمي نجم كبير أنا بحبه وبحب هزاره، والهزار يخصني وكان في محله، ومحبش أقول كدا ولكن أنا أقدر أشتري مسرح'.
وواصل مصطفى: 'والقصة إن المسرحية يوميها اتأخرت على الناس، والناس في القاعة كانوا متضايقين من التأخير، والراجل طلع عشان يهدي الناس شوية، عشان كدا ارتجل، ومن ضمن الارتجال إنه طلع بشخصيته في المسرحية، ونزل للناس ومن قبلي أنا وكارمن كان بيتكلم مع كذا حد وبيهزر معاه، عشان يقول ضمنيًا إنه بيعتذر لأنه اتأخر على العرض، وقال الإيفيه اللذيذ اللطيف اللي مفيهوش أي نوع من الإهانة عشان الراجل هو اللي عازمني، هو عازم ملحن ومنتج عنده القدرة يقفل المسرح لأصحابه وعائلته، بحب الناس لينا وتقدير الناس لينا، مش قصة قادر ماديًا أو لاء ومينفعش نتكلم باللغة دي'.
يشار إلى أن أحمد حلمي تعرض لانتقادات وهجوم شديد من بعد ارتجاله جملة أثناء عرض مسرحيته 'بني آدم' في موسم الرياض بالمملكة العربية السعودية، وفسرها كثيرون بأنها تعتبر إساءة للمصريين.
فخلال عرض المسرحية، ارتجل حلمي ونزل من على خشبة المسرح وبادر بسؤال أحد الحضور في الصف الأول عن جنسيته، فرد عليه بأنه مصري، فبادره أحمد حلمي ممازحا: 'مصري وقاعد في الصف الأول.. أكيد معزوم'، الأمر الذي فسره الكثيرون بأنه إساءة للمصريين، وأنهم غير قادرين على تحمل تكلفة تذكرة الصف الأول في العروض المسرحية.