بعد فيديو «مصري وصف أول؟» .. أول رد من مصطفى جاد على إفيه أحمد حلمي (فيديو)

حرص الملحن مصطفى جاد، زوج الفنانة كارمن سليمان، على الرد بعد الهجوم على أحمد حلمي، بسبب الموقف الذي حدث على هامش عرض مسرحية حلمي «بني آدام» في الرياض، إذ أعرب مصطفى عن انزعاجه من الجمهور بسبب مهاجمتهم حلمي دون فهم الموقف بشكل كامل.
وقال مصطفى جاد في فيديو نشره عبر حسابه ب«انستجرام»، عن الأمر: «أنا عندي شهادة حق، وشهادة الحق مينفعش نكتمها ولا ينفع نفكر تتقال ولا لاء، ولا ينفع تفكر تستنى عليها ولا لاء، وبجِملة سوء النية والاستباحة والاستسهال اللي بقا عند الناس، لمجرد إن شخص معاه تليفون أو قال حاجة مع على هواه، وأنا استنيت الأيام اللي فاتت عشان محدش يقول إني بركب تريند، ولا عايز أدخل في الخناقة دي، ولا بحب اللي بيعملوا كدا بمنتهى الوضوح».
View this post on Instagram
A post shared by Mostafa Gad (@mostafagadofficial)
وتابع: «أنا اسمي مصطفى جاد، ملحن ومنتج موسيقي مصري، وبشتغل من 2011، وعندي شركتين إنتاج اشتغلت من خلالهم مع أكبر شركات في العالم مش بس الوطن العربي، ومبحبش اشتغل بالطريقة دي، لكن الظروف تحكم، وأنا بتكلم عن الهجوم اللي حاصل على أحمد حلمي وعن شخصي أنا كمان، وأنا عايز أرد غيبة الراجل المحترم أحمد حلمي».
وأضاف: «الموضوع بدأ إن زوجتي النجمة كارمن سليمان، طلبت مني إنها تحضر مسرحية أحمد حلمي، وأنا كلمته وروحنا حضرنا المسرحية، وحصل الموقف اللي أنتم شوفتوه، ولازم نكون متفقين على حاجة، من حق كل مصري فينا إنه يغير على بلده، وإننا نكون إيد واحدة ضد أي حاجة تهدد بلدنا لأن كلنا بنحب مصر، ومينفعش حد يقول أنا وطني أكتر منك إلا لو كان حارب وأنا محاربتش، ولازم كلنا يكون عندنا الغضب الرهيب دا لما يكون فيه سبب واضح، والموضوع ينهيه إن أنا وحلمي نعرف بعض من 5 سنين، اتقابلنا في مكان ومن وقتها فيه تواصل، وحلمي نجم كبير أنا بحبه وبحب هزاره، والهزار يخصني وكان في محله، ومحبش أقول كدا ولكن أنا أقدر أشتري مسرح».
واستكمل مصطفى: «والقصة إن المسرحية يوميها اتأخرت على الناس، والناس في القاعة كانوا متضايقين من التأخير، والراجل طلع عشان يهدي الناس شوية، عشان كدا ارتجل، ومن ضمن الارتجال إنه طلع بشخصيته في المسرحية، ونزل للناس ومن قبلي أنا وكارمن كان بيتكلم مع كذا حد وبيهزر معاه، عشان يقول ضمنيًا إنه بيعتذر لأنه اتأخر على العرض، وقال الإيفيه اللذيذ اللطيف اللي مفيهوش أي نوع من الإهانة عشان الراجل هو اللي عازمني، هو عازم ملحن ومنتج عنده القدرة يقفل المسرح لأصحابه وعائلته، بحب الناس لينا وتقدير الناس لينا، مش قصة قادر ماديًا أو لاء ومينفعش نتكلم باللغة دي».