«حطيتله السم في العصير وعشيقي كمل عليه بالمخدة».. نص اعترافات قاتلة زوجها بالمنوفية

حصلت 'أهل مصر' على نص اعترافات المتهمة بقتل زوجها بمساعدة عشيقها في قرية كفر الفرعونية، التابعة لمركز أشمون بمحافظة المنوفية، عن طريق وضع السُم بكوب عصير 'جوافة بالفراولة'، وهو العصير المُفضل له، ومن ثم وضع عشيقها وسادة على رأسه حتى لفظ أنفاسه الأخيرة.
حبس سيدة - أرشيفية
اعترافات قاتلة زوجها بالمنوفية
وقالت الزوجة في اعترافاتها أمام جهات التحقيق: 'اللي حصل إن أنا كنت متجوزة مرزوق أحمد عبد المعبود الله يرحمه، من حوالي 14 عامًا تقريبًا وكانت العلاقة بينا كويسة ومكنش في أي حاجة وكان (أ.ح.ع) بييجي عندنا البيت عند حمايا بحكم إن هو من البلد من عندنا وفي نسب وقرابة بين إخواته البنات وبين أولاد عم جوزي، ومن حوالي أربع سنين تقريبا بدأت أنا وهو نتعرف على بعض ونكلم بعض في التليفون وصارت علاقة بيني وبينه وبدأنا نتكلم أنا وهو مع بعض وكنت ساعات بخرج معاه بالعربية بتاعته لإن معاه عربية سوزوكي وكان ساعات بيكون معايا أولادي وبعدين كان ساعات بيجيلي البيت وكنا بنقعد مع بعض وعيالي بيكونوا نايمين وجوزي بيكون في الشغل وكنت بعقد أحكيله عن تفاصيل المعيشه بيني وبين جوزي مرزوق الله يرحمه وكنت بقوله إن مرزوق جوزي الله يرحمه كان بيبقى تعبان وعنده فيروس كبد وكان ساعات مبيقدرش يتحرك كتير أو يعمل أي مجهود'.
أضافت المتهمة في اعترافاتها: 'وساعتها العلاقة اتطورت بيني وبينه وبدأ يجيلي البيت أكثر من مرة وحصلت بينا علاقة جنسية (معاشرة جنسية) أكتر من مرة على فترات مختلفة ومكنش حد يعرف خالص لا جوزي ولا حد من أهلي ولا أولادي لغاية لما جيت في يوم قولتله إن مرزوق بدأ يتعب بزيادة وهو قالي إن إحنا لازم نريحه ولقيته بيقولي إن هو لما يتعب تاني والتعب يزيد عليه إديله برشامتين مهدئتين من اللي الدكتور كاتبه ليه وساعتها لقيته إداني زحاجة بيضاء فيها مادة سايلة وقالي إن دي هتخلص على مرزوق حطيها ليه على أي عصير ييجي يشربه، وأنا أخدت منه الزجاجة وفعلًا لما مرزوق التعب زاد عليه أنا اديته برشامتين مهدئتين زي ما أحمد قالي من العلاج اللي الدكتور كان كاتبه لمرزوق'.
وتابعت: 'ومرزوق ساعتها الله يرحمه قالي أنا عاوز أشرب عصير وهو كان بيجب يشرب عصير فراولة على جوافة وأنا عملتله العصير وجبت الزجاجة اللي (أ.ح.ا) كان مديهالي وجبت سرنجة وسحبت منها حوالي واحد سم وحطيته على العصير وقلبته واديته لمرزوق ومرزوق شربه وبعد ما شربه بحوالي نصف ساعة لقيت مرزوق جوزي الله يرحمه جسمه بدأ يريح ويتقل ولقيته دخل أوضة النوم علشان يريح جسمه وبعدها بحوالي عشر دقايق لقيته قام ودخل الحمام وفضل يرجع حوالي دقيقتين وبعدين رجع الأوضة تاني وقالي شوفيلي أي حاجة علشان تغطيني علشان أنا سقعان وأنا ساعتها خرجت وكلمت (أ.ح.ا) وقولتله على اللي حصل وقولتله تعالى علشان أنا عملت اللي انت قولتلي عليه وخايفة قالي متخفيش وأنا نص ساعة وجايلك وبعدها لقيته جاي واتصل عليا وقالي إن هو موجود قدام باب البيت بتاعنا ورحت فتحتله وقالي في إيه قلتله مرزوق سقعان وجسمه مثلج وأنا عملت اللي انت قولتلي عليه ومش عارفة أعمل إيه وهو موجود جوه على السرير في أوضة النوم قالي متخافيش وأنا هخلصك منه ولقيته أخد مخدة كبيرة كانت موجودة في الصالة وقالي ادخلي قدامي'.
وأكملت 'م.ص.ح' المتهمة بقتل زوجها بمساعدة عشيقها بمحافظة المنوفية اعترافاتها، قائلة: 'دخلت قدامه غرفة النوم وساعتها مرزوق قالي اطفي النور علشان أنا عاوز أنام وأنا طفيت النور العالي بتاع غرفة النوم وسبت النور الواطي وساعتها (أ.ح.ا) اتسحّب من ورايا كان ماسك المخدة ودخل جنب السرير من الناحية اللي فيها مرزوق وساعتها أنا جيت أنام جنب مرزوق وحطيت إيدي على إيده الشمال وساعتها (أ.ح.ا) مسك المخدة وحطها على وش مرزوق علشان يخنقه بإيده وكان ماسك المخدة بإيده الشمال وحاطط إيده اليمين على إيد مرزوق وفضل حاطط المخدة عليه خمس دقايق لغاية لما مرزوق نفسه قطع خالص وبعدين هو شال المخدة من على وش مرزوق وضغط جامد حوالين راسه وأحمد ساعتها قالي إن مرزوق مات وقطع النفس وأنا ساعتها قولتله هنعمل إيه قالي متخفيش وقالي إن هو هيمشي دلوقتي علشان محدش يشوفه وقالي أتصرف طبيعي'.
وواصلت: 'بعدها هو مشي وأنا فضلت قاعدة جنب مرزوق لغاية النهار لما طلع وبعدين حوالي الساعة 10 ونص الصبح خرجت علشان أنده لحمايا وأقوله على اللي حصل وخرجت لقيت حمايا كان رايح الغيط وندهت عليه وقولتله تعالى بسرعة شوف مرزوق فيه إيه وجه معايا ودخل الأوضه وشاف مرزوق وساعتها راح جاب دکتور علشان يكشف على مرزوق والدكتور جه وقال إن مرزوق مات من حوالي ثلاث أو اربع ساعات وإن سبب الوفاة سكته قلبية وبعدين عملنا تحضيرات الدفن والغسل الطبيعية وبعدين بعدها بحوالي 4 أيام كلمت (أ.ح.ا) واتكلمت معاه عادي وقالي متخافيش محدش هيعرف أي حاجة من اللي حصلت خالص وبعدها أنا اتصرفت عادي'.
وأردفت: 'وبعد وفاة مرزوق جوزي بحوالي شهر ونصف أنا لقيت بنتي بسملة بتتصل عليا وبتقولي إن عمها إسلام لقى على تليفونها رسالة من الرقم بتاع (أ.ح.ا) كان مضمونها كلام عادي وساعتها إسلام كلمني وبيقولي إيه اللي بينك وبينه قولتله مفيش حاجة بيني وبينه وبعدها حصلت مشكلة بين أهلي وأهل مرزوق جوزي ولقيتهم بيقولولي إن في علاقة بيني وبينه وأنا قولتلهم الكلام ده مش صحيح وساعتها هما خدوا التليفون بتاعي وبتاع بسملة بنتي وبقى معاهم وبعدها لقيت المباحث جم خدوني وجابوني على المركز وجابوني النهاردة على النيابة هو ده كل اللي حصل'.
بداية الواقعة
وتعود تفاصيل الواقعة عندما تلقى اللواء حازم سامى مدير أمن المنوفية، إخطاراً من العقيد محمد أبو العزم مأمور مركز شرطة أشمون، يفيد بتقدم 'إ.أ.م' عامل يتهم فيه زوجة شقيقه بقتلة عن طريق دس السم له فى العصير.
وبضبط المتهمة اعترفت بارتكابها الواقعة وقررت النيابة العامة استخراج الجثمان بعد مرور 43 يومًا على دفنه وتشريحه وإعداد تقريرًا مفصلاً عن أسباب الوفاة، قبل أن يُصدر التقرير النهائى ليؤكد أن الوفاة بسبب السم، وتم تحرير المحضر اللازم بالواقعة وأُخطرت النيابة العامة لمباشرة التحقيقات.