مصطفى هريدي: «إيناس الدغيدي قالت عني مدمن واتمسكت بسببها في المطار»

تحدث الفنان مصطفى هريدي، اليوم الإثنين، عن أسباب المشاكل التي تجمعه مع المخرجة إيناس الدغيدي.
وأوضح مصطفى هريدي، خلال لقائه في برنامج الستات، المذاع عبر قناة النهار قائلًا:'مشاكلي مع المخرجة إيناس الدغيدي بدأت بعد عرض فيلم مجنون أميرة.. ومعملش حاجة في السينما من وجهة نظرها، هي نزلت الفيلم من غير عرض خاص ولا دعاية واعتمدت فقط علي اسمها، حتي الأفيش اللي كان نازل اسمي مكنش فيه'.
مصطفى هريدي:"إيناس الدغيدي مقدمتنيش بالشكل المفروض"
وتابع هريدي حديثه قائلًا:'إيناس الدغيدي مقدمتنيش بالشكل المفروض تقدم به ممثل ونجم لأول مرة لا في طريقة الدعاية والاهتمام بيا، الفيلم اتظلم مش مني ولكن من الانتاج والمخرجة ومش أنا اللى اشيل المسئولية ويتقال اني بوظت الفيلم وسبب في فشل الفيلم'.
مشكلة مصطفى هريدي وإيناس الدغيدي
وواصل مصطفى هريدي روايته قائلًا: ثالث يوم تصوير لقيت إيناس الدغيدي بتقولي أنت مش سينمائي أنت مش عارف حاجة وأقول اللي موجود وأعمل اللي مكتوب ورأيها هو اللي كان بيمشي ومعطتنيش الفرصة أني أعمل حاجة ومطلعتش مني حاجة ودي مسئوليتها، وقالت لي أنت مش بتاعي أنت بتاع السبكي، ونزلت الفيلم والإيرادات مكنتش متوقعة وبدأت تهاجمني'.
وسرد مصطفى هريدي: 'قالت عني مدمن وبتعاطى وحاجات كتير جدًا وده سب وقذف وتشهير وقالته في 2016 مش ساعة لما الفيلم نزل في 2009، ولما الفيلم بعد لما نزل واتشال من السينما جت تعمله عرض خاص في أحد السينمات وعزمت الصحافة والإعلام وبعض الأصدقاء ومفيش فيلم بيتعمله عرض خاص بعد لما اتشال'.
وأكمل هريدي تصريحاته:'إيناس الدغيدي كانت عايزة تشوه سمعتي وفعلا ده ضرني وقعدت سنين طويلة بترشح في أعمال كتير وبترفض بسبب السمعة.. وفي أحد المطارات اتمسكت بسبب اتهامي إن تاجر مخدرات، فتشوني وهما ماسكين الموبايلات وعليها أخبار إيناس الدغيدي وهي بتقول إني مدمن مخدرات'.