وفاء مكي توجه سؤالا مؤثرا لميار الببلاوي: مصعبتش عليكي؟

علقت الفنانة وفاء مكي على تصريحات الفنانة والإعلامية ميار الببلاوي، التي أكدت فيها براءة وفاء من قضيتها الشهيرة التي سجنت فيها بتهمة تعذيب وحرق خادمتين.
وقالت وفاء مكي، في بث مباشر ل'أهل مصر'، عن أسباب صمت ميار الببلاوي لمدة 23 سنة عن قول شهادتها: 'ميار الببلاوي كانت خايفة، وبتقول لما هطلع وأقول الناس هتقول ازاى بتقدمي برنامج ديني ومحجبة وتكتمي الشهادة 23 سنة، لأن الشهادة دي كانت هتودي وفاء مكي في حتة تانية، وكانت هتبرأني تماما، فاللي قالته ده كله ميبرأش العفريت؟'.
وعن أحساسها بعد تصريحات ميار الببلاوي ببراءتها قالت وفاء مكي: 'أحاسيس متضاربة وفي النهاية لا يصح إلا الصحيح ويمكن ربنا له حكمة في أن يحصلي كدا، الله إذا أحب عبدا ابتلاء، وأن تطلع ميار الببلاوي وتقول الحقيقة كاملة، في إحدى القنوات فضل وعدل من الله'.
وتابعت:'أنا تعبت، وميار مطلعتش قالت كده الا بعد عذاب حتى بعد ما أعترفت للفنانة هند عاكف وقالت لها أنا داخلة اعمل عملية في القلب، أنا هموت واكتم الشهادة، انا هعمل ايه أنا تعبانة وخايفة يجرالي حاجة، لازم اعترف ببراءة وشهادة وفاء مكي..فرجعت تقول تاني أنا هعمل ايه ابني مقدم في الخارجية ممكن يقولوا حاجة، طب أنا متدينة وبعمل برنامج ديني يقولوا اللي بيكتم الشهادة ايه'.
وواصلت وفاء مكي قائلة:'أيام القضية بعتتلي جواب بتقولي دليل براءتك معايا، وقولت اطلعي اتكلمي ابوس ايديكي اتوسل اليكي وانادي عليها، في الاخر عرفت أن هي هددوها بدبح ابنها وسفروها لحد ما قضيتي اتحكم فيها 10 سنين، ورجعت، السؤال اللي أنا بسألهولها مخدتيش بعضك ليه في جلسة سرية للنائب العام؟، مقولتيش ليه؟، خلاص أنا خدت ال3 سنين سجن ماشي، مجتيش ليا وقولتيلي، ليه مخدتيش موقف ايجابي؟، ليه معملتيش حاجة ليه؟ مصعبتش عليكي؟، أنتي امي وانا امي'.
وكانت الفنانة ميار الببلاوي، كشفت مؤخرا عن أسرار تذاع لأول مرة في قضية الفنانة وفاء مكي، التي اتهمت بتعذيب خادمتيها، بعد مرور 23 عاما على تلك الحادثة.
وقالت ميار الببلاوي، في تصريحات لبرنامج 'صبايا الشمس'، من تقديم الإعلامية ريهام سعيد: 'الموضوع تم فتحه حاليا وأنا متكلمتش فيه، وأنا مريضة قلب ومفيش مرة دخلت عملت عملية إلا ما بقيت قبلها أدعي ربنا يمد في عمري لحد مقول كلمة الحق'.
وأضافت ميار الببلاوي: 'أنا كنت عاوزة أقول حاجة بس مش عارفة الطريق، وجوايا صراع إن كلامي دا هيعمل حاجة ولا لأ، بقالي 23 سنة تعبانة، وبقول يا ترى لو كنت قولت شهادتي كان هيتاخد بكلامي'.
وحكت ميار الببلاوي تفاصيل الحكاية قائلة: 'لما اتجوزت مكنتش شاطرة ومش بعرف أعمل حاجة في البيت، وجوزي كان عاوز يجبلي ناس تساعدني، كان معايا بنت بتساعدني مدة طويلة واتجوزت ومشيت، وبوابة العمارة قالتلي في واحدة تحت معاها بنتين عاوزين يشتغلوا'.
وتابعت ميار الببلاوي: 'بنت منهم هرشت في شعرها ولقيت شعرها أقرع، وقولتلها إيه دا، قالتلي دول اللي كانوا عند الأستاذة وفاء مكي، والبنت عندها قراع ووفاء حلقتلها شعرها، ورفضت أن تعمل البنتين معي، لكنهما كانتا بصحة جيدة، لكن خفت من اللي عندها قراع إنها تعدي ابني'.
وواصلت ميار الببلاوي: 'شهادتي اللي بقولها إن البنتين جم من عند وفاء مكي، مكانوش محروقين ولكن حالقين شعرهم، والست مشيت وأخدت البنات، ثم فوجئت بكلام الجرائد عن تعذيب البنات، ولما شوفت صورهم قولت دول اللي الست كانت جيباهم لي وكلمت صحفي معروف، وكان صديق عزيز ليا أنا ووفاء، وقولتله الموضوع دا غلط ووفاء معملتلهومش حاجة، وهما جم من عند وفاء مكي لعندي، ثم راحوا البلد والمصور قالي فيه شخصية عاوزة تئذي وفاء، وكلامك مش هيقدم ولا هيأخر'.
واختتمت ميار الببلاوي: 'كل الكلام دا كان من 23 سنة، وربنا مد في عمري عشان أقول كدا، والحمد الله إني قولت والموضوع دا كان تاعبني'.
وكانت الفنانة وفاء مكي اتهمت في قضية تعذيب خادمتهيا عام 2001، وتم الحكم عليها بالسجن عشر سنوات، مع الشغل والنفاذ، ولكن تم تخفيف الحكم بعدها إلى ثلاث سنوات لتخرج عام 2004.