حسام داغر ينعي والدته بكلمات مؤثرة: غصب عني دموعي خانتني

نعى الفنان حسام داغر، اليوم الثلاثاء، والدته الراحلة التي توفيت قبل 3 سنوات من الآن.
حسام داغر
ونشر حسام داغر، مجموعة من الصور بصحبة والدته، من خلال صفحته الخاصة على موقع التواصل الاجتماعي 'فيسبوك'.
وكتب حسام داغر: لما شعري بدأ يطلع فيه أبيض من 4 سنين كان الأبيض بيطلع في جناب بس فوق ودني وكان شكله جديد عليا بس أوقات كنت بحتاج أصبغه حسب الدور الي هعمله واتعودت أن والدتي هي تصبغه ليا من صبغه بتاعتها.. لو عندي شغل قبلها .. لأن كانت فكره الصبغة والشعر الأبيض جديدة عليا و فضلت كده لحد ما تعبت هي وبقت صحتها متدهوره و في مره قالتلي أنت سايب شعرك ضرب أبيض ليه كده و اصرت تقوم من السرير تعملي شعري وهي كانت صحتها تعبانه ومبقتش تروح كوافير بتاعها و شعرها كله أبيض برضه قلتلها بعد ما صبغتلي أقعدي أنا كمان هعملك شعرك وكان شعرها جميل وتقيل وهي كانت قصته عند الكوافير (آلا جارسون) قصير اليل هو تلت وتلتين وكانت علطول بيه في البيت كده وده شكلها اللي أنا متعود عليه مش شكلها اللي أغلب الناس عارفاها بيه بالحجاب.
وتابع: أنا عملت شعرها لأول مره ساعتها وكان شكله جميل بعدها ورجعتها سريرها تاني.. كانت أول وآخر مرة أعمل ده بس سابت عندي ذكرى حلوة، لما كانت تضحك على أني مش عارف أوزع الصبغة، وتقولي أنا معرفش أزاي سبتك نعمل ده.. كان شعرها غالي عليها ولما كنا خايفين يقع بسبب التعب تقولي لا ربنا مش هيبهدلني في آخر عمري وكانت عندها ثقة في ده.. إمبارح كنت بحضر حفلة لعازفة الهارب منال محي الدين لقيتها عاملة نفس قصة الشعر بتاعتك وغصب عني دموعي خانتني في الحفلة لما افتكرت كل ده.
وأضاف: هي دخلت المستشفي بعدها وتوفت في العناية المركزه قدامي ومكنتش مستوعب والدكتور وأنا واقف جمبه عند المكتب جوة العناية، وبيملي الممرض يقوله المريضة توفت في تمام الساعه 11:30 دقيقة إثر هبوط حاد في الدوره الدموية والقلب... بيقول ده وأنا باصص على سريرها وشايفها نايمه عادي ومش مستوعب بساطة التقرير اللي بيكتبوه .. كانو بيكتبوا بشكل روتيني وأنا كل اللي بفكر فيه استنوا انتوا أزاي بتكتبوا كده دي نايمة بس استنوا اعتقد أنها لسه مش ميته ورحت ليها لقيت ممرضة بتفك منها الأنابيب وأقولها استني شوية بتعملي إيه إديها فرصة هي هتبقي كويسة راحت الممرضة بكت وسابتني وحدي معاها.. بصيت حسيتها صاحية ووشها عليه ابتسامه خفيفة.. قلتلها متخافيش على إخواتي ومتخافيش عليا وأشوفك على خير وأنا مش مصدق اللي بقوله ليها وكل تفكيري هقول إيه لأخواتي اللي واقفين برة العناية..
وختم حسام حديثه: زي النهارده كان كل الكلام ده ليلة الجمعة 17 يناير 2020.. يا رب صبرني و قدرني على ألم الرحيل وعارف أنها في مكان أحسن.. أنا لما عملت العمره الأخيره ليكي كنت بدعي و بقول لربنا أنا آخر مرة كنت هنا هي كانت معايا في الحج وأنت عارف مدى تعلقها بيك.. ساعتها اتجرأت وطلبت من ربنا في الطواف أن يديني أي إشاره أنها عنده في الجنة وبعدين اتكسفت من اللي بقوله ورجعت اعتذرت في ساعتها بقوله أنا آسف مش مفروض أحط شروط في كلامي وفجأه لقيت حزام اللي فيه موبيلي وباسبوري فك ووقع مني على الأرض مع أنه معمول بأفيز حزام قوي وصعب يفك لقيت نفسي ببكي وأنا بلم الحزام وقلت معقول أنت سامعني و قريب مني قوي كده وعاوز تريح قلبي أنها عندك في الجنة.. ومن ساعتها وأنا مطمن عليكي... في الجنة يا حبيبتي مع بابا الله يرحمه
.. برجاء الدعاء لهما .. اليوم الذكري السنويه التالته لوالدتي الله يرحمها.
مسلسل الضاحك الباكي
يذكر أن آخر أعمال حسام داغر هو مسلسل 'الضاحك الباكى'، والذي سلط الضوء على نجيب اريحاني أحد أهم رواد الفن في تاريخ الفن، سواء من خلال خشبة المسرح أو السينما الذى قدم فيها أعمال ناجحة ما زالت خالدة إلى الآن.