مرتضى منصور: مروان عطية كان لاعب مغمور وهوقفه لو راح الأهلي

كشف المستشار مرتضى منصور رئيس نادي الزمالك، عن توقيع مروان عطية لاعب فريق الاتحاد السكندري للنادي الأبيض من قبل.
مرتضى منصور: مروان عطية كان مغمور
وقال مرتضى منصور، خلال تصريحات تلفزيونية عبر قناة الزمالك: "مروان عطية كان لاعب مغمور يعني مش عبدالله السعيد ده كان واحد من كفر الدوار، واللي بيتقال أن فيريرا كان عاوز مروان عطية كذب".
أضاف رئيس الزمالك: "محمد مصيلحي هيفضل أخويا ومحدش هيوقع بيني وبين جماهير إسكندرية، وكلمني في الانتقالات الماضية، وقالي أنا عاوز محمود علاء وقولتله أنا عاوز مروان عطية".
وتابع: "رئيس الاتحاد السكندري قالي مروان عطية هيفضل معيا ليناير وبعدين هديه للزمالك، وعرضنا 10 ملايين على الاتحاد السكندري وبعدها طلب 12 مليون و2 لاعيبة، وبعدها كلمني قالي أنا قعدت مع الخطيب وهو عارض 25 مليون و4 لاعبين وبيراميدز عارض 30 مليونا".
هوقف مروان عطية لو لعب لنادي تاني
وأكمل مرتضى منصور: "قلت لمحمد مصيلحي أنا عرضي مش هيزيد وزي ما اتفقنا قالي فكر قلتله الزمالك مش بيتساوم، وهوقف مروان عطية عشان هو ماضي للزمالك ولو لعب لأي نادي تاني هيتوقف".
وأردف مرتضى منصور: "محمد مصيلحي كلمني انهارده وقالي عملت أيه قولتله معايا توقيع اللاعب وهوقفه لو ملعبش في الزمالك، والراجل كلمة ومافيش لاعب طلبته مني ومدتهولكش وهسيب جماهير إسكندرية تقول كلمتها، ومن فضلك محمود علاء يرجع".
وشدد في نهاية حديثه: "بقول لجماهير الزمالك خلي العيال الصغيرة تهدى شوية، ليه بندمر لاعبي الفريق خلصتوا على زكريا الوردي ودخلتوا على سامسون وهايمشي".