عن نادين شمس

ايديا ساقعة
وعندي ضربات قلب
وبعدين
احنا ماتفقناش علي كدا
أو احنا ماتفقناش
علشان ما عرفناش نتفق
قالوا القمر ساعات بيرحل في الشتا
والشمس
أوقات في الربيع تنطفي
مابين الصدفة و الصدفة
حدفة
زمن وفي بعض الأحيان عمر
بين الوجع و الوجع
ثانية
يادوب تفوت مابين الدمعة و التانية
بنت البلد بتغني للجدعان
بتشبه الثورة
والسيما و الألوان
و بتشبه الأحزان
حزن من غير انكسار
حزن مليان غضب
وكاتب لا علي القورة
بنت البلد يا مصر في الصورة
جنب الحبايب كلهم
غنت عشانهم كلهم
وحكتلهم حواديت جديدة و قديمة
وسيناريوهات للسيما
بنت البلد كان ليها صمت جميل
كان حسنها و حزنها يشبهوا للنيل
هي الحرية
وهو فارس نبيل
وضحكهم للدنيا يوريك القمر فنان
بس الزمن بخيل
مستخسر الجدعان
انا خجلان من نفسي
ازاي كلامي يأس
عن ابتسامة أمل
"ايه العمل في الوقت ده يا صديق"
والموت منشف كل بلة ريق
يارب ياللي عارف اسامينا
خللي الملك مينا يطبطب ع اللي جايينلك
و سيد يغني لهم بهمس
عارفة
انا لسة في انتظار صدفة
ان المطر يعزف و ينزف حنان
او تناديني الشمس
اشوف وشك بخير