مقاطع مش حزينة قوي

1
لو كنت راعيت ربنا شوية في حبة الخيال اللي مديهم لي
وما دورتش أبعزق فيهم يمين وشمال
إشي ملايكه بفساتين فزدقي بيتنططوا حواليا
وأنا باجيب الديب من ديله
علي الجنيات اللي بياخدوا بأيدي في كل مرة
أدخل فيها قصيدة وما عرفش اخرج
يمكن كنت قدرت دلوقتي أعرف بالظبط
الجناحات اللي معايا دي كلها بتاعة مين!!
2
النجمة اللي لقطتها قبل ما تقع علي الارض
كانت مطفية
فاضطريت بدافع الشفقة إني أخليها معايا
لكن الجبانة كانت عارفة
شفطت كل النور اللي في روحي
وطفتني
3
البحر اللي ما قدرش يجاوب علي سؤال الملح
ولا يسد الفراغ اللي سابه الصخر في رجلينا
ولا الجروح الغايرة في روحنا
ما يستاهلش تكون نهايتنا علي ايده
4
إيه اللي فاضل في الريح ما كنستهوش
بعد ما بلعت الارض اللي قدرت عليه
ورقصت النار علي الباقي
فاكرين إنهم بكده بيخفوا معالم جريمتك
وبيمنحوني الوقت عشان أسامحك
طب إزاي ! وعيني دي اللي تحت رجلك
5
النهارده ولأول مرة قدرت
أمسك الحكاية من طرفها
لكن الظاهر جنون الفرحة
عماني عن إن طرفها التاني
شابك فيه عفاريت لا ليها أول ولا اخر
ساعتها بجد ما كانش الفزع هو اللي شاغلني
كان همي إزاي أدبر لهم مكان
عشان يناموا فيه
6
البهجه دي مش بتاعتي
فياريت ما حدش يضرب نار
واللي يحبني ما يسألنيش عن الرحمة اللي جت
قبل راسي بكام مللي وما رضيتش تنزل
وإزاي ده خلاني ساعات كتير قوي
أشك في وجودها
وأضطر في أوقات اكتر أستعمل أي فرح قديم
عشان أقعد بيه وسط صحابي
يمكن أقدر أستر مجالي