الكل خائف علي منجزات ثورة 25 يناير، والخوف الأكبر من النسيان؛ نسيان ما كان من فساد، وما أدي إليه من كساد، ثم ثورة غيرت وجه البلاد. الخوف فعلا من أن ترجع ريمة لعادتها القديمة؛ خاصة وأن هذه العادة كانت كالعاهة المستديمة. ونحن نتعلم دائما ممن سبقونا، ونشكر أسلافنا لأنهم دونوا لنا خبرتهم، في الأخبار والأشعار وغير ذلك كالقصص الشعبية والروايات الأدبية، ومن أهم ما تركه لنا الأقدمون الأمثال الشعبية؛ لأنها تختصر خبرة السنوات، أو نتيجة الأحداث في جمل بسيطة، يحفظها البسطاء والكبراء، وتؤدي غايتها لدي الجميع بنفس القدر والفائدة، فالذي قال مثلا (اختار الجار قبل الدار) أكيد كان له جار نكد عليه حياته لسنوات، فبدل من أن يحكي لنا قصته معه اختصر الموضوع في هذه الجملة البسيطة التي صارت مثلاً لكل الأجيال؛ لهذا فكرتُ في أن أختصر الدروس المستفادة من ثورة 25 يناير في صورة حِكَمٍ وأمثال شعبية، لكي يسهل علينا حفظها وتكرارها؛ فلا ننساها، وربما كُتِبَ لها أن تتناقلها الأجيال القادمة الذين قامت الثورة من أجلهم، خاصة وأن ما حدث كان عظيمًا يلهم الأدباء والشعراء والمثَّالين.. وطبعا لا أعني بالمثالين صناع التماثيل، ولكنه تعبير جديد أقصد به مؤلفي الأمثال، ويشرفني أن أكون واحدًا منهم. وعلي سبيل المثال؛ موضوع صداقة أحمد عز لجمال مبارك وما نتج عنها؛ لا نستطيع أن نحكي قصتها لكل مسئول يقترب من رجل أعمال لينتج عن ذلك فساد كبير، وإنما نقول له باختصار علي رأي المثل: "لو اتلم مسئول علي (عِزّ) يبقي الشيطان بدأ يِوِزّ" وبذلك نكون قد اختصرنا له القصة كلها في جملة واحدة. وكذلك إذا تولي أحدٌ رئاسة بلد وتذكر هذا المثل: »اللي يظلم شعبه ويجوَّعه.. خلِّي شرم الشيخ تنفعه« سوف يضع أمامه مأساة الرئيس السابق مبارك بكل تداعياتها، فيأخذ منها العبرة.. وبما أنني من ضمن الخائفين علي الثورة فقد سجلتها في مئات الأمثال، وأقدم للقارئ الكريم منها الآتي: - علموا أبناءكم حب الأوطان، والمبيت في الميدان، والسيطرة علي الجمل والحصان. - اللي يظلم شعبه ويجوَّعه؛ خلِّي شرم الشيخ تنفعه. - القعدة علي الكرسي يامَه؛ تقوِّم عليك القيامة. - خيمة في ميدان التحرير؛ ممكن تغيَّر كتير. - إذا أردت أن تنجح في حكم بلد؛ فاتَّقِ شر الزوجةِ والولد. - المليونية تشيل الحكومة المفترية. - القعدة علي الكرسي كتير؛ إن ما جابتش ثورة تجيب بواسير. - قولوا لكدابين النشرة: الكدب بِيْسَوِّد البَشْرَة. - الشاشة ممكن تكون غشاشة. - شاشة الحكومة محكومة. - الميادين مش للف والدوران؛ الميادين لتحرير الأوطان. - اللي ساكت علي الظالم وبايس مداسه؛ يبقي توب الحرية مش علي مقاسه. - الثورة مش لَمَّة وعلم وهتاف؛ الثورة قلوب ما بتعرفش تخاف. - لو اتلم مسئول علي (عز) يبقي الشيطان بدأ يِوِزّ. - الكرسي مهما كان عالي ومرموق؛ بعد سنين بيتحول لخاذوق. - مسمار من تلاتين سنة مدقوق؛ خَلْعُه أكيد ها يسيب شوية شقوق. - الدبابة في صف الغلابة. - اللي عرف سكة الميدان؛ لا يقبل ظلم ولا هوان. - اللي عايز ينجح بتقدير؛ يحفظ درس ميدان التحرير. - الدِّين لا مِلْكِ شيخ ولا قَسِّيس؛ الدين: إيمان، وحب، وأحاسيس. - إعلام زائد حرية؛ يطلَّع البلاوي المدارية. - الثورة علي الظلم زي يوم القيامة؛ إذا قامت لا تنفع توبة ولا ندامة. - اليُو تُيُوب ما بيُسْتُرشِ عُيُوب. - نافق واتلوِّن علي هواك؛ اليو تيوب بِيْجَمَّع وراك. - كُلُّه متجمع ومكتوب؛ يا عَ الفيس بوك يا عَ اليو تيوب. - طول ما النت شغال ومفتوح؛ المنافق مفضوح مفضوح. - لما تشغل التليفزيون بإيديك؛ خللي بالك لَيِشْتَغَل عليك. - مظاهر فساد عديدة، وشعب عايش علي الحديدة، في ظل حكومة عنيدة؛ يساوي ثورة أكيدة. - الثورة السلمية مباحة؛ والهجوم عليها قباحة. - يا حاشية دلَّعِي دلَّعِي؛ المتدلع حيتخلَعْ وأنت حَتِوْلَعِي. - ساعة الجد ما بينفعش الظالم حد. - بلد غرقانة في الفساد؛ لا فيها ميدان ولا ليها ولاد. - الثورات زي الزلازل لا بتتصَدْ ولا بتتنازل. - لما يكبر الفساد بيخلِّف ثورة. - ثورات الشعوب زي بصمات الأصابع كل واحدة ليها شكل وطابع. - الوطن مش أرض ولا سما ولا نيل؛ الوطن شعب حر وأصيل. - ميدان التحرير مكشوف؛ وعنوانه سهل ومعروف. - لو اتظلم أهالينا؛ الميدان مستنينا. - البلد ما بتنضفش بصابونة ولا ليفة؛ البلد ما ينضفهاش غير ثورة شريفة. - السُّلْطة المسْتَدِيمَة مُوضَة قديمة. - رئاسة من غير حدود؛ يعني فساد موجود. - رئيس فَسَدْ؛ خِرِبَت بَلَدْ. - الفساد زي السرطان؛ لو ما اتلمِّشْ مِ البداية بيسرح ويجيب النهاية. - حضن الجيش للشعب؛ حالة حب مش حالة حرب. - الأطرش بيفضل قاعد مطرحه؛ ما تفرقش معاه بتشتمه ولاَّ بتمدحه. - انتخابات ما فيهاش عدالة؛ بتم في صناديق زبالة. - ما يستعانش بالبلطجية غير اللصوص والحرامية. - ما يرميش الملوتوف غير البلطجي والحلوف. - العيشة الشريفة تغني عن الحرس والتشريفة. - الحزب المُنْحَل مسيره الحل. - ضرب النار بيكتر الثوار. - ظلم يدوم ثورة تقوم. - اللي ماسك في الكرسي ومكلبش يبقي لو سابه هيتكلبش. - فساد اتجوز فسادة؛ يخلفوا ثورة تجيب لهم إبادة.