بمرور الوقت

راجع يا كلاب
أكتب شعر
وأتألم
وأتعور
وأخرّ دم
بس المرة دي
مش هاديكم منه
ولا نقطة
جراب الحاوي فضي
فقرر يلعب لعبته الأخيرة
قسم نفسه نصين
بالطول
ومع تسقيف الجمهور
نسي ازاي يجمعهم تاني
الجمهور
بدأ يصفر
وبعد شوية
حدّفوه بالطوب
ولما زهقوا .. روّحوا
ومن ساعتها
كل عين من عينيه بتبكي ..
لوحدها
والصالة فاضية
مكسب الرهان
مش دايما بيدعو للفخر
أحيانا
بيكون علامة
علي التواطؤ
وغالبا
بيكون نتيجة غش
ف أصول اللعبة
ودايما
بييجي علي حساب حد تاني
مالوش ذنب
غير إنه فكر
يفرح بنفسه شويتين
حلمت بيك كتير
وإنت بتسقط
من كل الأماكن العالية:
درابزين سلم
أسانسير
طيارة
جبل
سطح
بلكونة
حصان بجناحين
بساط الريح
مدنة
برج كنيسة
وكنت كل مرة
باصحي وأنا خايف عليك
النهارده
مكنتش بحلم
ومحسيتش تجاهك بأي مشاعر
وإنت بتسقط ..
من نظري.
لما لويت دراعي
عايز تكسره
سبتهولك
لما ضغطت زيادة
عملت نفسي باقاوم
علشان مافسدش عليك
فرحتك بالانتصار
لما كسرته فعلا
ما همنيش
كان كل تفكيري
ازاي وإمتي
اتكونت جواك
الرغبة في أذيتي
رغبتك دي
هي الألم ذاته
الأماكن كلها ..
مشتاقة ليك
اشبعوا ببعض
لما قرر يسافر
احترت
أعاقبه بإني أودعه
ولا بإني ما اودعوش
وفي النهاية
لقيت أصعب عقاب
إني أسافر ..... معاه
الشمس بتنور
وتعمي
بقالي خمستاشر سنة
باعاني من أعراض "النضج"
معنديش حنين لأيام المدرسة
ولا باشتاق لأغاني نجاة
ولا فيه مشاهد
قلبي بيتقرص لما افتكرها
ولا أسماء
باتوتر لما تيجي سيرتها
باختصار ..
مكتئب
دي تاني علبة سجاير
بعد حلة المحشي
اللي ضربتها الساعة 2 بالليل
وهكذا ..
تسير خطة تدمير العالم
بنجاح
علمتني الحياة
ولا حاجة
بصراحة
أنا مندهش من قدرتك
علي الحزن
والغضب
ومواصلة مسيرة الانتقام والدموع
مش كنا اتفقنا
إن ده فيلم
وإن دي شاشة
وإن سعيد مهران
مجرد شخصية
ف خيال مثقف ..
ما يفرقش حاجة ... عن رؤوف علوان؟
لفت ضفيرتها علي قلبي
لفت ضفيرتها علي قلبي
وشدت
لفت ضفيرتها علي قلبي
وشدت .. فانعصر
كان العصير لون النسيم
شربت لحد الموت
فساوتني
عارفك
بتحبيني .. زي قزازة البيرة
شغال
بس لازم تعرفي
إن الإزازة دي
لما بتنكسر .. بتجرح
واما بتتفتت
بيبقي المشي علي جثتها
نوع م الانتحار
الحزن
،من غير سبب،
أسمي معاني الغرام.
كان نفسي
أشوف عفريت
كان نفسي
أسمع أصوات في الشقة
لواحد بيصرخ
وهو بيتقتل
كان نفسي
لما أرفع راسي
بعد ما أغسل وشي علي طول
ألاقي في المراية
شبح بيضحك
كان نفسي
أحبك
ونعيش سوا
كان نفسي
لكن للأسف
من كل ده
ما شفتش أي حاجة
غير عمر ضاع
في الخوف
دلوقتي
وإنتي بتقري قصايدي
أو بتسمعيها
أنا حزين جدا
إني مش قادر أقول اسمك
بعد كلمة "بحبك" يا ......
كل المحاولات اللي عملتيها
علشان تسعديني
فشلت
أحب أطمنك
إن دي حاجة لطيفة خالص
لأنك كده
بقيتي تمام تمام
زي الحياة
العنف ..
إعلان العدم عن وجوده
السلام ..
إعلان العجز عن قدرته
الحب ..
لحظة هزيمة
بتنتصر علي كل ده
من عدْلُه
إن ملك الموت
بينتصر
علي شيطان الحياة
ومن رحمته
إن ملك الموت
بيتغلب
قدام شيطان الشعر
بمرور الوقت
الأشجار بتكبر
بمرور الوقت
الأشجار بتموت
اللعبة دي
ما تحاولش تفهمها
كل اللي عليك
تمصمص شفايفك
وتقول:
ياما في الوقت .. مظاليم.