يتكون محظوظ يتكون منحوس مع بختك من هريدى نيوز.. _الحمل: عقلك فى راسك تعرف خلاصك وما حدش يعرف مصلحتك غيرك. _الثور: ياما فى الجراب يا حاوى، فيه حلوين وفيه تعابين، والتعابين هتلاعبهم والحلوين هتحبهم. _الجوزاء: طموحك حلو، بس الطبلة البلدى مش شغلتك، وممكن تكسب من غير ما تطبل لحد ولا تغنى على حد. _السرطان: دقوا الشماسى.. وهتحب اتنين سوا المية والهوا، بترتب لرحلة فى الصيف ويمكن تلاقى فيها الحب. _الأسد: قالوا زمان: اللى يسأل مايتوهش، وقالوا من كام يوم: إن الصين حلوة.. وقطر حلوة ما تزعّلش نفسك. _العذراء: النهضة حاطّاك فى دماغها اليومين دول، هات شوية مية وانقع فيهم زِرّين بطاطا يمكن عقدتك تتحل. _الميزان: مش كل من صوصو عصفور، ومش كل قط يتقالّه يا مشمش.. ومش كل ميزان مجبور، ومش كل الأحلام فى المشمش. _العقرب: لاقينى ولا تغدينى واللى اداك يدينى..غيرة الناس يتفاتلها بلاد، وانت سِمّك ما فيش منه شفا. _القوس: برج شجرة الدر، لازم تتخلى عن غطرستك شوية، وتبقى على الحياد بدل ما القباقيب تسبق السيوف على رقبتك. _الجدى: الرجل الغامض بسلامته متخفى بنضارة.. يا ريت كل الأبراج زيك يا رزين يا هادى، هات اتنين جنيه وبرجك كل يوم يبقى كده !! _الدلو: القراءة والتليفزيون ما بيضيعوش النظر، زى الفرجة على الناس من البلكونات؛ لأنك معرض لنبلة أو خرطوشة من زمن الخرطوش تيجى فى عينك. _الحوت: لو فاكر إنك تقدر تكون أحسن من فلانتينو!! تبقى غلطان.. هارون الرشيد نفسه ما بيفكرش يعمل اللى انت بتعمله، سيب بنات لغيرك يا أخى.. القناعة كنز لا يفنى.