يتكون محظوظ يتكون منحوس.. مع بختك اليوم من هريدى نيوز!! _الحمل: كل الدنيا بتدور حواليك.. إنت اللى ملاك والباقى شياطين.. حلم جميل بس الحياة ناقص فيها غاز وسكر وزيت وبنزين، والجعان يحلم بس بسوق العيش. _الثور: بختك النهاردة زى بخت نجيب الريحانى فى فيلم "لعبة الست".. اقرع لكن نزهى وآخرته ملك أونطة. الجوزاء: كل الأحبة اتنين اتنين، وانت يا "جوزاء" حبيبك فين.. مفاجأة حلوة فى انتظارك، خليك "ريلاكس" وابعت للفرح فاكس، أو "إس إم إس". _السرطان: برج السيطرة عندك مبحبح شوية.. محتاج تضيقه بس انت لازم تعرف إن السيطرة ليها حدود.. بعد الكوبرى الجاى شمال. _الأسد: فيه سنة الحرب وفيه سنة النكسة وفيه سنة الأسد.. شكلها سنة كبيسة وهتعدى بطلوع الروح.. اشتغل شوية. _العذراء: هى كانت فين عينيك يا "عذراء" لما دورت بإيديك على الندامة.. تخلص من خطيب أو خطيبة حبيبك القديم قبل ما يفكر يرجعها.. حطوله مُلَيّن فى الشاى. _الميزان: مش هاقولك غير معلومة واحدة بس.. الريس حنفى صاحب "نورماندى تو" الذى سلّم مفتاحها لإسماعيل يس القبطان كان برج الميزان. _العقرب: لو الحياة معصلجة معاك.. بشوية ضحك وهزار وفرفشة تلين، كلك ذوق وحنية وبلاش تاكل ملوخية. _القوس: القمر أعد فى بيته رقم 9، وده معناه إن أيامك زى الرقم، يعنى هتاكل 9 حبات رز، وتشرب 9 كوبايات مية، وتنام 9 ساعات، وممكن تبقى حامل فى 9 شهور. _الجدى: لو حد قالك تعالى معايا فى حتة واداك حتة شيكولاتة، قوله بابا قالى ما تلعبش مع حد من برج "الثور" عشان وحشين. _الدلو: هات ورقة وقلم واتعلم تشخبط وترسم خريطة، يمكن تخرج من متاهة نافوخك المرفوع من الخدمة بسبب أعمال النهضة. _الحوت: شهر عسل جديد وحياة حلوة، وعشان ما تصحاش من الحلم بسرعة خلص ديونك، وما تسلمش دقنك لحد ولا شراباتك.