يتكون منحوس يتكون محظوظ.. حظك عندنا فى هريدى نيوز.. _برج الحمل أبواب النجاح بتتفتح النهاردة.. اصحى بدرى عشان تلحق تدخلها .. وبلاش تتأخر وانت بتلمع "جزمتك" صحيا: بلاش مغامرات .. ورهانك على الشطة مع أصحابك آخرته "مرض صعب أقولك عليه". _برج الثور طريقك مسدود مسدود مسدود يا ولدى .. فوت علينا بكرة يمكن الداخلية تفكر تفتحه.. لو عايز تخلع من علاقتك الحالية ممكن تكمل غيره بالطريقة اللى انت ماشى عليها. صحيا: لو بطنك وجعتك ..أكيد مش عشان حد قالك "جاك وجع فى بطنك" روح للدكتور فورا. برج الجوزاء هتقدم السبت وبكرة تلقى الأحد أدامك ..خليك واضح ورومانسى شوية بلاش رمى "دبش" فى الكلام. صحيا: صحتك أحسن من الأيام اللى فاتت ..التعقيم والتطهير من أبرز سمات برجك. _برج السرطان هيحاولوا يطلعوك وحش كاسر لكن فيه ناس تانية عارفين إنك ملاك برىء ...محتاج وقت أكبر عشان يطلعلك جناحات وتطير. صحيا: لازم تعمل ريجيم و"تأنتخ" وتبقى بارد شوية.
_برج الأسد أخيرا أحوال الشغل هتتظبط مع وجود برج "السيكو بيكو" فى مجالك المغناطيسى .. وجيالك فلوس كمان بس حاسب احسن تتسرق. صحيا: اتأكد إن جيب البنطلون مش مخروم أو أن البنطلون نفسه مش مبلول. _برج العذراء انت نجم النهاردة والسما هتمطر عليك إعجاب .. اتصور صورة يمكن تنفعك أيام لا ينفع فيها قرش أبيض ولا أسود صحيا: رفه عن نفسك وفكر تخرج بس ما تعلاش بدل ما تقع على جذور رقبتك. _برج الميزان خليك جد شوية وكفاية هزار فى الشغل وما تتهربش من الحقيقة لأن مناخيرك بتكبر لما بتكذب صحيا : لو مشيت شوية صحتك هتبقى أفضل وهتفكر قبل ما تكذب.
_برج العقرب انت صحيح عقرب بس الدنيا فيها تعابين كثيرة ..خلى بالك كل ما تنجح تعابينك هيكتروا صحيا : القوى فيه الأقوى منه والعصبية هترجعك لورا. _برج القوس اصبر على جار السوء يا يرحل يا تيجى مصيبة تاخده ..مستقبلك حلو مع حبيبك خاصة وانتوا عصفورين كناريا بتزقزقوا ادام العيلة. صحيا : صابون الصحون مش حل للدهون المتراكمة فى جسمك.
_برج الجدى لو انت قاعد فى أى حتة فى الملعب هتلاقى الكورة جاية فى وشك..بلاش تعيش نظرية المؤامرة صحيا : لو تفاحة حبت تزيد عن حدها ممكن تقلب للملوخية بنت اختها.
_برج الدلو مشغول ولآخر الأسبوع مشغول ..رتب أولوياتك وما تنساش حبيبك بدل ما الزعل يقلب بطلاق. صحيا : مفاجأة فى انتظارك !! ..لأ المدام مش حامل.
_برج الحوت ما تفوتش الكروت من تحت الترابيزة ..الزمن اتقدم وبقى فيه كاميرات مراقبة وبرضه بقى فيه لعبة سوليتير ..خليك واضح. صحيا : مهما غزيت فى الشغل يا ابوزيد آخرك كيس سكر وازازة زيت (احتمال يبقوا ازازتين مع اقتراب الانتخابات).
