يا تكون محظوظ يا تكون منحوس.. حظّك عندنا فى هريدى نيوز - برج الحمل كوكب جديد داخل فى كوكب قديم وعشان كده عندك ورطة ولازم تفكّر قبل ما تعمل عملة سودا فى نفسك، وحاول تتطوّر شوية ماتقفش محلّك سر. صحيًّا: تفتكر الكرش ممكن يخس مع المحشى؟! - برج الثور يوم زى الفل وهتحقق فيه أحلام كتيرة ولسانك مش هيبطل كلام فى النجاح اللى هتحقّقه.. هيّص وماتنساش الحلاوة. صحيًّا: بمب فلة شمعة منوّرة.
- برج الجوزاء أخيرًا، ممكن ترتاح من الضغط العصبى بعد ما كان عندك عكوسات من أول الشهر، فكّر وقرّر بس بلاش النصّين بتوعك يحيّروك "هى مش جنان يا شيزوفرنيا"؟ صحيًّا: العب يوجا يمكن تنفعك أو تريّح أصحابك من رغيك.
- برج السرطان أمامك سكة سفر ماتغيبش وما تقطعش الإس إم إس، وادفع الفلوس اللى عليك قبل ما تسافر. صحيًّا: خد معاك زلعة" مش" يمكن تحتاجها؟ - برج الأسد إنت مشهور وحلو آه.. بس ماتاخدش فى نفسك قلم واستخبّى يومين، خصوصًا من حبيبك. صحيًّا: احتمال تمر بألم فى الأسنان، بس عادى اخلعهم وارتاح وساعتها هتتحوّل من "أسد" ل"قطة". - برج العذراء شريكك فى الشغل أو فى البيت هيرضى عنك وهتبقى الحياة "عنب" بس لازم تصلح أخطاءك الصغيرة بسرعة. صحيًّا: رشيق كعادتك.. بس خلّى بالك من الحاسدين.
- برج الميزان ذهب.. ياقوت.. مرجان.. فيه فلوس كتير هتييجى، بس استثمرها فى شغل صح، وقصة حب جديدة فى الطريق "ابسط مين أدّك، حب وفلوس فى نفس اليوم". صحيًّا: يعنى عايز حب وفلوس وصحة؟ إيه الطمع ده! - برج العقرب فيه حاجة كانت ضايعة منك هتلاقيها، وفيه ناس كانت بتقلّل منك، هتدّيهم أخيرًا على دماغهم. صحيًّا: كفاية سهر أمام التليفزيون والكمبيوتر وأكل عمال على بطال، هتتخن وتبقى زى برج الحمل.
- برج القوس احتمال تقابل شخصًا من الماضى.. الحق نفسك ولم المتكسّر عشان ما تتفضحش، وما تفكرّش تتجوّز دلوقتى. صحيًّا: صحتك مش ولا بد، وبلاش تحرج نفسك.
- برج الجدى فى واحد من زمايلك ناويلك على زومبة، وهيفضح كلام قديم بينكم، وكمان فيه واحد تانى غير الأولانى هيحاول ياخد منك حبيبك "هو شكله يوم منيّل بنيلة، قضّيه نايم أحسن". صحيًّا: اتغطّى كويس وانت نايم.. الجو اليومين دول زى الرئيس إياه، بالنهار بحال وبالليل بحال تانى. - برج الدلو شكلك هتفلّس ولازم تلاقى طريقة بدل ما تقعد تشحت على باب جامع.. ما تتكبّرش واشتغل أى حاجة. صحيًّا: الرياضة مهمة بس تلعبها مش تتفرج عليها فى التليفزيون.
- برج الحوت فيه ناس عاملين عليك مؤامرة، بس على مين انت "هتبلعهم".. خليك هادى زى هدوء المحيط، وعصبيتك هتخلّى العاصفة تهد كل المراكب على دماغك. صحيًّا: كفاية شرب عصير قصب.. القصب مش ببلاش.