يتكون محظوظ يتكون منحوس مع بختك فى هريدى نيوز.. _الحمل: زى القطط بسبع أرواح وأربع رجلين، ومن غير مخ، بس ليهم شنبات تخوّف أجدعها فار.. ركّز فى إيجابياتك. _الثور: هو احنا نقول "ثور" يقولوا احلبوه؟!! اللى ما يخصكش ما تسألش عليه عشان ما حدش يجرحك ويلبسك أحمر. _الجوزاء: اليوم يومك والحظ حظك، عيش ونفّض للى يفكر يستفزّك، واصبر على جار السو؛ يا يرحل يا تجيله نهضة تشيله. _السرطان: زرعتها تفاح طلعت برسيم؟!! جرّب كدة تزرعها مانجة يمكن تطرح عنب، والحياة تبقى زبيب. _الأسد: البلد اللى مالكش حد فيها البس سموكن واشرب سيجار، واعمل نفسك جاى من بلاد أوربا وبرطع فيها. _العذراء: إن كان لك عند "البوبى" حاجة قوله: يا مستر، واللى يقولّها جوزها يا عورة، جيرانها يلعبوا بيها الكورة "وشراب كمان". _الميزان: لو يقرصك تعبان خاف من ديله، ولو ضايقك اللى بخته سم عبى واديله. _العقرب: يوم ليك ويوم عليك، والشطارة لما ييجى اللى ليك عبى واغرف واملا جيوبك قبل ما الزمن يقلب عليك ويشربك المر كاسات _القوس: امشى عدل يحتار الخايب فيك، ولو كنت انت الخايب امشى على السطر عشان لا تحير نفسك ولا تحير الناس معاك. _الجدى: اللى ما يرضاش بالخوخ يرضى بشرابه.. واللى مش عاجبه النهضة يرضى بريحة شرابها. _الدلو: من أمّنك لم تخونه ولو كنت "دلو"، واللى يقدم السبت إديله الاحد والاثنين والثلاثاء، اضحك عليه وخد باقى الأسبوع أجازة. _الحوت: كل يوم بحال، والحب مش على البال.. يا سيدى رقّ شوية.. يا "حوت" بص "للميزان" بنظرة حنية.