يا تكون محظوظ يا تكون منحوس.. حظك عندنا فى هريدى نيوز.. ولو بختك طلع مايل.. إوعى تضرب بوز.. الحمل: اللى بيته من إزاز ميغيرش هدومه فى الصالون.. وحبيبك هيرضى عنك لو ساعدته فى أنه يكتشفك "يا غامض". صحيا: فرج ربنا قريب يا يرزقك بأكلة كباب أو تموت قبل ما تدوقه. الثور: قال يا خبرالنهارده بفلوس.. بكره ينزل عليه أوكازيون، خليك فى حالك وما تدخلش فى اللى ما يخصكش. صحيا: الحياة ياما فيها بلاوى والهدوم بتدارى. الجوزاء: بداية من بكرة نقدر نقولك المرحلة الصعبة عدّت خلاص، واللى جاى أحلى من اللى راح.. وزغرطى بقى يا انشراح. صحيا: لو طلعت لك حباية فى وشك ما تفكرش تشيلها بمطواة.. فكر فى حل عملى لأنها ممكن تطلعلك تانى فى حتة تانية. السرطان: اطبخى يا جارية الأنبوبة فاضية يا سيدى، ولا تعايرنى ولا اعايرك النهضة طايلانى وطايلاك.. استحمل كله فى الهم سواسية. صحيا: هتخس تلقائيا.. الصيف جاى والعرق كتير، وما فيش مراوح ولا تكييف، فكر تلبس قطن، وتقعد مع العيلة فى نفس الأوضة. الأسد: مسير الحى يتلاقى.. خليك مستنى الفرصة المناسبة عشان تطلع كل اللى فى قلبك وعقلك، بس ابقى قولّنا ناخد ساتر. صحيا: الكسل ما بيضرش إلا صاحبه، ولو مستنى تاكل هيقولولك ما فيش. العذراء: حلو وعذراء من يومك.. اسم الله عليك ملو هدومك.. بس بلاش نفخة كدابة عشان ما تقعش والحتة اللى على الحبل تتوسخ. صحيا: يوم رائع، اشرب عصائر وكل فاكهة. الميزان: الصلح خير.. وانت برج هوائى يعنى محتاج "ريسيفر" كويس عشان "يلقط" الإشارة وهى طايرة. صحيا: يا ريتك كنت أسد.. أهه ترابى وبيفهم ومستنيهم يجيبوله الأكل لحد عنده، أما انت تاكل الجميع وتقعد جعان. العقرب: الباب اللى يجيلك منه الريح.. شيله وركب باب مصفح.. اعمل أى حاجة تحافظ بيها على مصالحك وحياتك. صحيا: كل أى حاجة من أى حتة، ما فيش أى تسمم هيأثر فيك إنت "عقرب". القوس: المركب اللى فيها ريسين يا تركّبلوها جناحين يا تشيلوها وتعوموا انتو الاتنين.. جرب تركب عجل. صحيا: ولا ملوخية نافعة ولا كفتة ولا فراخ، شكلك ناوى على الرحيل "للدار الآخرة". الجدى: يا داخل بين البصلة وقشرتها.. ما ينوبك إلا "فشرتها".. إحنا فى أول أبريل والكدب منتشر.. اركن على جمب. صحيا: ارتفاع الضغط قد يكون سببه إنك زى كل الناس دلوقتى.. مش فاهم حاجة خالص. الدلو: اللى تقول عليه موسى ممكن جدًّا يكون فرعون، وابن فراعين.. ما تصدقش كل أحاسيسك النهاردة. صحيا: شرب المية الكتير ممكن يخليك تدلدق يا "دلو". الحوت: قليل الأصل لا تعاتبه ولا تلومه.. عايز تجننه خبى منه هدومه.. طيب زيادة عن اللزوم، بس ما ينفعش ينضحك عليك. صحيا: ارحم السمك من الافتراس طول الوقت.. جرب الجمبرى.