يتكون محظوظ يتكون منحوس، مع بختك اليوم من هريدى نيوز.. _الحمل: باب النجار مخلع.. والشبابيك وما تدورش فى الدُّرف.. هى كمان مخلعة.. شوفلك شغلانة تانية. _الثور: دايما.. طموح طموح، ما فيش هدوء واستكانة وتسمع أغانى شعبى.. أرشحلك أديك فى السقف تمحّر.. أديك فى الأرض تفحّر. _الجوزاء: اللى يعاديك تعاديه وتفرجه فنونك.. واللى يراضيك تراضيه وتشيله فى عيونك. _السرطان: الناس عايزة إيه.. الناس بتعمل إيه.. عين صفرا والتانية حمرا.. اشرب مية بسكر وهات طاسة الخضة. _الأسد: لو هما ثعابين فأنت أسد.. وافتكر إن آخرتهم جزمة أو محفظة وكبيرهم شنطة.. ما تكبّرش العيل يصغّرك. _العذراء: الرقص فن حتى الرقص على السلالم ما بين فوق وتحت.. وأنت فنان لاعبهم على الشناكل. _الميزان: ساكن قصادى وبحبه، ويا اما القمر على الباب نور قناديله.. يا اما أرد الباب ولا أناديله.. ابعتله إس إم إس وريّحنا. _العقرب: يا أصلى ياللى ما فيش منك فى الدنيا كتير.. فكك من النفخة واعد جمب اصحابك وراسك براسهم. _القوس: كل يوم بحال، ودوام الحال فى عز النهضة شىء أكيد.. لا مية ولا نور، وحر كتير.. هتنهبوا؟!! _الجدى: أز أز كابوريا لو أزأزوك هتأزأز إيه.. أبوك قالك ارمى الشبكبك.. أمك قالتلك لا البحر ياكلك.. طالما هما مش متفقين يطّلقوا وانت ترتاح. _الدلو: قبل ما تنام فيه حاجات لازم تعملها.. تغسل إيدك وتغسل وشّك وتغسل رجلك من ريحة الشراب. _الحوت: أهم حوت فى التاريخ بلع "نبى"، لكن ما فيش حوت بلع مال النبى.. ادّى الحق لاصحابه وحقك هيجيلك لحد عندك.