بصراحة راجل لحظة ضعف, وقف قدام الدنيا بصدره, إكتشف القوة بكسر ضلوع, بكتب لك وأنا وبرغم الأنف بقيت بيبان إن أنا موجوع الراجل يا حبيبة المشوار, كما جبل التلج, محتاج الشمس تكون ع الأرض عشان ينهار محتاج لكيان يدي له الصبر, الراجل جدر, مع إنه الأصل لكن موصوف على إسم فروع والمعجزة لما بتحصل, يبقى الإعجاز فوق قدرة كل الكون, وبيصعب ع الإنسان في الضيقة الصدق, وإن كرامته تهون, بتبور الأرض وتتجرّف لما الإحساس بالشيء بيخون الراجل لما يقابله العجْز بيكره نفسه, بيعمل حاجة من الإتنين: يا بيفتح جرحه زياده لحد ما يطبق بيه على نفس الدم, يا بيضعف قدام أول حضن بيخطر على باله إنه يضم على فكرة: أول ما بيخطر على باله, له عنده تاريخ, له فيه أقوى العضلات أضعفها إن جيت للحق "القلب" فاكراه؟ "القلب في أي علاقة ما بين إنسان وجماد.. موجود على شكل شروخ البويا في بطن جدار الناس ناسياه" وماتتخضيش على نفسك مش شايفك كده, لأ, أنا بس بوضح وجهة نظري بشكل أدق... يا حبيبة قلبي تاريخنا طويل, مليان بوقوع ووقوف, ودراع متشكشك عرقه بشبكة صيد رجلين فراشات حقن المحاليل لو كان الحب ده بالسّاهل, عمري ما كنت أضعف قدامك, كنت ساويتك بفصيلتك, شكلك وقوامك الراجل منّا يا ست الحسن, مايشوفش الحسن في ساعة الحزن بيشد على القلبين في الحضن, مش شهوة جسم تعب من دق الدنيا عليه مهدود بيخبي ضلوعه في ضلع كإن إيديها السحر, هيوجد بعد ما يمحي وجوده بإيده وجود... الراجل لو جالك ينزف, محتاجك درع, محتاجك ضرع, يسقيه ميّا-ه- محاياه, يحيه من غير ما يموت! يحتاجك وقت ما يخرس, صوت, يحتاجك لما يفوته القطر, تقولي هنوصل, نتمشى, غرقان يتعلم عوم, موهوم إنه بيتعلّق على قشّة, طوّلت عليكي, أنا آسف, كاتب في قصيدتك مليون موضوع, ما أنا قلت من الأول بكتب, بكتب لك شعرك وأنا موجوع. ::::::::::::::::::::::::::::::::::::::::::::::::::::::::::::::::::::::::