كل الناس بتتكلم دلوقتي عن الرئيس القادم , و الكل بيحاول يجتهد في إكتشاف كل مرشح للإختيار بينهم , ما عدا الستات .. سابوا كل حاجة و ركزوا في إختيارهم للرئيس القادم على حاجات ماتخطرش على البال ولولا إني سمعت الكلام ده بنفسي من جوة قعدة ستات مكنتش هصدق , ودلوقتي هبدأ اكتبلكم كل كلمة اتقالت . مبدئيا الستات اللي كانوا في القعدة دي كانوا مجتمعات في أحد النوادي الشهيرة بمصر الجديدة , قعدين عل ترابيزة كبيرة في الجنينة حوالي الساعة 11 صباحا , أعمارهم تراوحت بين ال 30 وال 45 وبدأت الحوار واحدة فيهم بعد ما قطعت كلامهم عن الزحام ومشكلة البنزين فقالت : على فكرة يا جماعة انا مش هاممني قصة البنزين دي ولا الزحمة ولا مين بيصفي حساباته مع مين , انا كل اللي هاممني إن الرئيس اللي جي يكون ( مز ) كفايانا المناظر اللي بنشوفها , صاحبتها ردت : هههههههه يا سلام هوة كل ميزات الرئيس إتظبطت وإتوفرت ولقينا واحد كامل المعاني لما نشرط عليه يكون ( مز ) ! .. بعدين هوة إنت هتناسبيه ؟ فردت صاحبة الفكرة قالت : وليه لأ انا أبوية شغله الخاص يغري أي حد يشاركه وكالعادة هيجيلنا رئيس فجعان سلطة وفضلاتها .. ردت الصديقة : طيب لو أبو إسماعيل هوة اللي مسك الرئاسة هتنمري عليه برضه ؟ .. يوووووه ده هوة ده اللي لازم تنمري عليه .. الرجالة اللي من النوع دة جعانة ستات ومحرومة .. بالعكس .. ده هوة ده اللي الشغل عليه سهل وانا هطمع في أكتر من كدة .. واحد متدين على حسب ما بيقول والمتدينين دول بيبقوا ( حمشين ) وانا يعجبني الراجل اللي من النوع ده بعرف اتعامل معاه والعب في دماغه كويس . واحدة تالتة ردت : عل فكرة إنتي ذوقك متطرف .. أبو إسماعيل ايه ! إمال عمرو موسى نقول عليه إيه ! .. راجل الى حد كبير شكله مقبول .. بيعرف يتكلم .. لبق .. شيك .. هادي وصوته حلو ويعرف يقنع اللي قدامه ده غير انه بتهيألي شخصية قوية .. انا شخصيا بحب الرجالة السياسين ده معناه انه بيعرف يتعامل مع الستات , على الأقل لما أسافر وأقابل الناس يبقوا عارفين ان رئيس بلدي عليه القيمة وابن عيلة مش من الفلاحين ويفضحنا ! بالرغم من اني معرفش عمرو موسى ده من فين اصلا لكن شكله بيقول شغال . صديقة أخرى : يا جماعة انتوا ليه ناسيين إسمه ايه ده ! .. أيوة .. الصباحي .. ايه نظامه دة ولا أبو الفتوح ؟ .. ردت الست الأولى : صباحك فل هههههه صباحي وابو الفتوح ايه دول بيتوتيين تلاقي آخرهم ( ............. ) الرقابة مش هتسمح نكتب الست قالت ايه . صوت واحدة فيهم إرتفع وقالت : يا بنات .. ماله أحمد شفيق ماهو وسيم وشخصية .. صحيح مالوش في الشياكة أوي لكن اكيد وهوة خارج بيلبس كويس وسنه مناسب يعني لسة فيه الرمق كدة يشرف قدام العالم .. بحسه محنك ذكي .. صحيح عينه فيها صرامة وغموض لكن أنا بحب الراجل الجامد وبتهيألي هيعرف يمسك البلد كويس بس انا قلقانه منه عشان كان عايش في دور مش عايز وطمع في الآخر هههههه الظاهر قال إشمعنى . ردت واحدة تانية قالت : يا خوفي شفيق بتاعك ده يقول فيه وفي الآخر يطلع مفيش هههههههه على رأي منير .. طيب يا بنات ما تيجو نرشح حد على مزاجنا .. ننزل التحرير بدعايا جامدة لواحد لينا فيه مصلحة واهو نضمن نبقى حريم الرئيس بس إوعوا نختلف مع بعض في الآخر على راجل آخره يتخلع بثورة هههههههه . ودلوقتي .. قرينا مع بعض نظرة بعض الستات في إختيار الرئيس القادم , يا ترى .. إنتوا ليكو نفس النظرة ولا ليكم راي تاني ؟ .. في الحالتين قولوا رأيكم وتواصلوا معانا على هذا البريد محمى من المتطفلين. تحتاج إلى تشغيل الجافا سكريبت لمشاهدته.
