حديث المدينة

مفيد فوزى : الحوار مهنتى ولقاءات الناس حرفتى والتسجيل تحت الشمس الحارقة متعتى لماذا لان ده استوديو الشارع بقابل الناس فى الشارع وبقعد مع الناس فى الشارع اتحدث اليكم من استديوا لشارع حيث قابلت وجوها لها قضايا ولها ايضا مشاكل ولها ايضا رغبات وربما لها احلام لماذا نقابل هؤلاء لانهم بسطاء ربما لا تهمهم على الاطلاق الظهور على الشاشات ولكن بيطلعوا اللى فى قلبهم احاول اطلع اللى عندهم احاول استوعب ما استطعت الى ذلك الدموع اللى ممكن تخرج من عيون البعض بحاول اشوف ابتسامات نا س معذبين واشوف الرضا اللى ربنا مديه لهم بحاول اقرب من نا س احترفت مهن غريبة ربما لا يمكن احد يتصور ان فيه مهنه تمسكها ست ومع ذلك استوديوالشارع يستوعب كل هؤلاء لان هؤلاء فى نهاية الامر هم حديث المدينة التحقيق صوت وصورة فى حديث المدينة
من استديو الشارع محاور وعدسة وبرنامج
فاصل
مفيد فوزى : أحمد شاب 16سنة مشكلتة شديدة الخصوصية مشكلتة طبية هذا الشاب وده اللى زهلنى ليس له فتحة شرج زى بقيت الناس فى الكون ده كلة وليس له وهو راجل
عضو تناسلى زى بقيت البشر فى الكون ده كله , وراح لندن وقالوا له هناك انك انت مشكلتك تحتاج الى اجراء عملية ويبدو ان العملية مكلفة للغاية أنا مش عايز ادخل فى التفاصيل لانى مش هعرف اتكلم بحرية فى التفاصيل لكن اسمعوا والدتة بتقول ايه وبعدين نكلم احمد نفسة ايه المشكلة الحقيقية اللى عند ابنك احمد
والدة احمد : بسم الله الرحمن الرحيم والسلام عليكم ورحمة الله وبركاته انا ولدت احمد ابنى من 16 سنة فؤجت ان هو قالوا لى لا ولد ولا بنت فى مستشفى تلا منوفية
مفيد فوزى : يعنى انتى لما سألتى قلتى انا جبت ايه ؟
والدة احمد : اه
مفيد فوزى : ولا ولد ولا بنت قالوا ايه ؟
والدة احمد: اه قالوا لى مش عارفين يا ست انت لا جايبة ولد ولا بنت انتى جايبة انت جايبة بنى ادم منعرفلوش اى حل دلوقتى واحنا هنطلعة على مستشفى طنطا الجامعة ليعملوا فتحة يخرج اللى جواه
مفيد فوزى : ايوه كتبوا ايه فى شهادة الميلاد ؟
والدة احمد : قالوا ما تكتبيش دلوقتى الا لما نشوف ونعمل له عملية ونشوف ان كان ذكراو انثى
مفيد فوزى : وبعدين ؟
والدة احمد : قعدت ثلاث سنين من مستشفى ابو الريش للمستشفى الجامعى لمستشفى المنصورة الدكتور محمد غنيم الله يبارك له بتاع مستشفى المنصورة قال لى ابنك جنس ثالث لا ولد ولا بنت ودى هدية من عند ربنا تقبلوها ويا بختكم عند ربنا انكوا تكونوا راضيين بعد منها بحوالى 10 - 15 يوم الوالد توفى
مفيد فوزى : والده
والدة احمد : والده هو توفى بدأت رحلتى مع احمد من مستشفى ابو الريش
مفيد فوزى :احمد ابنك الوحيد
والدة احمد :أ ه معايا اثنين كمان غيره وبنت
مفيد فوزى : طبعيين ؟
والدة احمد :الحمد لله والشكر لله الحمد لله متفوقين جدا وشطار واحمدمتفوق وناجح فى ثالثة اعدادى وداخل اولى ثانوى
مفيد فوزى : انا شايف ان احمد والكاميرا هتجيب شنبة اهو يعنى في شنب اخضراهو
والدة احمد : الحمد لله الحمد لله
مفيد فوزى : تحت مناخيرة راجل
والدة احمد : الحمد لله
مفيد فوزى : طب بيعمل ايه فهمينى اكثر؟
والدة احمد : الحمد لله واحنا حضرتك كل مستشفى ندخلها نفتح له كلستومى فى بطنة لحد مايقولوا الاعضاء بتاعة جسمة تكتمل على ما نشوف ان هو اعضائة اكتملت لحد اربع
سنين بعد ما والده توفى انا رحت مستشفى القوات المسلحة دكتور حمدى العشرى ا لله يبارك له كان في خبير من نفقته الخاصة
مفيد فوزى : قال ايه الخبير ؟
والدة احمد :الخبير قال لى ده ذكر جنس ثالث ده واد بس جنس ثالث لانه ليه علامة الذكور وفيها شلل رباعى وده محتاج سفربرة يعمل له عملية لان عنده فقرة الاحساس والاعصاب
موجودة وعنده البول والبراز مختلطين ببعض
مفيد فوزى :اه يعنى اسمحى لى اقف ثانية واحدة
والدة احمد : اتفضل حضرتك
مفيد فوزى : يعنى انا من الناحية النفسية البحته مش عارف انا بقول للناس يعنى هل مفروض ان انا اسجل معاها لوحدها بغير وجود الولد وهل الكلام اللى بتقولة هى ده هل له تأثير نفسى على الولد يعنى فهمينى ؟
والدة احمد : الحمد لله مأساة لوحدها ثانية طويلة ان انا خليت احمد الحمد لله راضى وبيصلى وعارف ربنا وعارف انه ملوش زواج وعارف ان هو حاجة نادرة خالص فى مصر
مفيد فوزى : معندوش هو دلوقتى عندة 16 سنة
والدة احمد : اه
مفيد فوزى : معندوش اى ميل نحو الجنس الاخر
والدة احمد : يعنى هو يرد على حضرتك
مفيد فوزى : رد علي
والدة احمد : بس بصراحة يا احمد
مفيد فوزى :اه قول يا احمد
احمد : لأ هو يعنى الصراحة معنديش
مفيد فوزى :اه
احمد : انا بصراحة يعنى ساعات شوية انما ساعات
مفيد فوزى : ساعات ايه ؟
احمد : يعنى ساعات
مفيد فوزى : تسطلطف بنت
احمد : اه ساعات استطلطف بنت كده بس ومن صغرى كمان بس انا الحمد لله ما ببصش لهم قوى علشان يعنى حرام اصلا كدة يعنى فبمشى بالدين يعنى والحمد لله يعنى راضى باللى ربنا اداه لى
مفيد فوزى : وانت شاعر انك انت يعنى انتى بتعيطى ليه ما تسيبى الولد يتكلم علشان يبقى على راحته وانت فاكرة ان دموعك دى هتفيدة
والدة احمد : تعبت يا استاذ فوزى انا ما قعدتش فى البيت اسبوع على بعضة وعندى ولادى مظلمومين معانا
مفيد فوزى : معلش احنا بنتكلم اهو وبعدين كمل
احمد : بس يعنى كل لما ساعات اشوف بنات يعنى استطلطفهم وكدة بس الحمد لله بغض بصرى وبمسك نفسى الحمد لله يعنى
مفيد فوزى : ما انت يعنى معنى كدة انك انت عندك رجولة
احمد : عندى الحمد لله
مفيد فوزى : وهو ممكن جدا انه لكن مش ممكن ابدا يبقى بنت
والدة احمد : لالالالأ خالص خالص
مفيد فوزى : يعنى المشكلة
والدة احمد : قالوا لى فى لندن هو الحمد لله الذكورة يعنى هو واد بس ربنا سبحانه وتعالى مركبة كدة هى تركيبته فيه كده الحمد لله
مفيد فوزى : وانت شايف انه يعنى تتمنى ان العملية تحصل وتبقى لك ذكورتك زى كل راجل ؟
احمد : اه طبعا الحمد لله بس انا يعنى انا راضى باللى ربنا اداه لى والحمد لله بس انا بتمنى يعنى بس اصل العملية تكاليفها كبيرة قوى والحمد لله انا راضى باللى ربنا قسم لى بيه
مفيد فوزى : يعنى معنديش تعليق اقولة غيرانه احيانا يحدث ان انسان يبتلى بشئ ولكن الرضا الرضا القناعة بهذا الابتلاء بيبقى يعنى تكوين داخل البنى ادم نفسة دى مشكلة غير عادية ذكر ومش مفهوم اذا كان ذكر والا انثى ذكر واعضاء الرجولة لسة ما طلعتش ويمارس الحياة وعنده رغبة شديدة ان هو يعنى يبقى له رجولتة يعنى عملية الحقيقة معقده يمكن اول مرة فى حياتى بأقابلها ومع ذلك الرضا والتسليم بقضاء الله والتسليم بقضاءه اى ان كان واضح انه يسيطر على الام الباكية وهتفضل باكية باستمرارلانها ....
والدة احمد : استاذ فوزى
مفيد فوزى : نعم
والدة احمد : على فكرة احمد مسمينه الطفل البكى
فاصل
مفيد فوزى :دكتور محمود فليفل مدرس مساعد بالجراحة بجامعة الازهر فرع دمياط مشكلتة انه عاوز يبقى يترقى يبقى مدرس ما يبقاش مدرس مساعد الاستاذ اللى هو بيرعى ده الترقية بعد ما سافر محمود فليفل بره ونجح واتحرك واظهر نبوغه وتفكيرة وازداد من علم العظام ومن الجراحة الاستاذ بتاعة اتغير 180 درجة طلبنا من الاستاذ يتفضل مشكورا ويجى علشان الطبيعة العمل التليفزيونى انى انا اسمع صرخة واسمع رأى الاستاذ علشان يقول الحقيقة الاستاذ رفض يا ترى المشكلة دى اللى بتحصل فى جامعاتنا وبتحصل فى كلياتنا بتتكرركثير لية هل فيه عقد معينة من بعض الاساتذة للمدرسين للمعيدين للشبان اللى بيبتدوا حياتهم شئ يحتاج الى فهم بعث لى جواب فى حديث المدينة وقال لى من فضلك اسمعنى ادينى جاى اسمعة عاوزك تقول لى ليه الاستاذ الدكتور المشرف عليك اتغير 180 درجة
د/ محمود فليفل :بسم الله الرحمن الرحيم استاذ مفيد انا يعنى حاولت جاهدا انى اعرف هو ليه اتغير انا مش عارف اوصل للحقيقة انا دلوقتى اتخرجت فى كلية طب تقديرى جيد جدا من الناس المتفوقين اتعينت نائب تحت التمرين فى مستشفى الجامعة فى مستشفى الزهراء الجامعى فى العباسية خلصت النيابة بتاعتى الناس كلها مبسوطة منى معنديش اى مشاكل ما اخذتش يوم اجازة واحد فى حياتى اتعينت مدرس مساعد جراحة العظام فى كلية طب الازهر فرع دمياط وهى كلية حديثة وكنت سعيد ان انا رحت مكان هادئ ومكان كويس
سجلت الدكتوراه فى تشوهات العظام هذا التخصص غير مشهور بدرجة كافية هناك قالوا لى احسن حاجة تروح تسجل مع استاذ من القاهرة اللى بيسجل الحاجات دى كل يوم وكان حظى كويس ان انا سجلت مع الاستاذ الدكتور جمال حسنى اللى هو مشهور جدا فى تشوهات العظام وبيشتغلها بكثرة اخذت بعثة داخلية وانقطاع من دمياط مدة ثلاث سنوات قعدت مع الاستاذ الدكتور جمال حسنى ليل نهار وانا قاعد معاه شفت حاجات غريبة شفت ناس بتيجى من السعودية وتتعلم ناس بتيجى من الاردن ناس بتيجى من الهند فبقيت سعيد وانا مع الراجل وتتعاقب علي الدكاترة من كل البلاد لقيت واحد جاى من روسيا مسجل دكتوراة فبقيت مبسوط اشتغلت مع الدكتور جمال كويس قالى انت دلوقتى مستواك وصل لدرجة كويسة لكن انا نصحك نصيحة ان انت تروح لمنابع تشوهات العظام روسيا اللى اخترعت جهاز( اللازيراوف) اللى انا شغال عليه رحت روسيا على حساب الجامعة اخذت بعثة خارجية وطلعت من روسيا ورحت امريكا فيها اكبر مركز لتشوهات العظام فى العالم فى مستشفى سيناى هوسبتل - رحت ايطاليا على حسابى عند "كتانى" وهو من اشهر الناس فى تشوهات العظام بعد لما لفيت اللفة دى كلها الراجل بتاع امريكا اسمة جون هرزن برج - شاف الرسالة بتاعتى اعجب بيهاجدا يا محمود انا عايز ا كتب اسمى معاكم فى المشرفين على الرسالة وافق جميع المشرفين ما عدا الاستاذ الدكتور اشرف التابعى اللى هو استاذ جراحة العظام فى دمياط اللى مشى راضى يناقش لى الدكتوراه دلوقتى
مفيد فوزى : ليه ؟
د/ محمود فليفل : اول لما رفض وجود الاستاذ الدكتور جون هيرزن على الرسالة انا حسيت بزعل جامد جدا
مفيد فوزى : فى بينه وبينك اى خصومات شخصية ؟
د/ محمود فليفل :انا لقيت بعد لما رجعت
مفيد فوزى : رد على السؤال ما تتفرعش فى متاهات؟
د/ محمود فليفل :طيب
مفيد فوزى : فى بينك وبين الاستاذ الدكتور اشرف التابعى
د/ محمود فليفل :اسمه اشرف التابعى عز الدين
مفيد فوزى : مع كل الاحترام ليه هل هناك بينك وبينه خصومات؟
د/ محمود فليفل :في تعنت ضدى معرفش ليه
مفيد فوزى : ما السبب فى هذا التعنت
د/ محمود فليفل : اهو احنا كنا كويسين جدا قبل ان اسافر بعد لما رجعت من السفر من امريكا ان لقيت وش ثانى خالص
مفيد فوزى : قول لى يارجل لماذا ؟
د/ محمود فليفل :انا مش عارف
مفيد فوزى : قولى التفسير عندك
د/ محمود فليفل : والله ما اعرف يا استاذ مفيد نفسى اعرف ليه هو مش راضى يوافق على رسالتى نفسى اعرف متقصدنى ليه يعنى الجدول بتاعى ضعف جدول زمايلى السفر بتاعى لدمياط مرتين فى الاسبوع زميلى بيسافر مرة واحدة
مفيد فوزى : شكلك مش عجبة
د/ محمود فليفل : تقريبا
مفيد فوزى : شكلك مش عجبة
د/ محمود فليفل : انا مش لاقى حضرتك سبب
مفيد فوزى : اعمل ايه طيب سؤال
د/ محمود فليفل :اتفضل
مفيد فوزى : ليه لما طلبنا منه فى حديث المدينة انه يجى علشان يقول وجهة نظره اعتذر
د/ محمود فليفل : انا لو حاسس حضرته مع احترامى له وهو استاذى لو موقفة قوى كان جه معايا ويجى يقف اما الاستاذ مفيد فوزى ويقولة يا استاذ مفيد الراجل ده مش راضى يناقش له ليه ما هو يقول مش راضى يناقش لى ليه وانا ارد امام حضرتك
مفيد فوزى : خلينى اكون معاك صريح
د/ محمود فليفل : نعم
مفيد فوزى : هل ممكن ان يحدث لك ازى بمجرد نشر او اذاعة هذا البرنامج ؟
د/ محمود فليفل : طبعا وقد حدث بالفعل وهو دلوقتى بيلف فى المستشفى كلها وبيقابل الاستاذ فلان من قسم الجراحة وقسم الباطنه وقسم الاطفال يقولة امضى ان محمود وحش وبه كذا وكذا وكذا
مفيد فوزى :ليه يا ابنى انت عامل ايه؟
د/ محمود فليفل :انا قابلت استاذ
مفيد فوزى : الله هو انت ارهابى ؟
د/ محمود فليفل : لأ الحمد لله
مفيد فوزى :يعنى فهمنى فهمنى امال مشكلتك ايه يعنى قلت شكلك مش عجبة انت مش ارهابى لقيت كل ده من اجل تشوهات العظام علشان تضيف قيمة اشتغلت مع جمال حسنى رحت امريكا سافرت روسيا منابع ده انا نفسى افهم ايه اللى ممكن يعطل انسان لدية كل هذه القدرة على البحث امام كلمة تصدر من استاذ انا نفسى اعرف باى حق يكون مستقبلى كله مفيد فوزى :شكيت لمدير انت عندك عميد كلية ؟
د/ محمود فليفل : عندى عميد كلية
مفيد فوزى : مين عميد الكلية ؟
د/ محمود فليفل :الاستاذ الدكتور مجدى صقر العشماوى
مفيد فوزى :هل شكوت للدكتور مجدى العشماوى ؟
د/ محمود فليفل :شكوت له
مفيد فوزى : ماذا قال ؟
د/ محمود فليفل : قالى انا هكلمة لك فى التليفون وحاول التوسط اكثرمن مرة علشان خاطرى وناقش له والناس كلها بتناقش
مفيد فوزى :هل لجأت الى من مدير الجامعة؟
د/ محمود فليفل : استاذنا الفاضل الاستاذ الدكتور احمد ا لطيب
مفيد فوزى : احمد الطيب رئيس جامعة الازهر رحت له مكتبة يا اخى انا شايف انا باعتقد ان احمد الطيب بلدينة هو من الاقصر عارف ا لاقصر بلدنا بلد سياح
د/ محمود فليفل : تمام
مفيد فوزى : الراجل ده راجل عقلانى واقدر اقول عليه بالفم المليان انه راجل فهمان هل شكوت له على ورقة ؟
د/ محمود فليفل : شكوت له على ورقة
مفيد فوزى : ماذا قالت الورقة ؟
د/ محمود فليفل : قابلتة واستقبلنى احسن استقبال
مفيد فوزى : اه وبعدين
د/ محمود فليفل :وحول الورقة للشئون القانونية للمستشار القانونى فى الجامعة قال لى انت هتأخذ حقك ما تخفش مفيش حد هيظلم وانا رئيس الجامعة قلت له جزاك الله خير ورحت للشئون القانونية استاذ مفيد فى حد يعمل رسالة ست سنوات المشرف اللى المفروض يشوفها كل يوم مش راضى يقرأها خالص مش راضى يقرأ الرسالة او يمسكها اصلا فى ايديه لما رحت الشئون القانونية
مفيد فوزى : ليه ؟
د/ محمود فليفل : قالوا لى ما بتقرأش الرسالة لية يقول لهم ده لسه ما عملش الرسالة الدكتور جمال حسنى يطلبة فى التليفون يقوله انا رجعت الرسالة حالة الراجل ده عمل 150 حالة حط بس فى الرسالة بس اللى البرتوكول قال عليه 50 حالة
مفيد فوزى :يا دكتور يا دكتور اشرف التابعى انت رجل قيمة فى الجامعة محمود فليفل ده زى ولادك اقف بجانبة ادى له حقة ما ترفضش واذا كان عندك وجهة نظر من فضلك تعالى قولها لى قولى بوضوح ان الراجل ده فاشل قولى بوضوح ان الرسالة دى مش صحيحة قولى اى شئ يخلينى فى النهاية اقتنع بموقفك انما ما تأخذش موقف رافض انا اديتك فرصة انك تتفضل تيجى وتقول لى وجها لوجة ما معنى انك انت تعتذر وترفض والراجل فى الحالات دى وبعدين خلينى اقولك معاك بقى كلام مهم بقى الراجل ده اللى عمال يدور فى العالم على تشوهات العظام عند الاطفال وغير الاطفال مش افضل ان كل الجهد دة يطلع فى البحث العلمى مش فى حرقة الدم اللى محروق بيى
فاصل
مفيد فوزى : العربية اللى انا قاعد عليها دى من الخشب نعم من الخشب 70% خشب و30% صاج وحديد طبعا غريب قوى شكلها الانيق ده انها تبقى عربية خشب ولكن طبعا الاجهزة اللى جوه كلها مش ممكن تكون خشبية لازم افهم من الراجل اللى قعد سنين طويلة يشتغل فيها علشان خاطر تطلع لكن لسه ما حصلش على براءة اختراع نفسة يسوقها نفسة يعمل ثمن يمكن ناس تحب تأخذها يمكن ناس تحب تركب هذه السيارة ربما يبقى ثمنها رخيص وان كنت اتوقع حرب شعواء من شركات العربيات علية المهم انه تامر هذا الشاب الذى قضى سنوات يعمل هذه السيارة بهذه الاناقة بنقف معاه بنقف معاة لانة فكر لانه عمل شكل من اشكال الاختراع لانه تعب وعمل جهد وباقى بس يأخذ براءة اختراع يعنى حد يقف جانبة حد يبص للناس اللى بتعمل جهد وربما هذا الجهد مفيد ربما انه يبقى فيه درجة من درجات الناس تشترى عربية رخيصة بدل العربيا ت وانا هعرف منه كلفته اد اية وهو نفسة يبعها باد ايه بس خلونى ا دخل اقعد فى العربية واحسها تعالى يا تامر خذنى العربية هى واضح ان العربية باب واحد
تامر سلامه : اه هى حضرتك اسبور باب واحد اه
مفيد فوزى :اسبور باب واحد اه اه اية بقى والمصور العدسة هتجيب الحرف ده dtsيعنى ايه ؟
تامر سلامه : اختصار حضرتك بطريقة بسيطة خالص ديكورات تامر سلامه الاسم مش معقد بالنسبة لى
مفيد فوزى : ديكورات تامر سلامة
تامر سلامه : اه
مفيد فوزى :اه اه اه يعنى دى مش ماركة عربية
تامر سلامه : لأ دى اول ماركة حضرتك فى مصر تتسجل دلوقتى
مفيد فوزى : بالمعنى ده ؟
تامر سلامه : بالمعنى ده
مفيد فوزى : يعنى اسمك تامر سلامة اقعد فيه هنا
تامر سلامه : اتفضل حضرتك اتفضل
مفيد فوزى : ده ايه ده يا تامر؟
تامر سلامه : ده سقف خشب حضرتك مدعم من الداخل بحديد مسيف كده
مفيد فوزى : اطلع شوية علشان الكاميرا تشوفك اه
تامر سلامه : ده سقف خشب مدعم بحديد من الداخل خشب من فوق يعنى طبقتين خشب من فوق ومن تحت ومن جوا حديد
مفيد فوزى :اهه طيب الدركسيون
تامر سلامه: الدركسيون دى تارة عادية انا جايب كل حاجة المغذية للعربية عبارة عن التارة والتابلوة طبعا برضه ما لقتش مصنع فى مصر يعملهم لى
مفيد فوزى : اه
تامر سلامه : فبقيت اجيب الحاجة وتعبت فى انى اوفقها جوا العربية
مفيد فوزى : دا ايه ده ؟
تامر سلامه : شاشة سينما شاشة عرض
مفيد فوزى :عرض تليفزيون ؟
تامر سلامه :شاشة عرض اه تليفزيون واسطوانات سى دى -
مفيد فوزى : وده كله ده من الخشب
تامر سلامه : التابلوة ده حضرتك تابلوة بتاع اى عربية بس انا جبتة مختلف مش بتاع اى عربية موجودة فى مصر
مفيد فوزى :ازاى ؟
تامر سلامه : يعنى فى حضرتك ساعات حاجات بتيجى من بره ا ستيراد
مفيد فوزى : اه فبتبقى غريبة مش موجودة يعنى حاجات المانى مثلابس الحاجات دى ما بتنزلش الفئات بتاعتها فى مصرالعربية دى مكيفة ؟
تامر سلامه : العربية دى مكيفة اه
مفيد فوزى : وجهاز التكييف حطة فين ؟
تامر سلامه : جهاز التكييف مع الموتور ادام عادى
مفيد فوزى : انت نفسك تبيع العربية دى بكام
تامر سلامه : والله حضرتك هو جالى فيها سعر عالى جدا بس
مفيد فوزى : كام ؟
تامر سلامه : يعنى انا نفسى احسن من البيع انى أاخذ براءة اختراع واصنع للناس
مفيد فوزى : الله وافرض اخذت براء ة اختراع ما انت فى الاخرهتبعها نفسى اللى انا متخيلة كام اللى انت نفسك تبيع به العربية؟
تامر سلامه : يعنى نفسى ابيعها باكثر من مليون جنيه
مفيد فوزى : ومين هيشتيرها منك بمليون جنية؟
تامر سلامه : حضرتك انا مش هبيعها للناس هنا بمليون جنية
مفيد فوزى : امال هتعمل ايه؟
تامر سلامه : هى دى فعلا علشان جبته لي شئ مجزى يعنى فى ناس قدروها باكثر من مليون جنية بكثير
مفيد فوزى : كلفتك اد ايه لغاية دلوقتى ؟
تامر سلامه : كلفتنى بالضبط 100000 جنية كتجارب بس طبعا لما جت الناس تسألنى تعملها لنا بكام قلت لهم تتكلف من 30 الى 50 الف جنية العربية وبموتور اقل من كده سى سى لان الناس اللى هتصرف على موتور 1000 سى سى ففى مواتير اقل من كدة نقدر نتحكم فى الاحجام فى الشكل وفى الوزن اننا نعمل مثلا حجم اصغر وموتور اقل نعمل حجم احسن بيبان قلاب مثلا فوق فتحة سقف نقدر نعمل
مفيد فوزى :البيبان ده ايه خشب
تامر سلامه :خشب برضه من برة ومن جوه الفرش ده خشب حضرتك ملون بالدوكو ومرشوشه فرن زى اى عربية الخشب كلة متعالج من برة ومن جوه بمواد البوليستر ضد الميه
مفيد فوزى : ليه عملتها عربية اسبور؟
تامر سلامه: والله لانى لقيت المفضل فى العربيات الغالية اللى بتيجى ما بشوفهاش فى مصر اللى بتبقى باب واحد ا سبور فدى مفضلة عن غيرها
مفيد فوزى : دا دى يركبها عارف مين حسين فهمى
تامر سلامه : ممكن
مفيد فوزى :احمد السقا
تامر سلامه : ممكن
مفيد فوزى : في نوعيات من الناس كده انا احب انهم يركبوا العربيه دى
تامر سلامه : يحبوا الحاجات دى قوى
مفيد فوزى : اه
تامر سلامه : والناس العادية برضه او الناي بتاعتنا اعمل لها برضه الحاجة اللى تناسبها
مفيد فوزى :اه لكن من الخشب
تامر سلامه : من الخشب
مفيد فوزى :هل انت طلبت تسجيل براءة الاختراع بتاعك ؟
تامر سلامه : انا رحت بالفعل سجلت داخل دلوقتى فى حوالى سنة
مفيد فوزى : محدش سال فيك ؟
تامر سلامه : محدش حتى مفيش قالى اى تعبير مفيش اى حاجة كانى مش موجود حضرتك اكنى مليش اى وجود رغم اعجاب الناس بيها والحمد لله يعنى انا ماكنتش متوقعة وتشجيع الناس لي وتشجيعهم فى السفرانى انا اسافر بره ناس كثيرساعدونى بس انا نفسى ابقى هنا حضرتك نفسى اصنع للناس هنا نفسى كنت اوجد ماركة انا سابقت احاول اعمل
شئ ما كنتش متوقعة يطلع بالشكل ده بس حاول ان انا ابدأ اصنع عربية فى مصر ماركه مصرية
مفيد فوزى : ا نت دراستك ايه ؟
تامر سلامه : معايا دبلوم فنى حضرتك دبلوم فنى صنايع
مفيد فوزى : اشتغلت ؟
تامر سلامه : شغال فى مهنة النجارة والنحت
مفيد فوزى : النجارة والنحت ؟
تامر سلامه : ابا عن جد طبعا يعنى انا متعلمها من والدى وكده واخواتى فى نفس المهنة اشتغلت فى التماثيل فترة فى النحت وانحت ا جسام عربيات فى المحلات وكدة لحد ما وصلت انى اعمل نموذج حى ويمشى بدل ما اعملة مجرد ديكور على محل انى انا احولة الى نموذج حى يمشى
مفيد فوزى : الموتور مصنوع من ايه؟
تامر سلامه : الموتور الموتور ده دلوقتى احنا ما بنصنعش الموتور يا ا ستاذ مفيد احنا بنصنع الهيكل كامل للعربية بتصميم جديد احنا بنصممة بصممة بنفسى وبصنعة بأيدى الموتور ما نقدرش نصنعة
مفيد فوزى : يعنى انت اللى جوه المصنع ؟
تامر سلامه : اه
مفيد فوزى :مصنع اية بقى
تامر سلامه: بالنسبة للعربية المصنع الكبوت والسقف والشنطة والبيبان
مفيد فوزى : كل ده خشب؟
تامر سلامه : كل ده خشب ما عدا الموتور والعفشة
مفيد فوزى : هل ببساطة وبصراحة افرض جدلا لا قدر الله ان فيه عربية ما فيه بعض الناس تسرح , وراح داخل فيك وهى خشب
تامر سلامه : هو فيه الميزة اللى عندنا ان نمرة واحد هى امتن من اى عربية صاج وعن تجربة حضرتك يعنى احنا مستعدين لاى تجربة لعربية صاج انها تجرب بالنسبة للمتانة دية انها بتفوق متانة اى عربية صاج ودى ميزة فيها
مفيد فوزى :احنا طبعا يعن باحلم ان حد فى وزارة الصناعة يشوف الراجل ده يعنى عمل براءة اختراع وعربية خشب والصاج جزء منها كبير لما ينساب كدة محدش يسأل فيه يعنى شكلها غريب ده الراجل ده لو كان فى امريكا كانت الامور كانت اتغيرت تماما كان زمانه عمل منها ياما عربيا ت احنا فينا عيب شديد وغريب جدا ان واحد يعمل شغل يعنى ما نسألش فيه وبعدين لما يكون فى حالة بطالة والجماعات تأخذة ويشتغل ضد البلد نقول ليه ايه اللى وداه هو مفهوش مخ هو معندوش مخ هو ملهوش اهل لأ دا الراجل ده اشتغل
وواظب وانا اذا كنت باقدمة وباقدم تامر وسيارته الخشبية باقدم نموذج من واحد فكر مجرد انه فكر وعمل العربية دى وادينى بشوف اهو وقاعد فيها من جوة يمكن الفكرة تروق للناس اللى بيشتغلوا فى وزارة الصناعة لى فكرة احنا ما بنعملش عربيات فى مصر احنا بنركب بس بنجمع لكن ربما يبقى دى نواه لعربية مصرية غير رمسيس بتاعة زمان ممكن ليه لأ فكروا وادوا له فرصة واختبروه
فاصل
مفيد فوزى : ام باسم المهنة سباكه اول مرة ا شوف سباكه دائما الواحد عنده فكرة ان بيجى البيت سباك معاه العدة وشغال ويسفحنا حتة بتاعة كده حنفية عاوزة معرفش ايه 60 جنية معرفش سيفون جرى له اية 80 جنية مش عجبك مع السلامة مشى ويسيبك ان تندعئ والمية تتملى والشقة تتملى ميه مرة من المرات قالو ا فيه شعبة فين حته هتعلم الناس السباكه وتعلم الناس النجارة علشان ما نلجأش للنجار يجى يسفحنا والسباك يبدوان الحياة صعب ولكن الصعوبة ان امرأة تقتحم هذا العالم عالم السباكة
مفيد فوزى : ام باسم بتخشى ازاى البيوت؟
ام باسم : سلام عليكم عليكم السلام السباك بدخل ده حاليا
مفيد فوزى : امال زمان كان ايه ؟
ام باسم : فى التدريب بقى طلعت عن طريق تاجر ادوات صحية عايزين سباك وانا كنت متردده علية باخذ قطع غيار للتدريب يعنى فا راح قال لى ام باسم فيه جية زبون قال انا عايز سباك
مفيد فوزى : مين باسم ده ابنك ؟
ام باسم : ان شاء الله ربنا يخلية
مفيد فوزى : اما ل انت اسمك ايه ؟
ام باسم : سهام حسين مغازى
مفيد فوزى : سهام حسين مغازى اه
ام باسم : اه قال لى اطلعى يا ام باسم شوفى العيوب اللى عنده ايه كانت اول مره اطلع بقى وانا فى التدريب لسة طلعت الحمد لله ربنا وفقنى فى الشغلانه
مفيد فوزى: حصلت رزالات من بعض الناس فى البيوت
ام باسم : لالا ابدا ابدا انا كنت فتحة كوافير وسوبر ماركت ومطعم قبل كدة كان ممكن يكون فيه
مفيد فوزى : كل النشاط ده ليه انت مش متزوجه؟
ام باسم : كنت متزوجه وانفصلنا بقالنا عشر سنين كدة
مفيد فوزى :10 سنين ؟
ام باسم : اه
مفيد فوزى : متزوجتيش تانى
ام باسم : لألأ
مفيد فوزى : وحبيتى بقى انك تستقلى؟
ام باسم : الحمد لله ده بقى استقلت
مفيد فوزى :لازم تقفى على رجليكى وتشتغلى ؟
ام باسم : لازم
مفيد فوزى : ليه اخترتى السباكة بالذات؟
ام باسم : الحقيقة دا فضل من عند ربنا هو اللى ادها لى
مفيد فوزى : ازاى ؟
ام باسم : انا كنت رايحة أاخذ دورة تفصيل وجيت ليا احفاد وانزل اشترى لهم غيارات الاقى الملابس غالية جدا فا قلت لأ بدل ما انا قاعدة فى البيت انا هنزل اخذ دورة تفصيل دخلت الدورة لقتنى حوالى سنة وشهرين لسة ما لم اتقدم قلت لألأ هدور على حاجة ثانى قلت لها يا مدام انا عايزة حاجة بسرعة انا عايزة انتج بسرعة قالت لى على مشروع اغا خان رحت مشروع اخا خان لقيت عندهم بيجهزوا لدورة سباكة انا بقولة عاوزة اقدم على دورة تفصيل قال لى لسة مشغولين فى دورة سباكه الموضوع د ه اتكرر لمدة ست شهور قلت له لما انتوا بتحضروا للدورة ست شهور ويمكن اكثر امال هتدرسوها امتى قال لى لأ
يا مدام دا مشروع ممتاز لتدريب الشباب على المهن للقضاء على البطالة الجملة دى عجبتنى قوى عجبتنى وفعلا انا كنت حاسة انه البطالة كلها فيا قلت له طب انا عاوزة ادخل
الدورة دى قالى ما ينفعش قلت له ليه قال لى انت ست يعنى معظم وقت الست فى المطبخ والحمام بتعمل اى اسعافات على ما تجيب سباك قال لأ انت already هتبقى سباك قلت له ده كدا حلو قوى وقالى هتدخلى البيوت قلت له انا كده فتحت مكوجى وكوافير ومطعم وكنت بادخل البيوت بالمهن دى كلها مش ناقصها تبقى سباك يعنى والحمدلله رب العالمين بعد الدراسة وبعد التخرج من الدورة وبعدالشغل ا كتشفت ان انا درجة اولى سباكة
مفيد فوزى : ورينى العدة بتاعتك ايه قولى لى ده لاية وده لاية وده لاية ؟
ام باسم : هو فيه حاجات انا اخترعتها
مفيد فوزى : اه اه
ام باسم : فى حاجات انا اخترعتها للتيسير فى شغلى
مفيد فوزى : كل ده شغل السباكة؟
ام باسم : دا كل ده لأ فيه اكثر كمان فيه معدات اثقل دى بس عينات كدة علشان ايه
مفيد فوزى : اه اه
ام باسم : فيه مثلا
مفيد فوزى : تقدرى تنصحينى على حاجة فى البيت اعملها؟
ام باسم : بالنسبة لايه يعنى ؟
مفيد فوزى : بالنسبة لايه علشان مش عايز سباك انا انصحينى اعمل ايه فى البيت ؟
مفيد فوزى : اذا كان عندك ضغط الميه قوى جدا اقفل المكبس ا لضغطة نص اذا كان ضغط المية زيادة علشان الناس تعرف اذا كان ضغط الميه جامد اقفل
ام باسم : تفقل محبس الدخلة للشقة تخلية نص نص
مفيد فوزى : ليه؟
ام باسم : علشان ما يطيرش لك الكاوتش والقنطرة والكلام ده اللى الستات بتشتكى منه
مفيد فوزى : طيب الحنفية لما تبقى عايزة كاوتشة مش كده؟
ام باسم : اه اه جلدة
مفيد فوزى : جلدة
ام باسم : اه
مفيد فوزى : بكام بكام الحقيقى اللى هو يكلفك ؟
ام باسم : هوما بيكلفكش غيرجلدة
مفيد فوزى : بكام بقول؟
ام باسم : اشتغل وبكام يعنى
مفيد فوزى : اه
ام باسم : خمسة جنية باخد واحيانا بتدينى 3 جنية بارضى ده شاكوش
مفيد فوزى : بتضربى بيه على ايه ؟
ام باسم : افتح بيه حوالين سنتركات مثلا حوالين حنفية مدفونة فى الحائط جلبة نصف فى نصف جوا الحيط كدا
مفيد فوزى : عندك ولاد ؟
ام باسم : الحمد لله عندى ولد وبنتين
مفيد فوزى : بنتين بيدرسوا بيتعلموا
ام باسم : بنت قعدت من ثالثة كلية تجارة تزوجت وزوجها قعدها
مفيد فوزى : كلية التجارة
ام باسم : اه
مفيد فوزى : والثانية؟
ام باسم : والثانية خدمة اجتماعية
مفيد فوزى : فخورين ان امهم سباكة ؟
ام باسم : كانوا الاول لأ
مفيد فوزى : فهمينى ازاى
ام باسم : كنت موظفة فى بنك مصر محمد فريد المركز الرئيسى وسافرت الكويت قعدت حوالى 13 سنة 14 سنة
مفيد فوزى : ام ام باسم انا مش طالبك فى المسلسلاتى
ام باسم : امال
مفيد فوزى : المسلسلاتى ده فى التليفزيون يحكى عن قصص الحياة
ام باسم : اه
مفيد فوزى : بسأل سؤال محدد
ام باسم : لأ اقصد اقولك
مفيد فوزى : مش كل ما اسألك سؤال تروحى احكية لى
ام باسم : اه اه أقصد اقولك ان انا كان عندى عربية وكنت هانم
مفيد فوزى : لألألألأ طولى بالك طولى بالك يعنى اية كان عندك عربية وكنتى هانم ؟
ام باسم : يعنى انا كان عندى عربية ومعايا فلوس ووضعى ولادى فخورين به
مفيد فوزى : الاول اول ما اشتغلتى سباكة ؟
ام باسم : لأ اول ما اشتغلت سباك ازاى البس اوفارول وانزل بشبش وانزل اسلك بلاعات فكان دى اهانة كبيرة قوى ليهم
مفيد فوزى : قولى لى هو الحوض لما احب يعنى اسلكة من غير ما اجيب سباكة ؟
ام باسم : اه
مفيد فوزى : اعمل ايه ؟
ام باسم : لازم تشيل سبب السدد الاول لازم تشيل السدد قبل ما تحط المادة لان المادة مش هتفرفت الموجود اللى احنا ما نعرفهوش لازم اضرب سلك اسلك وانزع سبب السدد
مفيد فوزى : اه
ام باسم : وبعدين احط مطهر يطهر بقى اذا كان مثلا بيطاس مية نار ممنوعة
مفيد فوزى : انت زبائنك ناس عاديين بسطاء
ام باسم : كل حاجة زباينى بقوا كل حاجة دلوقتى بأشتغل عند البسيط يطلبنى اللى فى مدينة نصر اللى ..
مفيد فوزى : رحتى عند حد من الناس اللى بنعرفهم المشاهير ؟
ام باسم : المشاهير المهندس بتاعى
مفيد فوزى : اه
ام باسم : ومامته
مفيد فوزى : المهندس بتاعك مشهور؟
ام باسم : اه طبعا فى مجالى وبعدين انا فى مجالى ناس كثير
مفيد فوزى : وانت بتشتغلى بنظارة الدكاترة دى انت دكتور سباك؟
ام باسم : الحمد لله هههه فيه نظارة ثانية اتكسرت
مفيد فوزى : وده ايه بقى ده؟
ام باسم : ده مفتاح انجليزى
مفيد فوزى : منين عرفتى الحاجات دى كلها ؟
ام باسم : من الدورة من الدورة اه
مفيد فوزى : طب واشترتيها على حسابك والا ايه ؟
ام باسم : فيه احنا استلمنا شنطة عدة فوق الممتازة وانا دعمتها
مفيد فوزى : هو انت بتتكلمى فى السكة والا بتنادى على العملية ولامفيش
ام باسم : لألألأ
مفيد فوزى : كان زمان كان زمان انا فاكر واحد يمر ويقول بشويش كدة سباك
ام باسم : اول ما اتخرجت كنت هكتب يافطة على ظهرى
مفيد فوزى : على ظهرك
ام باسم : ايوه
مفيد فوزى : وانت ماشية ؟
ام باسم : وانا ماشية
مفيد فوزى : هتكتبى عليها ايه؟
ام باسم : سباك صحى فنى متميز شهادة معتمدة
مفيد فوزى : الله طب مش حطاها ليه على صدرك؟
ام باسم : مش هتبان بقى ببقى شايلة شنط ونظارات وحاجات كده
مفيد فوزى : ووووالناس كانت تنده لك لما تشوف اليافطة
ام باسم : ماهو انا معملتهاش لاننى اتشتهرت قبلها ؟
مفيد فوزى : اه
ام باسم : قبل ما افكر فى اليافطة كنت لقيتنى بقى ربنا يوفقنى يعنى وارضى كل زبائنى
مفيد فوزى : اه ه ه ه العمل قيمة سواء كان كناس فى شارع او سباك بيصلح بلاليع وحنفيات مكسورة ودش بايظ العمل قيمة تجسدة هذه السيدة ام باسم اللى عندها ولاد 00ولاد كباروكان نفسها فى يوم من الايام تحط يافطه على ظهرها اول سباكه اشوفها
فاصل
مفيد فوزى : جواب جانى من محمد سيد بيقول انا قزم وبيقول هل عندك مانع تسمع مشاكل الاقزام فى المجتمع ده والا انت بس بتسجل مع الكبار والطوال والعراض احنا لينامشاكل ادمية خد يا محمد هنا محمد السيد البحراوى اهو امامكم وانا هقعد جانبة واسمع ايه مشاكل الاقزام فى مصرعندك كام سنة يا محمد
محمد سيد بحراوى : عندى 29
مفيد فوزى : 29 اتفضل يا محمد
محمد سيد بحراوى : هى مفيش حد بيعمل حاجة يعنى لما نروح لو قدمنا على وظيفة يقول ايه انتوا ناس عاديين ما ينفعش ليكم وظائف ويطلع لنا كتاب اد كده ومحدش بيعمل اى حاجة وفى ناس حالتها تعبانة يعنى انا الحمد لله يعنى فى ناس تعبانه جامد جدا جدا جدا ومش لاقيين يشتغلوا ولا بيعملوا اى حاجة
مفيد فوزى : فى ناس بشوفهم بيطلعوا فى السيما علشان يضحكوا الناس
محمد سيد بحراوى : انا واحد منهم
مفيد فوزى :انت واحد منهم بتطلع فى السيما ؟
محمد سيد بحراوى :اه
مفيد فوزى : وانت ممكن تعاكس فى الحياة ؟
محمد سيد بحراوى :انا لأ والله مابعاكسش خالص افرض عاكست حد وحد راح لطشك بكلمة انت عارف الناس لألأ اصل انا عارف الناس الناس بترخم علي انا هرخم على الناس
مفيد فوزى : اه هو انت خاطب ولا متزوج؟
محمد سيد بحراوى :لألألأ مش متزوج
مفيد فوزى : فيه مشاكل لزواج الاقزام بالمناسبة هى كلمة الاقزام تضايقك ؟
محمد سيد بحراوى :لأ ما تضايقنيش اصل حاجة حقيقية
مفيد فوزى : اه صح هل فيه مشاكل بتواجة زواج الاقزام؟
محمد سيد بحراوى :لأ مفيش ادام فيه مادة خلاص
مفيد فوزى : ادام فيه فلوس خلاص ؟
محمد سيد بحراوى : اه ادام فيه فلوس خلاص
مفيد فوزى : فيه زمايلك الاقزام تزوجوا قزمة
محمد سيد بحراوى :اه فيه
مفيد فوزى : وخلفوا ايه ؟
محمد سيد بحراوى : خلفوا ناس عاديين
مفيد فوزى : طوال
محمد سيد بحراوى : طوال اه
مفيد فوزى : هو القزم ده ايه يعنى ساعة انت ما اتولدت كان ايه كان ايه المشكلة بتاعتك؟
محمد سيد بحراوى : مفيش مشكلة ولا حاجة بنى ادم زى البنى ادمين
مفيد فوزى : بتضحك ليه هو انا قلت نكتة ؟
محمد سيد بحراوى :لأ اصل انت قلت احسن من النكته بتقول عادى اه عادى طبعا
مفيد فوزى : هل يعنى كان وزنك زى وزن الاطفال؟
محمد سيد بحراوى : مش عارف والله ما سألتش والدتى
مفيد فوزى : والدتك قزمة ؟
محمد سيد بحراوى : اه والدتى عادية
مفيد فوزى : ووالدك ؟
محمد سيد بحراوى :عادى
مفيد فوزى : الله يعنى والدك ووالدتك عاديين جدا؟
محمد سيد بحراوى :والدى ووالدتى عاديين جدا
مفيد فوزى : طب جينات القزم دى جت منين ؟
محمد سيد بحراوى : هو ممكن يكون الاب والام اقارب هى ما تجيش الا من كدة
مفيد فوزى : ولاده قريب يعنى ست شهر 7 تشر
محمد سيد بحراوى : لأ يعنى اقارب يعنى ولاد عم
مفيد فوزى : في حب ؟
محمد سيد بحراوى : لأ مفيش
مفيد فوزى : مفيش لو حبيت تحب بنت طويلة؟
محمد سيد بحراوى : عادى بقى
مفيد فوزى : الحب ملوش
محمد سيد بحراوى :ملوش كبير وملوش صغير
مفيد فوزى : وانما انت ممكن تحب بنت طويلة؟
محمد سيد بحراوى : ممكن ليه لأ
مفيد فوزى : افرض قالت لك جرى ايه يا ازعة تقول لها ايه؟
محمد سيد بحراوى : ده رأيها
مفيد فوزى : انا أسف اذا قلت
محمد سيد بحراوى : لألألأ
مفيد فوزى : طب انت بتسمع كلمة ازعة دى؟
محمد سيد بحراوى : عادى
مفيد فوزى : الله كل حاجة عندك عادى
محمد سيد بحراوى : بس هدقق فى الحاجات هتتعب
مفيد فوزى : مش هتعيش
محمد سيد بحراوى : ايوه
مفيد فوزى : اه
محمد سيد بحراوى : فى نفس البلد دى مش هتعيش
مفيد فوزى :وانت ايه اللبس اللى انت لابسة ده؟
محمد سيد بحراوى :لبس عادى غيار عادى
مفيد فوزى : اه ده يعنى عبارة عن ايه عفريته والا ايه ؟
محمد سيد بحراوى : لأ طقم
مفيد فوزى : ايه؟
محمد سيد بحراوى : طقم
مفيد فوزى : انت بتنام على سرير اد ايه ؟
محمد سيد بحراوى : سرير عادى ههه سرير عادى
مفيد فوزى : انت عجباك اسئلتى قوى بتضحك
محمد سيد بحراوى : انت زى العسل ههههه
مفيد فوزى : اه طب ومشاكل الاقزام فى مصر ايه ؟
محمد سيد بحراوى : حقيقة والله ملهمش شغل وبيتبهدلوا والحكومة ما بتعملش اى حاجة انت عايز اقولك كانى ومانى والحكومه ما بتعملش حاجة يعنى انا واحد رحت قدمت على شقة ودخلت وزارة الاسكان وخلصوا لى كل الورق وقالوا لى انت معاك مؤهل قلت لهم لأ اخذوا الورق ورموة فى سلة الزبالة
مفيد فوزى : الله امال تعيشوا فين يعنى تموتوا ؟
محمد سيد بحراوى : لنا رب بقى ههههههههه
مفيد فوزى : المجتمع بيضايقك ؟
محمد سيد بحراوى : والله فى ناس كثير بس انا يعنى لو تنتنى
مفيد فوزى : ايه اسخف ما سمعتة فى حياتك معلش اسف للسؤال؟
محمد سيد بحراوى : يعنى فيه واحد ممكن وانت ماشى يتريق عليك
مفيد فوزى : يقول ايه ؟
محمد سيد بحراوى : يبص لك كدة ويعمل لك كدة شيل ابويك يعنى ومش عارف ايه يتريق يعنى
مفيد فوزى : يعنى ايه شيل ا بوك يا ابنى ؟
محمد سيد بحراوى: يعنى معاه واحد صحبة يقوله ابوك اهو
مفيد فوزى : عليك ؟
محمد سيد بحراوى :علي
مفيد فوزى : اه رخم يعنى
محمد سيد بحراوى : رخم
مفيد فوزى : الرخامة موجودة فى الشارع بكثرة
محمد سيد بحراوى : كثير كثير كثير
مفيد فوزى : وانت اخذت على كدة خلاص؟
محمد سيد بحراوى : ا صل الواحد ما يدققش يكبر دماغة
مفيد فوزى : مين اطول ممثل فى مصر ؟
محمد سيد بحراوى : اطول ممثل مش عارف انا شغال مع الاستاذ ماجد المصرى هههههههه
مفيد فوزى : انت جانبة طبعا زى العشرة؟
محمد سيد بحراوى :هههههههههههههه
مفيد فوزى : واحد وصفر
محمد سيد بحراوى : واحد وصفر صح
مفيد فوزى : وانت برضه واضح انك صفر فى الحياة صح هههههههه