اختراق

10/11/2010
ا/عمرالليثي : بسم الله الرحمن الرحيم مساء الخير أهلا بكم في حلقة جديدة من إختراق في الحلقات السابقة تحدثت مع ضيفي الشخصية العظيمة المصرية البطل نبيل عبد الوهاب نبيل عبد الوهاب بطل معركة إيلات اللي قدر إن هو يدمر سفينتين في عام 69 وفي الحلقة دية هنسمع منه كمان إزَّاي في عام 70 كان له دوركبير في تدميرالمدمرات بيت شافع وبات يان نبيل عبد الوهاب الحقيقة لما إتكلم في الحلقة اللي فاتت أنا حسيت قد إيه إن أنا قاعد قدام نموذج رائع خاصةً لما حكي وإتكلم علي إن كان معاه بطل مصري الرقيب فوزي البرقوقي كان معاه عشان خاطر بيقوموا بعملية مهمة في تدمير سفينتين إسرائيليتين وإستشهد فوزي البرقوقي وأصرنبيل عبد الوهاب إنه يستكمل العملية ومعاه فوزي البرقوقي وعام 14 كيلومتر وهو حامل جثمان الشهيد البطل رغم إن التعليمات بتقول لهم لما حد يتوفي أو يستشهد سيبوه لكنه حس إن ده إلتزام وأمانة وشعربهذه الأمانة نبيل عبد الوهاب وأخذه ورجع به لغاية مصر لقاية ما دفنه في داخل مقابرمصرفي بلده اليوم إستكمل حواري مع البطل نبيل عبد الوهاب عشان نشوف عمل إيه في إيلات في عام 70 وعامل إيه في حرب اكتوبر 73
فاصل " أغنية "
ا/عمرالليثي :عدنا من جديد وبيشرفني إن أنا أرحب مرة ثانية بضيفي طبعا إحنا يمكن إستمتعنا بالجزء اللي فات في البرنامج اللي أذيع الإسبوع الماضي والنهارده عايزين نتواصل مع البطولات العظيمة اللي إنت عملتها أنت وزملائك في القوات البحرية اللي إحنا بنفخر إن عندنا قوات بحرية عظيمة فعلا كان لها دوررائع جدا في حرب اكتوبر 73 أو حرب الإستنزاف نبدأ منين تحب معانا إحنا وصلنا الإسبوع اللي فات وإتكلمنا لغاية رجوعك بالسلامة بعد ما عملت العملية الرائعة اللي عملتها في الأردن وقمت بالمساهمة إنت وزملائك في تفجيرسفينتين تجاريتين إسرائيليتين إيه اللي حصل بعد كده النهارده ؟
عميد بحري متقاعد/ نبيل عبد الوهاب : مساء الخير
ا/عمر الليثي : مساء الخير
عميد بحري متقاعد/ نبيل عبد الوهاب : لو هنستكمل النهارده أقول ما تم عقب العملية الأولي في إيلات هو كان زي ما بأقول دائما إحنا عندنا الطار في مصر كان فيه نقيل الدبابات بيت شافع عملت عملية علي سواحل البحر الأحمر في الزعفرانة بالتحديد عملية ما هياش عملية قذرة ماهياش عملية حربية الحرب دائما زي ما إتعلمنا إنه بيبقي ما بين 2 جنود - الفرسان هم كده – لكن هم عملوا عملية ضد مدنيين نزلت الدبابات دية ضربة اتوبيس فيه ناس مدنيين ماتوا
ا/عمرالليثي : فين يا فندم ؟
عميد بحري متقاعد/ نبيل عبد الوهاب : في الزعفرانة موتوا محافظ البحرالأحمر داسوا علي عربيته بالدبابة مات هو والسواق - عملية كانت قذره فالقيادة إتخذت قراربإغراق ناقلة الدبابات بيت شافع وفعلا في فبرايرسنة 70 راحوا مجموعتين من الضفاضع البشرية بقيادة القبطان عمر البتانوني والقبطان عمر عبد العزيز وغرقوا – ما إحنا عرفنا السكة بقى وخلاص يعني بقى حقائق
ا/عمرالليثي : رجليكوا أخذت علي السكة خلاص هههههه؟
عميد بحري متقاعد/ نبيل عبد الوهاب : رجلينا أخذت علي السكة ههههه وغرقوا الناقلة بيت شافع وكان فيه ناقلة جنود إسمها باتيم تم إغراقها برضه
فاصل
ا/عمرالليثي :يعني كان الهدف من هذا القرارهو الإنتقام لما حدث في الزعفران ؟
عميد بحري متقاعد/ نبيل عبد الوهاب : ما حدث في الزعفرانة وأيضا كانت رؤية اللواء محمود فهمي الله يرحمه حاجة إن إحنا نفسنا نحارب إسرائيل في العمق هم كانوا بيضربوا في العمق إسرائيل لو حضرتك تأخذ بالك هتلاقيها بتحارب دائما خارج إسرائيل 48 يعني تحارب مصر في سيناء بتحارب سوريا في الجولان بتحارب الأردن في الضفة الغربية لبنان في جنوب لبنان – ما حاربتش جوه علي أرض إسرائيل بإستثناء عمليات إيلات دية اللي كانت هناك
ا/عمرالليثي : صحيح .
عميد بحري متقاعد/ نبيل عبد الوهاب : وهذا ما إزعج الإسرائيليين بشكل شديد بحيث عملوا إستجواب لمشيديان في الكنيست ما معناه إن المصريين دول خلاص داخلين طالعين في إيلات مش قادرين عليهم ولا إيه – وتعهد الرجل بإنه هيبذل قصاري جهده بإن ما فيش مصري هيخش ميناء إيلات مرةً أخري وبالتحديد زي ما قال الترجمة ما فيش صرصار مصري هيخش إيلات مرة ثانية لكن دخلنا ودخلنا للمرة الثالثة
ا/عمرالليثي : المرة الثانية تم تدمير بيت شافع وباتيم وبعدين إتصلحوا ثاني ؟
عميد بحري متقاعد/ نبيل عبد الوهاب : لأ باتيم غرقت تماما
ا/عمرالليثي : غرقة تماما ؟
عميد بحري متقاعد/ نبيل عبد الوهاب : بس هواللغم إنفجر في باتيم قبل بيت شيفع فباتيم غرقت بيت شيفع أخذت الفرصة لما لاقيت كده فعرفت إيه اللي هيحصل فدورت المكن وجريت بسرعة علي منطقة شالو- منطقة ضحلة بحيث ما تغرقش – تشحط بس وإنفجر فيها اللغم فأصيبت بأضرار
ا/عمرالليثي : تشحط يعني تنزل في البحر ؟
عميد بحري متقاعد/ نبيل عبد الوهاب : لأ يعني تبقي علي القاع بس باينه منطقة ضحلة
ا/عمرالليثي : مش غرقانه يعني ؟
عميد بحري متقاعد/ نبيل عبد الوهاب : آه مش غرقانة إنما باتيم غرقة تماما حتي في دية برضه عايزألمح إلي جرأة وشجاعة الجندي المصري اللي غرق باتيم واحد زميلي دفعتي إسمه القبطان رامي عبد العزيز كانوا رايحين إثنين كما هو العادة ما هو دائما بيروحوا إثنين بدي
ا/عمرالليثي :بدي آه زي ما حضرتك قلت لي كنت إنت وفاروق فوزي البرقوقي بدي واحد آه
عميد بحري متقاعد/ نبيل عبد الوهاب : آه بالظبط وفي الطريق البدي بتاعه تعب أو حس بحاجة مش هيقدر يكمل فراح رامي عبد العزيزمنفردا باللغمين وحطهم في المركب وغرقت – حاجة جرأة شديدة من المقاتل المصري يعني هو طول عمرة بنتدرب إثنين مع بعض لكن هو كان لوحده إنما وماله هاروح برضه لازم تتم العملية وفعلا راح وغرق المركب - ركب اللغمين وغرق المركب تماما – بطولة في كل حاجة
ا/عمرالليثي : موجود ؟
عميد بحري متقاعد/ نبيل عبد الوهاب : موجود أيوه
ا/عمرالليثي : طيب إحنا نحييه من هنا ونقول له متشكرين وبطولة رائعة جداً من سيادته ويعني فعلا إحنا بنسعد بكل أبطالنا أبطال مصر اللي فعلا ساهموا بشكل كبيرفي تحريرأرضها العزيزه في اكتوبر 73
فاصل
" مشاهد لصور الأبطال "
عميد بحري متقاعد/ نبيل عبد الوهاب : إحنا وراهم قالو بيت شيفع ما غرقتش بس هنروح نغرقها ثاني – عمل إيه موشيديان ؟ عمل شوية حاجات عشان ما حدش يخش عمل شباك علي مدخل ميناء بس وإيه يعني ما هو دخلنا برضه
ا/عمرالليثي : عمل شباك إيه بقى – فيها ديناميت مثلا ؟
عميد بحري متقاعد/ نبيل عبد الوهاب : لأ شباك بتقفل مدخل الميناء بحيث ما نقدرش نعدي منها بيقفلها بالليل إحنا ما بنشتغلش غيربالليل فيقفلها باليل ويفتحها بالنهارسفن تخش تعمل تفريغ وتحميل – بتعمل المهام بتاعتها لكن بالليل تتقفل ما فيش ضفاضع يقدروا يخشو .
ا/عمرالليثي : لكن الحركة في ميناء إيلات شغَّالة الصبح بيفتحوا الشباك ده عادي خالص ؟
عميد بحري متقاعد/ نبيل عبد الوهاب : بالنهارايوه كثف العبوات اللي بتترمي ضد الضفاضع هو دا إجراء روتيني بيتعمل في كل المواني بيرموا عبوات تنفجر تحت الميه لو فيه ضفاضع تموت
ا/عمرالليثي : بشكل مستمر؟
عميد بحري متقاعد/ نبيل عبد الوهاب : آه
ا/عمرالليثي :ولا مرتبط مثلا بهجوم معين ؟
عميد بحري متقاعد/ نبيل عبد الوهاب : لالا لأ إجراء
ا/عمرالليثي :إجراء إحترازي ؟
عميد بحري متقاعد/ نبيل عبد الوهاب : هو بقى زود بشكل شديد العبوات دية بحيث إن أنا يعني في العملية الأولي أنا يمكن سمعت عبوتين مثلا اللي إتعملت طوال فترة العملية علي مسافات بعيدة مننا - في العملية الأخيرة كان بمعدل كل دقيقتين عبوة قلبها جحيم
ا/عمرالليثي : أظن أصل القلم اللي أخذوه في الأول كان موجع ولا كان إيه ؟
عميد بحري متقاعد/ نبيل عبد الوهاب : كان موجع ما هو ضايقهم جدا بأقول لحضرتك هم مش متعودين إن يحصل حرب عندهم لأ إحنا وصلنا لهم لغاية عندهم وبنحارب في بلدهم – بحيث إن أنا بقيت كل شويه بأسمع العبوات دية وفيه عبوة كانت قريبه مننا بشدة يعني لقينا الألغام والأجهزة بتطلع علي وش الميه وإحنا كمان طلعنا علي وش الميه من تأثير العبوة
ا/عمرالليثي : لأ أحكي لي الأول الموضوع تم تكليفك به إزَّاي للمرة الثالثه بقى ؟
عميد بحري متقاعد/ نبيل عبد الوهاب : المرة الثالثة لما هم الإجراء الأخيراللي عمله إن ما خلاش المراكب تبات بالليل في الميناء – المراكب طول النهاربتخش والليل تطلع بره فنروح ما نلاقيش – القيادة عندنا بتفكر برضه ما إحنا بنلعب لعبة القط والفارما أصل هم بيعملوا كده نعمل حاجة ثانية – ففكروا في فكرة جميلة جدا إن إدونا ألغام أكبرمن المعتادة الألغام العادية كانت 50 كيلوا فيها " تي إن تي " إدونا ألغام 125 كيلوا وجواها مادة ثانية إسمها "هيكسوجين " الهيكسوجين دية القوي التدميرية بتاعتها قد ال " تي إن تي " مرة ونصف والخطة كانت إن إحنا بنروح بالليل مش هنلاقي ملاكب هنحط الألغام دية علي القاع بجانب الرصيف الحربي وبنظبط التايمر علي 12 ساعة بحيث نشد التيلة 12 بالليل تنفجرثاني يوم الساعة 12 الظهر لما تكون المراكب دخلت وهي اللي وقفت فوق الألغام مش حطينا الألغام فيها القوي التدميرية الكبيرة اللي هتنتج من اللغمين اللي هم 125 كيلوا فيهم " هيكسجين"هتعمل حاجة من إثنين إما إنها تغرق المراكب وده اللي إحنا عايزينه كويس أو تعطبها يعني تخسرها فمتنفعش تطلع بالليل فنهاجمها بالليل تاني نغرقها – خطة طموحة جدا وجميلة جدا كانت إتعملت القيادة عملوها عشان هو ما بقاش يبيت المراكب في إيلات
ا/عمرالليثي:التكليف جالك إمتي ؟
عميد بحري متقاعد/ نبيل عبد الوهاب : إحنا كنا يوم 9 مايو سنة 70 رحنا الأردن وطبعا خلاص عرفنا
ا/عمرالليثي : برضه طلبوكوا برضه وكلفوكم كان حضرتك معاك كام واحد ؟
عميد بحري متقاعد/ نبيل عبد الوهاب : كنا في آخر مرة مجموعتين بس كان القبطان عمرعز الدين صديقي العزيزلغاية النهارده وأنا وكل واحد معاه البدي بتاعه
ا/عمرالليثي : أربعه بس ؟
عميد بحري متقاعد/ نبيل عبد الوهاب : أربع أفراد
ا/عمرالليثي : والمطلوب منكوا إنكوا إنتوا..........
عميد بحري متقاعد/ نبيل عبد الوهاب : نحط لغمين من الكباراللي هم ال 125 كليوا في الهكسجيل
ا/عمرالليثي : التكليفات كانت واضحة بقى يعني المرة دية ماكنش فيه حاجة إسمها هتروحوا مش عارفين هتعملوا إيه لأ الأمور كانت أكثر وضوحا ؟
عميد بحري متقاعد/ نبيل عبد الوهاب : ما إحنا عارفين أول ما يروحوا جايين في ليلة هنسافر دلوقت عارفين إن إحنا هنروح الأردن وهنعمل بقي خلاص
ا/عمرالليثي : هتسافروا دلوقت ؟
عميد بحري متقاعد/ نبيل عبد الوهاب : آه
ا/عمرالليثي : أظنك إنت كنت مستعد علي طول للسفر يعني إنت بتحكي لي المرة اللي فاتت إن هتسافروا النهارده كنت مستعد للسفرالنهارده وهنا لما بتقول لي حضرتك جالك التكليف بهذه المأمورية قالك هتسافروا دلوقت كنت مستعد برضه للسفر دلوقت
عميد بحري متقاعد/ نبيل عبد الوهاب : هنعمل إيه ما هو الواحد يعني إيه الإستعداد أكثر من إن حد هيحقق حلم عندك – هيحقق لك أمنية نفسك فيها
ا/عمرالليثي : الحلم لسة موجود عندك ؟
عميد بحري متقاعد/ نبيل عبد الوهاب : طبعا
ا/عمرالليثي : يعني من العمليه الأولي اللي إنت عملتها سنة 69 لغاية مايو 70 الحلم لم يتغير ؟
عميد بحري متقاعد/ نبيل عبد الوهاب : ولغاية 73 كان مستمرا وبقوة
ا/عمرالليثي : ممكن تقول لي الحلم عبارة عن إيه ؟
عميد بحري متقاعد/ نبيل عبد الوهاب : إن أنا أعمل عملية أخسَّرفيها العدو أي حاجة أي حاجة بس أحس إن أنا ألمته - وجعته ويمكن هو ده اللي حصل في العملية الثالثة ما تمش تدمير سفن
ا/عمرالليثي : سافرت الأردن برضه كنت طالب برضه ولا غيروا الوظيفة ؟
عميد بحري متقاعد/ نبيل عبد الوهاب : ههههه هو الباسبور بتاعي عندهم
ا/عمرالليثي : هوهو الباسبورالمضروب إياه ده ههههه؟
عميد بحري متقاعد/ نبيل عبد الوهاب : ههههه
ا/عمرالليثي : سافرت به ورحتوا ؟
عميد بحري متقاعد/ نبيل عبد الوهاب : ولسة بنتعلم كل مرة حاجة
ا/عمرالليثي : ونفس نقطة الإنزال هي نفس النقطه واللا إتغيرت ؟
عميد بحري متقاعد/ نبيل عبد الوهاب : لأ ما حصلش نزلنا من نقطة في العقبة
فاصل
لقطات من فيل الطريق الي إيلات تحاكي الواقع "
عميد بحري متقاعد/ نبيل عبد الوهاب : وإن كان في العقبة كانت أصعب قوي من النقطة الأولي لإن دخول العقبة في حد ذاته كان ده مشكلة كان منظمة فتح بتروح تضرب شوية صواريخ كاتيوشا من العقبة علي إيلات تروح إسرائيل قافلة ميناء العقبة وهوالمنفذ الوحيد للأردن لإن بييجي فيه كل حاجة بتاعتها فكانت صعب قوي مانعين أي حد يروح العقبة غير أهالي العقبة شخصيا يعني حتي الأردنيين اللي هومش من العقبة ممنوع يخش – دخلنا بطريقة مدبراها المخابرات
ا/عمرالليثي : عملتوا إيه ؟
عميد بحري متقاعد/ نبيل عبد الوهاب : لبسنا عساكرأردنيين ودخلنا في عربية بتاعة الجيش الأردني ههه
ا/عمرالليثي : بس طبعا دا أكيد بتنسيق مع الأردن ولا إيه ؟
عميد بحري متقاعد/ نبيل عبد الوهاب : لأ ما كنش كان ورا الأردن برضه
ا/عمرالليثي : كمان !
عميد بحري متقاعد/ نبيل عبد الوهاب : هههههههه
ا/عمرالليثي : يعني لابسين عساكرأردنيين وواخدين عربيات ميري أردنية !!!!
عميد بحري متقاعد/ نبيل عبد الوهاب : ههه وراكبين عربيه أردني وداخلين بيها هههه ما عشان كده بقول لحضرتك كانت صعبة قوي بس كان التخطيط
ا/عمرالليثي : بس أكيد كان فيه تنسيق مع جهة معينة – يعني أكيد كنتوا بتنسقوا ولا إيه ؟
عميد بحري متقاعد/ نبيل عبد الوهاب : أكيد طبعا طبعا والعربية بتاعتهم – العربية بتاعة الجيش الأردني كانت المخابرات بتاعتنا بتنسق تنسيق جيد قوي يعني – ونزلنا من العقبة فكانت المسافة أقصروكانت أكثر سهولة خلاص رجلينا أخذت علي ال
ا/عمرالليثي : طيب نقاط التفتيش بقى عدتوها إزَّاي ؟
عميد بحري متقاعد/ نبيل عبد الوهاب : ما هم بتوع المخابرات عاملين كل الإحتياطات
ا/عمرالليثي : يعني ساعات بيوقفوكوا في الطريق ؟
عميد بحري متقاعد/ نبيل عبد الوهاب : لأ ما هو دية لبس العساكر والعربية الميري سهلة لنا شوية
ا/عمرالليثي : آه غيرالمرة الأولانية ؟
عميد بحري متقاعد/ نبيل عبد الوهاب : آه
ا/عمرالليثي : وبعدين ؟
عميد بحري متقاعد/ نبيل عبد الوهاب : نزلنا من العقبة وصلنا إيلات قلت لحضرتك إن إحنا كانت الخطة نحط الألغام بجانب الرصيف الحربي مكان ما المراكب هتيجي ثاني يوم تقف وإحنا في الطريق بيرموا عبوات كثيره قوي عبوة جاءت قريبه جدا مننا
ا/عمرالليثي : وإنتوا عايمين ؟
عميد بحري متقاعد/ نبيل عبد الوهاب : وإحنا غطسانين آه
ا/عمرالليثي : إنتوا بتعوموا قد إيه أو بتغطسوا قد إيه – يعني من المفترض الخطة بتقول إيه ؟
عميد بحري متقاعد/ نبيل عبد الوهاب : إن إحنا نخش الميناء وإحنا جوه الميناء لازم نغطس عشان ما حدش يشوفنا نغطس حوالي 2 كيلوا – العبوه لما جاءت قريبة عملت 2 ديفوه في الألغام أول واحد إن اللغم بيبقي وزنه صفر في الميه يعني تحته تحت يقعد تحت يعني مالوش وزن بيبقي فيه حته كنوك كده مخروطية من قدام بتعمل التوازن ده
ا/عمرالليثي : هي دية الحتة المخروطية اللي كان الفنان نبيل الحلفاوي المفروض يقعد يظبط اللغم بيها ؟
عميد بحري متقاعد/ نبيل عبد الوهاب : هههههه لأ هو هههه فيه ناس كتير بتسأل عن النقطة دية – هو حصل الفنان نبيل الحلفاوي عمله بس ما كنش بالتأثير اللي هو كان باين في الفيلم – في الفيلم طبعا قعد يعمل كده وبيعرق والمجموعة قاعدة متربصة وخايفين يشدوا المشاهد بشدة كانت حته دراما شوية
ا/عمرالليثي : مش موجودة في الواقع دية ؟
عميد بحري متقاعد/ نبيل عبد الوهاب : أو حصلت في الواقع بس اللي حصل لغم فيه " تي إن تي " ال " تي إن تي " ماده ما تنفجرش غير بموجة إنفجارية فبيحطوا فيها الحاجة اللي هي الديتونيتر أو البادئ – حاجة زي السيجارة كده بيحطوها تعمل موجة إنفجاريه تفجر ال " تي إن تي " لكن ال " تي إن تي " في حد ذاته لو ولعته هيولع زي الورق مش هينفجر ولا يعمل حاجة فيعني هو لوكان عمل كده في الخرم ده ما كنش هيحصل أي حاجة ههههه
ا/عمرالليثي : هههه بس عملتوا كده يعني ؟
عميد بحري متقاعد/ نبيل عبد الوهاب : إنما كان أكشن كان له تأثيرفي الفيلم وكل الناس حبست أنفاسها
ا/عمرالليثي : وتأثيرإيجابي جدا ده حصل فعلا بس بشكل أبسط نوعا ما
فاصل
" لقطات من فيلم الطريق الي إيلات تحاكي الواقع"
عميد بحري متقاعد/ نبيل عبد الوهاب : من تأثيرالعبوة لقينا الألغام بتعوم
ا/عمرالليثي : بقي لها وزن ؟
عميد بحري متقاعد/ نبيل عبد الوهاب : بقى تعوم بتطفو – طيب وبعدين إحنا المفروض نحطها علي القاعة كانت الفكرة حقيقةً من زميلي القبطان عمر عز الدين لما قال كلمه يعني في خلال حديثي
ا/عمرالليثي : دا مين يا فندم لعب الدورفي الفيلم عمرعزالدين ؟ الفنان عزت العلايلي ؟
عميد بحري متقاعد/ نبيل عبد الوهاب : لأ أنا مش فاكر إسمه بس فاكر شكله بس كش فاكر إسمه
ا/عمرالليثي : الفنان محمد سعد ؟
عميد بحري متقاعد/ نبيل عبد الوهاب : محمد سعد بيمثل دورأحد صف الظباط اللي كانوا معانا وحتي حتة الفرح كانت بتجسد ظل من الحقيقة كانت علاقة الناس ببعض قوية جدا مع الإحترام اللي موجود بس ما كنتش فيه الفوارق اللي هي مابين الظابط وصف الظابط كنا كلنا واحد بنتدرب مع بعض بنبقي مربوطين ببعض بحبل الإتصال لو حد فينا مات الثاني اللي هيجره سواء الظابط أو صف ظابط فكنا كلنا قريبين جدا من بعض زي الصحاب ودا كان حتي جسدوه في الفيلم إن محمد سعد كان فرحه فرئيس الأركان والظباط كلهم حضروا وفعلا كان دا بيحصل كتيريعني فبقول لحضرتك من البطولة اللي حصلت أو يعني الإحساس بتاع الناس إن عمرعز الدين قال لي إيه – قلت له طيب إحنا دلوقت الألغام بتطفوا طيب هنعمل إيه يعني قال لي بص العملية دية هتنجح هتنجح إياكش حتي أنا هأحضن اللغم لغاية الصبح لغاية ما ينفجر وأنا حاضنه بس العملية ما تفشلش – قد إيه الكلمة كانت تأثيرها تأثيرمشر قادرأوفصه لك – واحد بيقول لك أنا هأحضن اللغم لغاية ما ينفجر عشان العملية ما تفشلش – اللي فكرنا فيه إن إحنا بنبقي لبسين حزام إسمه حزام السرس هو حزام أثقال يعني عشان إن إحنا نغطس بدلة الغطس بتعمل طفو – فكل واحد قلع الحزاب بتاعه ولفه حوالين اللغم بفقي أثقل فرسي علي القاع الديفوه الثاني اللي حصل في اللغم إن التيمرباظ فإنفجر اللغم الأولاني بدل ما الساعة 12 الظهر إنفجر الساعة 7 الصبح بس عمل تاثير إنفجار بوم جامد قوي دمرالرصيف الحربي كله خير وبركه رزق إحنا عايزين نضايقهم وخلاص فدية حاجة تضايقهم
ا/عمرالليثي : يعني إنتوا رحتوا وحطيتوا الألغام في أسفل الرصيف الحربي 12 بالليل ؟
عميد بحري متقاعد/ نبيل عبد الوهاب : وظابطينه علي 12 ساعة
ا/عمرالليثي : ورجعتوا ؟
عميد بحري متقاعد/ نبيل عبد الوهاب : ورجعنا
ا/عمرالليثي : في الفترة دية اللي إنتوا نزلتوا ورحتوا وحطيتوا حد حس بيكم من الجانب الإسرائيلي ؟
عميد بحري متقاعد/ نبيل عبد الوهاب : إطلاقا إطلاقا ما هواش الجيش الواعي قوي زي ما كانوا بيشيعوا يعني
ا/عمرالليثي : ورجعتوا تاني الي نفس نقطة الألتقاء رجعت في معادك بقي المرة دية ؟
عميد بحري متقاعد/ نبيل عبد الوهاب : آه المرة دية رجعت في ميعادي
ا/عمرالليثي : الساعة كام كانت ؟
عميد بحري متقاعد/ نبيل عبد الوهاب : لأ كانت المسافة بقى قصيرة لإن نزلنا من نقطة قريبة قوي
ا/عمرالليثي : وقعدتوا كام ساعة بقى يعني إنتوا رحتوا حاطيتوا الحاجات دية قعدتوا كام ساعة منتظرين تشوفوا النتيجة
عميد بحري متقاعد/ نبيل عبد الوهاب : ما هو اللي حصل إن إحنا كنا متوقعين إن الألغام تنفجر 12 الظهر بس هي أول واحد إنفجر7 الصبح
ا/عمرالليثي : نت فين ساعتها في الفترة دية بقى – الفترة اللي إنتوا رجعتوا فيها من ساعة حطيتوا الألغام لغاية منتظرين الساعة 12 ؟
عميد بحري متقاعد/ نبيل عبد الوهاب : كنا وصلنا العقبة وكالعادة مسكونا برضه القوات الأردنية
ا/عمرالليثي : قبضوا عليكم ؟
عميد بحري متقاعد/ نبيل عبد الوهاب : آه برضه وبرضه نفس القصة قلنا لهم إحنا الطيارة وطابا فحتي آخر مرة كانوا متشككين بشدة يعني كل مرة الطياره بتروح وتسيبكوا إنما هذا ما حدث
ا/عمرالليثي : إنتوا خلصتوا العملية وحطيتوا الألغام تحت الرصيف الحربي وتم القبض عليكم من قبل السلطات الأردنية ؟
عميد بحري متقاعد/ نبيل عبد الوهاب : بالظبط وإنفجراللغم الأولاني الساعة 7 وقد تم تدمير الرصيف الحربي
فاصل
عميد بحري متقاعد/ نبيل عبد الوهاب : كإجراء معتاد بينزلوا الضفاضع الإسرائيلية يشوفوا فيه إنفجارحصل يشوفوا إيه الإنفجار ده وإيه الخسائر اللي حصلت وحاجات من هذا القَبِيل – فنزلت الضفاضع البشرية الإسرائيلية حظهم الغابر إنفجراللغم الثاني الساعة 9 وهم في المياه مات 14 واحد منهم – خير وبركه
ا/عمرالليثي : الله جميل .
عميد بحري متقاعد/ نبيل عبد الوهاب : رزق من عند ربنا
ا/عمر الليثي : جدا .
عميد بحري متقاعد/ نبيل عبد الوهاب : ما هواش اللي كان مخطط له لكن نتيجة كويسة إحنا كنا عايزين
ا/عمرالليثي : كنا عايزينهم كلهم الحقيقة ههههه
عميد بحري متقاعد/ نبيل عبد الوهاب : هههههه نضايقهم وقد كان دية كانت العملية الثالثة في إيلات
ا/عمرالليثي : سابت تأثير شكله إيه بقى هناك ؟ يعني هل أثَّرت طبعا كده معناه إن بيت شافع ما إتأثرتش ؟
عميد بحري متقاعد/ نبيل عبد الوهاب : آه بيت شافع قعدت فترة هم حاولوا يصلحوها وعلشان يداروا امام الرأي العام عندهم إن هي دخلوها الخدمة وبعد شوية طلعت
ا/عمرالليثي : لأ يوم العملية ما حصلش حاجة ؟
عميد بحري متقاعد/ نبيل عبد الوهاب : لأ ما حصلش
ا/عمرالليثي : لإن حصل إنفجارمبكر للغمين اللي كانوا محطوطين ؟
عميد بحري متقاعد/ نبيل عبد الوهاب : الإنجارين كانوا قبل الساعة 12 واحد الساعة 7وواحد الساعة 9
ا/عمرالليثي : واحد دمر الرصيف الحربي الإسرائيلي ؟
عميد بحري متقاعد/ نبيل عبد الوهاب : والثاني موت الضفاضع البشرية
ا/عمرالليثي : 14 ضفضع إسرائيلي ؟
عميد بحري متقاعد/ نبيل عبد الوهاب : آه ودية كانت مكسب كويس لينا الضفضع برضه شخص مميز في القوات المسلحة أياً كان مكانه بيأخذ تدريب كثيربيختاروه بمواصفات معينة ف 14 واحد كويسين يعني رزق جميل
ا/عمرالليثي : فضل ونعمة من ربنا ههههه بعد القبض عليهم من قِبَل القوات الأردنية إيه اللي حصل ؟ ححقوا معاكم ؟
عميد بحري متقاعد/ نبيل عبد الوهاب : آه كانوا بيحققوا معانا الإجراء الأميري لكن هم من جواهم مبسوطين يعني عشان يقولوا إن إحنا مسكنا الناس دية طيب وإيه اللي جابهم تحقيقات روتينية ورجعنا مصر
ا/عمرالليثي : قعدتوا كام يوم في الأردن ؟
عميد بحري متقاعد/ نبيل عبد الوهاب : كل مرة بيمسكونا بنقعد يومين هههه
ا/عمرالليثي : يومين هههههه جابوا لكم شباشب برضه المرة دية هههه؟
عميد بحري متقاعد/ نبيل عبد الوهاب : هههههه كسوه هههههه
ا/عمرالليثي : جابوا لكم برضه هدوم وكده ورجعوكوا مصر ؟
عميد بحري متقاعد/ نبيل عبد الوهاب : ورجعنا مصر
ا/عمرالليثي : إيه اللي حصل بعد رجعكوا بعد العمليه العظيمه اللي عملتوها ؟
عميد بحري متقاعد/ نبيل عبد الوهاب : الله كانت كل العمليات دية جميلة لإن إحنا كنا عقب النكسة لو حضرتك تتذكر كان الروح المعنوية منخفضة بشكل شديد يمكن أكثرنكتة طلعت علي القوات – إحنا شعب بنضحك برضه حتي علي نفسنا يعني كانت أكثرنكت طلعت علي القوات المسلحة بعد الهزيمة كل عملية كانت بترفع قدرالروح المعنوية مش عايزأقول علي القوات المسلحة بس أوالشعب المصري بس كانت علي الشعب العربي كله كانت بتسيب تأثير حتي كانت يعني نعمل العملية من دول تلاقي الجرائد في الوطن العربي بالكامل كاتبه عنها أنا حتي وأنا راجع جبت جرايد كتير من كل حته رحت الدفاع والدستور يعني كلهم لإن قد إيه كانت بتسيب أثر جميل كل الناس كانت نفسهم في حاجة ترفع الروح المعنوية فكل العمليات كانت بتسيب أثر حلو وخصوصا إيلات
فاصل
" عرض لجرائد تتكلم عن الضفاضع البشريه "
ا/عمرالليثي : رجعت مصربعد العملية البطولية الجميلة اللي أديتها حضرتك ومعاك زملائك وقاعدين منتظرين بقى إنكوا إنتوا تعملوا العمليه الكبيرة مظبوط ؟
عميد بحري متقاعد/ نبيل عبد الوهاب : بالتأكيد كان نفسنا – يعني حرب الإستنزاف فعلا ما هواش كلام يُقال إنما فعلا كانت اللبنة الأولي للنصر منها أخذنا ثقة في نفسنا كبيرة الروح المعنوية إرتفعت بعد ما كانت إنخفضت الي ما تحت الصفرعرفنا مقدرة العدو لما إشتبكنا معاه حقيقةً أنا قلت لحضرتك إن 67 إحنا
ا/عمرالليثي :الجندي المصري لم يلتق بالجندي الإسرائيلي لم يواجهه ؟
عميد بحري متقاعد/ نبيل عبد الوهاب : ما حصلش ما حصلش إن إحنا إشتركنا أساسا لم تتح لنا الفرصة حرب الإستنزاف هي دية اللي قالت إيه هو مقدرتي أنا كجندي وكمقاتل مصري وإيه مقدرة العدو داخلين بصدر مفتوح داخلين وإحنا فعلا متأكدين إن لو قامت حرب هيكون نصيبنا النصرفيها وقد كان
ا/عمرالليثي : في الفترة دية تم – صدر قرارمن القائد الأعلي للقوات المسلحة بترقية إستثنائية لحضرتك من رتبة ملازم أول الي رتبة الرائد مظبوط ؟
عميد بحري متقاعد/ نبيل عبد الوهاب : إههه لها قصة طريفة شوية ههه هوما فيش ترقية من رتبة ملازم أول لرائد فيه نقيب في النصف إنما كان الرئيس السادات بيزورالوحدات الخاصة عشان الأعمال البطولية اللي حصلت فبعد العرض ومعلق العلم اللوط علي علم اللواء قال يلتقي بالناس اللي عملوا عمليات ودخلونا وراء بعض يعني العملية الأولي، العملية الثانية،العملية االثالثة – وطبعا الرئيس السادات يعني مش واخد باله قوي من الناس كلنا لابسين أبيض وبتاع بس أنا كنت شكلي متميز شويه لإن كنت حامل العلم فلابس بقى الأجزباند وحاجات كده فباين من وسطهم انا دخلت في المرة ودخلت الثانيه فالرئيس السادات بيقول هو يعني ده مش إشترك قبل كده حكو له بقى علي إن أنا زميلي أستشهد وأنا جريته وجبته وبتاع فالريس إتبسط وقال لي إنت الملازم أول يأخذ الرتبه اللي بعدها كنت أنا بالصدفة الكلام دا كان في 15 يونيو هو من أول يونيو بتنزل النشرة اللي هي في 1 يوليو – بتنزل بس بتتنفذ 1 يوليو كنت فعلا هعلق نقيب قائد القوات البحرية قال للفريق صادق دا نبيل هيبقي نقيب كما 15 يوم فقال للريس دا نبيل هيترقي نقيب قال يأخذ الرتبة اللي بعدها رحت معلق من ملازم أول لرائد
فاصل
" صور لعميد نبيل وهو رائد ثم مجموعة صور مع زملائه "
ا/عمرالليثي :إستعديت إزاي لحرب اكتوبروإيه اللي حصل إنت عبرت 30 مرة أظن ؟
عميد بحري متقاعد/ نبيل عبد الوهاب : 22 مرة مع كان حظي كنت بخدم قاعة الأدبية في السويس وكان الجيش الثالث في خلال فترة حرب الإستنزاف كان بيعملوا عبور– عبوربقي يعملوا حاجات كتيرمرة يحطوا ألغام مرة يضربوا دبابة يخطفوا أثير حاجة من هذا القَبيل العبور دا كان بيتم لازم بمصاحبة واحد من الضفاضع عشان الصوت ما يبانش – ما هو هاتوا علي الناحيه الثانية موجود – فبينزل حد من الضفاضع يعدي قناة السويس سباحة ومعاه حبل وبيمسكه من الناحية الثانة وهم من الناحية دية بينزلوا بقارب ويقعدوا يشدوا في الحبل كده لغاية ما يوصلوا الناحية الثانية لعدم إصدارأي صوت فكان لي الشرف في الإشتراك في عمليات عبور22 واحدة من اللي هم مع الجيش الثالث وأول ما بأروح هناك أهو زي ما بيعملوا بأعمل كان عمليات جميله وجريئه وكلها قلت لحضرتك اللبنه الأولي للنصر – كانت كل الحاجات دية هي دية اللي في الآخر بقى عملية العبور في 6 اكتوبر 73 خلاص حاجة آخدين عليها – واخدين علي تصرفات العدو وعارفين مقدرته فكان النصرالمحقق فعلا يعني
ا/عمرالليثي : في العمليات دية كان إيه اللي بتلاحظه يعني إيه الحاجة اللي إنت كنت بتحسها في المقاتل المصري اللي إنت بتغوص في قناة السويس عشان تعبرللضفة الشرقيه للقناة وتمسك تحط الحبل وهم يعبروا علشان يعملوا عمليات فدائية كان إيه شعورك بتشوفهم بيعملوا إيه ؟
عميد بحري متقاعد/ نبيل عبد الوهاب : لقيت اللي أنا بحس بيه واللي أنا فاكرأنا لواحدي عندي هذا الإحساس هذا موجود في كل الناس أي حد سواء كان قائد من القادة الكبارأو من الظباط الصغيرين أومن الأفراد الصف الظباط والعساكر كلهم عندهم نفس الإحساس كلهم نفسهم بيتمنوا بصرف النظرعن أي مخاطر ماحدش أبداً كان بيفكرإيه اللي ممكن يحصل يتعور يموت يتمسك ما حدش بيفكرفي كده كل واحد بيبقي عنده فرحه لا توصف بإنه هيشترك في عملية علي الرغم من إن إحتمالات العودة قد تكون ضئيلة يعني مش مثلا إحتمال إنه ما يرجعش ده إحتمال وارد لأ إحتمال وارد وبشدة لكن كل الناس كانت بتتصارع عشان يشتركوا في عملية
ا/عمرالليثي : كان فيه إقدام يا فندم ؟
عميد بحري متقاعد/ نبيل عبد الوهاب : جدا جدا
ا/عمرالليثي : الروح دية مصدرها إيه ؟
عميد بحري متقاعد/ نبيل عبد الوهاب : أنا بقول إن الشعب المصري أوالجندي المصري لما تتاح له الفرصة بيظهر مقدرتة يمكن مش باينة دلوقت بس مش عشان ما بقتش الروح دية موجودة عشان الفرصة مش موجودة أعتقد إن لو جاءت الفرصة زي ما جاءت لنا التي لا أتمناها طبعا ما حدش يتمني الحرب إطلاقا لكن لو جاءت الفرصة حضرتك هتلاقى نفس الروح دية
ا/عمرالليثي : يعني إحنا دايما بنقعد نناقش فكرة الإنتماء – الشباب هل عنده إنتماء ما عندوش إنتماء النهارده يقول لك آه دا عندهم إنتماء في الكوره يعني تلاقي ماتش كوره فمصر بتلعب فالشباب ينتمي ........
عميد بحري متقاعد/ نبيل عبد الوهاب : هو ده اللي موجود قدامهم
ا/عمرالليثي : بس أنا بعتبره إنتماء لحظي إنتماء مرتبط بساعتين ثلاثة بيومين ثلاثة وخلاص أخذنا الكاس كسبنا الماتش خلاص الموضوع إنتهي لكن روح اكتوبردية كانت موجودة في زي حضرتك راجل عايزيروح يستشهد في الشهداء اللي إحنا بنقدمهم في البرنامج وبشوفهم والحقيقة لما بتسمح القصص الإنسانية تحس قد إيه الناس دية عندها قدرة كبيرة علي البذل والعطاء دون حسابات اللي سايب مراته حامل اللي سايب ولاده رضع اللي سايب أمه قعيدة كلها حاجات تستحس الإنسان علي إن هو يقول الله طيب الراجل دا إزَّاي يعمل كده وهو ظروفةالإجتماعية سيئة وبرضه لو بصيت لأوضاعه المادية هتلاقيها سيئة لو بصيت لأوضاعه الإنسانية هتلاقيها عندها مشاكل إجتماعية كثيرة حتي الجريمة يعني أنا كان بيلفت نظري جدا في حرب اكتوبر ما فيش يا فندم حادثة سرقة واحدة إتسجلت في فترة الحرب دية كلها مؤشرات لإيه ؟
عميد بحري متقاعد/ نبيل عبد الوهاب : لأ هو طبعا زى ما قلت لحضرتك
ا/عمرالليثي : إحنا ناقصنا إيه عشان نكون زي ما كنا قبل كده وأنت بكل من أبطال حرب اكتوبر ؟
عميد بحري متقاعد/ نبيل عبد الوهاب : لأ هو مش ناقصنا لو جاءت الفرصة لأي حد حتي من الشباب اللي إحنا شايفينه دلوقت ما فيش في دماغه غيرالكورة والحاجات زي ما حضرتك بتقول هتلاقيه يعمل كده أكيد مصرأعتقد أنها عزيزة علي كل واحد يمكن بعض الناس يقول لك الدنيا غالية مفيش فرص عمل كلام من فوق الوش إنما فعلا مصر مزروعة في قلب كل واحد " بلدي وإن قصت عليَّ عزيزةُ وأهلي وإن ضوو عليَّ كِرامُ "
ا/عمرالليثي : كرامُ صحيح صحيح
عميد بحري متقاعد/ نبيل عبد الوهاب : لأن أنا بقول لحضرتك أنا قلت يمكن أنا كده عشان أخويا إستشهد يمكن عشان تربيتي إن أنا طلعت لقيت أخواتي كمان كلهم ظباط لكن لقيت كل الجيش كده سواء اللي إتعاملت معاهم في الجيش الثالث لما كنت في الأديبية أو القوات البحرية كل الناس بيتمنوا بيقتتلوا عشان يشتركوا في العمليات
فاصل
ا/عمر الليثي : أحكي لي في حرب اكتوبر دورك كان فين وعملت إيه ؟
عميد بحري متقاعد/ نبيل عبد الوهاب : في حرب اكتوبركنت في أوائل اكتوبركنت في فرقة " حاجة إسمها القتال المتلاحم " زي الكراتيه في مدرسة التربية الرياضية في القاهرة وإذ فجأةً في 3 اكتوبر قطعوا الفرقة بدون سبب واضح وقالوا الناس ترجع وحدتها كلها ورجعت الإسكندرية طلعنا في عربيات الي رأس غارب مش عارف ليه ولا حتي كنت فاهم – حتي لااس غارب لو حضرتك تلاحظ أنها مش علي خط مواجهة وما كنش فيه نوايا وما كنش باين الحرب خالص بالعكس دا كان فيه نوع من الإرتخاء كده شويه في القوات المسحلة
ا/عمرالليثي : كانوا هكذا يبدو ........
عميد بحري متقاعد/ نبيل عبد الوهاب : آه ما هو طبعا من الخطط يعني عاملين فرصة للحج عن طريق القوات المسحلة ومين يقدم يعني ناس ريلاكس شوية ورحنا الي راس غارب قامت الحرب في 6 اكتوبر وإحنا في راس غارب المجموعة اللي موجودة كانت هتتجنن كنا مجموعة من الصعكة البحرية والضفاضع البشرية بنسمع عن الحرب في الراديو وإحنا الظباط بتوع الوحدات الخاصة معقولة يعني مش هنشترك يعني الواحد قاعد يغلي – لم يستمر هذا الشعور طويلا لإن كلفنا بالعملية أو هي كان مخطط لها يوم 9 اكتوبر العملية دية كانت تدميرمجمع البترول الرئيسي في حقل بترول البلاعيمي " حقل بترول البلاعيم دا في الضفة الشرقية " دا حقل البترول المصري بس كانت إسرائيل محتلة الضفة الشرقية فكانت بتستنزف البترول منه جاءت تعليمات إن إحنا ندمرمجمع البترول الرئيسي هناك عشان ما يستنزفوش البترول أكثر من كده – الحقل ده بيبقي فيه آبار بترول فيه 42 بير وكلهم بيتجمعوا في حاجة واحده بيسموها " البلات فورم إف تن " كان إسمه – يوم 9 اكتوبر كان البحرعالي جدا بس إحنا لو بلغنا القيادة بإن البحرعالي هيقولوا إلغوا العملية فإحنا طبعا سكتنا وكتمنا خالص والبحر كويس وجميل ويسمح بالعملية وطلعنا كان هناك تقاتل بيننا وبين بعضنا علي – طلعنا 8 ظباط في العملية دية هههه أصل كل واحد عايز يروح بإثنين زوديت طلعنا من راس غارب وصلنا الي حقل بترول بلاعيم نزلنا المياه علي مشارف الحقل وصلنا الي البلات فورم إف تن وحطينا الألغام فيه أنا حظي عمري ما رجعت راكب خالص يعني هههه
ا/عمرالليثي : هههههههههه
عميد بحري متقاعد/ نبيل عبد الوهاب : واليوم ده كان البحرعالي وبعد ما حطيت اللغم قعدت أدورعلي الزديت ما لقونيش مش لاقيهم قعدت إستنيت فترة لغاية ما الألغام قربت تنفجركانوا هم مشيوا طبعا قعدو يضوروا عليَّ ومشيوا فرحت راجع جات راس غارب عوم جاءت كان مسافه 23 كيلو
ا/عمرالليثي : بس زرعت الألغام في الحقل البترولي ؟
عميد بحري متقاعد/ نبيل عبد الوهاب : حطينا الألغام في البلات فورم إف تن
ا/عمرالليثي : طيب المقاومة كانت إيه بقى من إسرائيل في اللحظة دية ؟
عميد بحري متقاعد/ نبيل عبد الوهاب : لأ ما كنش فيه هم زي تقول كانوا مذهولين من الصدمة 6 اكتوبر دية كانت بالنسبة لهم يعني حد واخد الألم في نفسه إن أنا الفتوة في المكان أن القوي قوي قوي بس كانت صدمة شديدة بالنسبة لهم فمالقيناش أي مقاومة - نزلنا بس إحنا كنا عاملين حسابنا زدي كانت موجودة علي مشارف الحقل البترولي من بره وإحنا دخلنا سباحة وغطسنا وركبنا الألغام
ا/عمرالليثي : كان فيه أي ضحايا عندكوا أوخسائر ؟
عميد بحري متقاعد/ نبيل عبد الوهاب : لأ الحمد لله لم يحدث في عمليات الضفاضع البشرية كلها سواء في 73 أو في حرب الإستنزاف أو خارج مصر في أبيدجان أي حد ما فيش غير خسائر الله يرحمه فوزي البرقوقي هو الوحيد
ا/عمرالليثي : ورجعت عوم ؟
عميد بحري متقاعد/ نبيل عبد الوهاب : رجعت عوم
ا/عمرالليثي : كام كيلوا عمت ؟
عميد بحري متقاعد/ نبيل عبد الوهاب : 23 كيلوا ههههه كانت أعرض منطقة في الخليج
ا/عمرالليثي : ههههه دية أكبر حتي من إيلات بقى يعني في إيلات العملية الأولي عمت 14 كيلو مظبوط ؟
عميد بحري متقاعد/ نبيل عبد الوهاب : آه ههه دية ما بين بلاعيم وراس غارب الخليج – خليج السويس فيه حتت عريضة وحتت ضيقة دية أعرض منطقه 23 كيلو رجعت حتي من الحاجات اللي خوفتني بشدة إن أنا لما وصلت الشط عندنا كنت راجع منهك طبعا قوي وإبتديت أشوف الشط كده ويبدوا إن فيه ناس اللي هم حراسة علي البر شافو فيه حد في المياه المصريين بإبتدوا يستعدوا هيضربوا نارقلت يانهار أبيض يعني أنا نجيت من العدو نيجي للمصريين قعدت طبعا من أول ما إبتدت رجليَّ تلمس الأرض أنا الرائد نبيل عبد الوهاب من القوات البحرية المصرية ههه
ا/عمرالليثي : هههههههه
عميد بحري متقاعد/ نبيل عبد الوهاب : الي أن إبتديت أقرب
ا/عمرالليثي : قبضوا عليك برضه ؟
عميد بحري متقاعد/ نبيل عبد الوهاب : فإبتديت أمشي خطوة وأتكعبل وأقل فهم يبدوا قالوا حتي لوإسرائيلي دا يبقي صيده كويس نأخذه حي
ا/عمرالليثي : أسير حرب ؟
عميد بحري متقاعد/ نبيل عبد الوهاب : وصلت البر معاييش حاجة تثبت إن أنا مين يعني فأخذوني وحطوني في ملجأ هناك لغاية ما إستدعوا ظابط المخابرات – وظابط المخابرات لو جيه هيعرف ازَّاي ما أنا ماعييش لا كارنيه ولا ما أنا ما عييش حاجة لكن حظي الحسن ظابط المخابرات ده كان دفعتي هههه وأهلا نبيل إنت إيه حكيت له القصة
ا/عمرالليثي : طبعا إنت فرحت فرحة كبيرة لما لاقيته عارفك ؟
عميد بحري متقاعد/ نبيل عبد الوهاب : ما هم كلهم متشككين بس يعرفوا منين يصدقوني إزَّاي يعني ووصلت والحمد لله كانت عملية ناجحة بشدة تم تدمير طبعا البلات فورم
فاصل
عميد بحري متقاعد/ نبيل عبد الوهاب : من الحاجات الطريفة في هذه العملية دية كانت آخر عملية لي في الحرب بعدها خلاص الحرب وبعدها إشتركت في تطهيرقناة السويس شوية
ا/عمرالليثي : عام 74 ؟
عميد بحري متقاعد/ نبيل عبد الوهاب : 74 لغاية75 – 76 حتي إفتتحتها القناة سنة 75 كنا بنستمر في التطهير ما بين الكونفوي والثاني وطلعت من البحرية وإشتغلت شويه كده مرشد في قناة السويس وقبطان في المراكب التجاري وبعدين لقيت فرصة ان انا أرجع ثاني للغطس الغطس اللى أنا بحبه واللى كان شغلتى طوال فترة خدمتى فى القوات البحرية فرجعت اشتغلت مع شركة طليانى قالولى ان لنا شغل فى البحر الاحمر فقلت ماشى ورحت فين الشغل فى ابورديس وصلت أبورديس بأسأل عن طبيعة العمل فطلع إنه إصلاح الفلات فورم اف تن اللي أنا دمرته في الحرب ههههههههه
ا/عمرالليثي : ياه هههههههه
عميد بحري متقاعد/ نبيل عبد الوهاب : بس كان طبعا بعد السلام إحنا أخذنا الضفة الشرقية وأخذنا شركة بترول بلاعيم وبقي بتاعنا فرجعت صلحته دا اللي أنا كنت ضربته في الحرب كانت من المفارقات الطريقة يعني
ا/عمرالليثي : إتجوزت سنة كام ؟
عميد بحري متقاعد/ نبيل عبد الوهاب : إتجوزت سنة 74 – سنة 73 أنا كنت خاطب
ا/عمرالليثي : قبل الحرب خطيبتك كانت مشاعرها إيه وهي متجوزة بطل ورايح الحرب
عميد بحري متقاعد/ نبيل عبد الوهاب : والله كما هى العادة طول الوقت قلقة عليَّ لأن في الحرب إحنا ما كنش – ما بنقلش إحنا فين ولا حاجة يعني إنما آهوه طول الوقت قاعدة قلقة عايزة ترجع تتجوز هههههه
ا/عمرالليثي : عندك أولا أد إيه ؟
عميد بحري متقاعد/ نبيل عبد الوهاب : عندي عاليا ويارا كبروا وجابولي 3 أحفاد عليا جابت عمر ويارا جابت فريدة وجنا بأسعد بيهم بشدة طبعا
ا/عمرالليثي : ساعات تقعد تحكي لأولادك عن البطولات اللي إنت عملتها عارفين إن أبوهم بطل وعارفين إن هوعمل شيئ عظيم لمصرولا مش عارفين ؟
عميد بحري متقاعد/ نبيل عبد الوهاب : هقول لحضرتك حاجة جميله بيعملها الإعلام زي ما حضرتك بتعمل دلوقت قبل ظهورفيلم الطريق الي إيلات ما كنوش يعرفوا حتي لوكنت بقول لهم فهم بالنسبة لهم طيب عملت إيه ما إنت بتشتغل ظابط والظباط هم لازم يروحوا يحاربوا طيب ما فيش حاجة جديده دية شغلتك يعني لكن لما طلع الفيلم وشافوا إن الأعمال دية بطولة بقوا قد إيه فخورين بي وقد إيه هم مبسوطين
ا/عمرالليثي : صحيح الإعلام المصري الحقيقة عمل دوركبير جدا في إنتاجه السينمائي خصوصا فيلم الطريق الي إيلات إتحاد الإذاعه والتليفزيون قطاع الإنتاج أنتجه في الفترة دية في الحقيقة كان شيئ مهم إن إحنا نعرف أجيال كتيرة جدا دا دور الإعلام عامةً ودا مش غريب علي الإعلام وإحنا دا حققوا علينا إن إحنا لازم نستضيفكم ونشد علي إيديكم ونقول لكم دائما شكرا
عميد بحري متقاعد/ نبيل عبد الوهاب : الله يخليك ويبارك فيك أنا متشكر قوي
ا/عمر الليثي : أنا سعدت جدا بهذا اللقاء وسعدت إن أنا قاعد مع بطل من أبطال مصر وفخور إن أنا قعدت معاه وأتمني لك كل سعادة وكل خير وكما إديت مصر إحنا كمان بنقول لك متشكرين جدا وكتر خيرك
عميد بحري متقاعد/ نبيل عبد الوهاب : أنا اللي متشكر قوي علي هذا اللقاء الممتع اللي بيدي فرصه زي ما قلت الناس تعرف حاجة من اللي حصلت في الحرب ودية حتي اللي أنا بحكيه ده جزء صغير قوي فيه بطولات كبيره قوي إتعملت في الحرب يعني إن شاء الله تيجي فرصة والإعلام يظهرها للناس بإذن الله
ا/عمرالليثي : إن شاء الله بإذن الله أشكرك جداً وإتشرفت جدا بوجود سيادتك معايا
عميد بحري متقاعد/ نبيل عبد الوهاب : متشكرقوي وكل سنة وحضرتك طيب
ا/عمرالليثي : وحضرتك طيب بأشكركم جداً جداً كان معاكم النهارده بطل من أبطال مصر لعب دور كبير عشان خاطر تحريرالأرض دوركبير في البحرية المصرية هو ورفاقة لهم كل الحب والتقدير والإحترام تحية لشهدائنا في حرب اكتوبر وفي حروب مصر جميعها من 48 و56 و67 والإستنزاف و 73 وأيضا حية لأبطالنا الأحياء اللي موجودة علي قيد الحياة اللي هم أفنو حياتهم في سبيل ومنهم هذا الرجل العظيم نبيل عبد الوهاب أنا حبيت إن أنا أقدم لكم هذه الحلقات مع بطل من أبطال مصر كنموذج يحتذي به كنموذج أيضا لزملاء له كثيرين ما كنوش معانا لكن إحنا أيضا من خلال هذه الحلقات بنوجه لهم كل الشكروالتقدير والإمتنان والإحترام نشكركم جدا وكل سنة وإنتم طيبين وبمناسبة حلول عيد الأضحي المبارك ربنا يجعله عيد سعيد عليكم وعلينا يارب وعلي مصركلها كل سنة وإنتم طيبين ونلتقي إن شاء الله في حلقات قادمة وإختراق