السطور القادمة فيها عمرو أديب الذي نعرفه جيدا بنفس أسلوبه وطريقة كلامه ولكن مع اختلافين فقط.. الأول دوره في الحوار فهو يجلس على كرسي الضيف.. الثاني إنه بالملابس الكاجوال.. شوف عمرو في حوار أكيد مختلف سألناه فيه عن كل حاجة بصراحة في السطور القادمة.. تصوير: محمد عادل يقال أنه توجد بعض الشخصيات في برنامجك لتمثيل رأي الحكومة فهل هذا صحيح؟؟ هو في رأيين دائما... رأيي ورأي الحكومة.. جايز الحكومة هي الصح حد عارف؟!! لما نموت ونطلع عند ربنا يبقى يقولنا الحقيقة.. لكن الرأي الثاني عادة لا يكون متوازنا ويكون منحازا للحكومة بشكل صريح.. وأنا كمان مش متوازن.. أنا كمان رأيي عكسي خالص.. ما أنا مقدرش أقول لازم البلد تبقى ديموقراطية والناس تقول رأيها ويبقى البرنامج رأي واحد، يعني أنا لو شايف النهارده إن الحكومة محلتش أزمة العيش في واحد تاني هيقولك لأ الأزمة اتحلت وبيوزعوا العيش لحد البيت والناس سعيدة جدا وزي الفل.. مقدرش أمنع ده.. شعرنا بعد صدور وثيقة البث الإعلامي أنك قيدت من نفسك قليلا فهل هذا حقيقي؟؟ لعلمك أنا مقرأتش الوثيقة ومعرفش فيها إيه.. خد بالك إحنا زي المشرحة: في قتلة هنشتغل مفيش خلاص، وبعدين خدوا بالكم إننا مش قاعدين في سويسرا بردو المسائل فيها يوم عالي ويوم تهدي شوية ما إحنا كمان بني آدميين. أغلب ما أشاهده في برامج التوك شو يعطيني صورة أن الأوضاع في مصر سيئة للغاية والمشاهدين يسألوا نفسهم.. هو مصر كانت كده من زمان ومكناش عارفين ولا دي أمور مستجدة؟؟ مصر لا كانت كده ولا بقت كده إحنا اللي بنعرضهولك هو اللي موجود إنت شايفه كويس أو وحش فدي مسائل نسبية، فأنا لما أقولك زي من يومين إن في 26 قرية مفهاش مية وأجيب المسئول وأواجهه فأنا ببين ده علشان أحللك المشكلة مش علشان أسليك وأقولك ياه البلد سوده!! يعني اللي بتعملوه هيكون له فائدة في النهاية؟؟ أيوه طبعا على الأقل بيخليهم يفكروا كتير ويجملوا ويلطفوا ويردوا.. هو كان في حد بيرد عليك ياراجل؟!! دلوقتي يرد ويقولك لأ الوضع مش كده، كل مسئول دلوقتي حاسس إن عليه عين يقولك لا يا عم ده بليل هيقولوا .. في قوانين كثيرة في مجلس الشعب غيرناها وفي قوانين مكانتش داخلة إحنا دخلناها.. إحنا اي حاجة نقولها ممكن تقلب الدنيا دلوقتي.. ما دمنا نتكلم عن الفائدة فخلينا نفتكر الحملة التي قدتها عن قانون الممارسات الاحتكارية والقانون مر في النهاية دون أي تغيير!! لأ القانون إتفهم إن فيه مشكلة والناس كلها عرفت إنه اتعمل بشكل مشبوه وإنه قانون معيب وإنه الحكومة هتضطر تغيره وأنا الوحيد في مصر اللي اتكلمت في الموضوع ده ولو مكنتش اتكلمت ولا حد كان هيقولك إنت فين وكان خلص القانون وعدى ومشي.. تعالى بقى شوف الدورة الجاية قانون الاحتكار هيتعدل إزاي وبعدين أحمد عز طلع في كل وسائل الإعلام ليه؟؟ لأنه حس إن في قوى موجودة ولازم يحسن صورته قدام الرأي العام.. قبل كده مكانش في الكلام ده.. وسط كل معاركك.. إيه أم المعارك بالنسبة لك؟؟ كل يوم هي أم المعارك لكن أشدها الخاصة بالحديد فأنت تواجه واحد من أقوى الرجال في مصر.. واحد حاطط إعلاناته في كل حته ومحدش يقدر يقرب له . بصراحة: مش شايف إنك كتير بتعمل من الحبة قبة؟؟ ومالو.. يعني لو ده لمصلحة مصر ليه لأ؟؟ أنا هقولك على معلومة غريبة جدا.. أنا بشتغل ب 10 % من اللي أنا أعرفه أو من الطاقة اللي عايز أشتغلها لأن الحقيقة أكتر من كده بكتير.. البعض يعيب عليك استخدامك كلمات غير لائقة في البرنامج مثل " مزة " والتحدث في مواضيع حساسة بشكل صريح.. أنا ليه طريقة.. حادة شوية في السياسة وكل حاجة يعني أنا بتكلم في الأشياء من آخرها فأنا مش من النوع اللي يقول " زي ما إنتوا عارفين الموضوع " أنا بتكلم بشكل واضح جايز يعجبك أو ميعجبكش بس ده عمرو. وضوحك ده مبيخوفكش في بعض الأحيان؟؟ أكيد بخاف طبعا لكن " إذا كان من الموت بد فمن العار أن تموت جبانا " ده شعاري في الحياة.. يعني لو البرنامج ده هيخلص يخلص على حاجة كويسة.. على كلمة حق.. في مواقف الحياة العادية بتكون بنفس الاندفاع؟؟ في المواقف العادية مبتكلمش.. القاهرة اليوم يستهلك كل قدراتي الكلامية وكل الأشياء التي أفكر أتكلم فيها بتكلم فيها في القاهرة اليوم فالقاهرة اليوم مواطن قوي.. بمناسبة "المواطن القوي" في أحد حلقات البرنامج شرحت نظرية " أن تعيش أسدا " والتي كنت تعني بها أن لا يتهاون أي أحد في حقه مهما كان صغير وقلت أيضا إنك تعبت لما مشيت بيها.. تفتكر في الواقع العملي بعيد عن التنظير نقدر نعيش بيها في مصر؟؟ آه طبعا القضية دلوقتي إن المهم جدا إننا نواجه.. إني مش هعمل دي كده.. الحاجة دي مش هعملها كده إنما هعملها كده.. وجرب دلوقتي.. جرب لما تروح حته معينة تقول لأ ده مش عاجبني.. الناس بقت بتخاف لحسن تكون بتصور لهم يعني المسألة مبقتش على عينك يا تاجر زي زمان.. فكرة الرقابة بقت موجودة وده اللي عاجبني جدا.. مفيد فوزي قال إن النجاح في مصر له سقف.. مش بتخاف تعديه؟؟ لا مصر معادش فيها أي أسقف لأي حاجة.. مصر بقت مذهلة دلوقتي في كل الأسقف .. سقف اقتصادي أو سياسي.. ناس كثير معديه السقف.. السقف ده كان زمان إنما دلوقتي عادي.. من سنة قلت أنك بتمشي على الحبل في البرنامج وإنك تتمنى تنطه.. نفهم من كلامك إنك دلوقتي نطيته؟؟ لا لسه ماشيين على الحبل طبعا إنت متعرفش هتجيلك منين.. زي ماتبقى معدي في جبهة وماشي كده بتمص قصب وأنت في جبهة اثنين بيضربوا رصاص ولكن دي جبهة مش عارف هتجيلك منين.. ممكن محامي غيور في البدرشين يرفع عليك قضية يلففك عمرك كله ويكرهك حياتك. فأنت بتقود رأي عام ودي مسألة مش سهلة أبدا.. بص السنة اللي فاتت دي هاتلي قضية واحدة عملت دوشة مكانش وراها القاهرة اليوم.. بمناسبة كلامك عن الحرية.. نشر إن استبعاد بلال فضل من البرنامج كان بأوامر من جهة عليا.. معنى كده إن الحرية ليها سقف.. بلال مشالتهوش جهة عليا أو سفلى.. بلال عنده موائمة وأنا كنت من أكثر الناس المتحمسين له بس كان في وضع لازم نضحي بحاجة بدل حاجة والمسألة مكانش فيها إختيارات كثيرة يعني إن في مشاكل وقضايا وفي حجات كثيرة فقولنا بس الأمور دي تهدى وبعدين نفكر في الحكاية.. نقل البرنامج على اليوتيوب والوصلات المسروقة نقطة إيجابية للبرنامج ولا سلبية؟؟ نقطة إيجابية جدا كل الناس بتتفرج عليه أنا بستغرب جدا لما يذكر اسمنا وسط البرامج وبقول ياااااه يعني وسط الناس دي اللي قنواتها مفتوحة الناس شايفانا ؟؟ بتقرأ التعليقات المكتوبة على مقاطع برنامجك على اليوتيوب؟؟ ساعات بس مبلحقش لكن بنبسط لما ألاقى فيديو دخل عليه 881 ألف بني آدم .. مليون واحد.. مسئولية فظيعة جدا... ده دول اللي على اليوتيوب غير اللي بيتفرجوا عليك بليل.. بمناسبة التعليقات.. أحمد رجب تعجب في نص كلمة من قدرتك على الضحك رغم كل المشاكل اللي بتتكلم عنها.. ردك إيه على تعليقه؟؟ هو ده المصري.. قاعد بيضحك كل يوم وعنده مشاكل وبلاوي الدنيا.. واقف في طابور العيش بيهزر.. واقف عنده مشكلة في الحديد وبيضحك.. كمية النكت اللي بتطلع على كل حاجة.. هو ده المصري.. إحنا بنموت وإحنا بنبتسم.. شايف إننا ماشيين للأحسن؟؟ أكيد.. إحنا بنقدر نعبر عن راينا وناخد وندي والباقي بقى في إيدينا إننا نكمل ومنسيبش الحجات تمشي كده وبعدين سيبك من الحكومة إحنا شعب غير منتج.. بصوا للشعوب اللي حوالينا عاملة إزاي.. بص للأردن يا راجل.. شوف اللبنانيين بنوا لبنان كام مرة .. إحنا لغاية دلوقتي بنرمي زبالتنا في الشارع.. هقولك حاجة بسيطة.. كام مرة تمشي ورا واحد في عربية تلاقيه فتح الشباك ورمي كيس يوستفندي في وسط الشارع!! إحنا لازم نتحسن.. إنت مبتكونش نضيف علشان الحكومة.. لو عملت كده تبقى زي الزوجة اللي تقول " وإحمد ربنا إني مخلصالك!! " لا إنتي مش مخلصالي علشان متجوزاني.. إنتي مخلصالي علشان ست محترمة.. عارف إنهم على الفيس بوك رشحوك إنك تتولى رئاسة الحكومة؟؟ أنا منفعش أبقى مسئول خالص.. أنا أعرف أعبر عن الناس لكن أنا مبصحاش بدري ومدير فاشل.. كلامك ده بيأكد وجهة النظر التي تقول إن المعارضة مش فالحة غير في الكلام ولو إدلوها الفرصة مش هتكون قد المسئولية!! لأ أكيد في ناس غيري ينفعوا يبقوا وزراء إنما دي مش شغلتي وأنا مبجريش وراء كرسي .. أنا شغلتي إني آجي أنور لك دماغك.. وده دور الإعلام وده اللي بيمهد للتغير دايما.. البعض يقول إن الفترة الجاية في مصر هتكون فترة مخاض ما قبل التغيير واللي ممكن يؤدي إلى كارثة.. رأيك إيه؟؟ تاريخ مصر مفهوش كوارث وفي أسوأ ظرف عندما أغتيل الرئيس محمد أنور السادات تاني يوم كان في مجلس شعب ورئيس دولة.. دائما الانتقال في مصر سلمي.. الخمسين سنة اللي فاتوا هاتهم من يوم الملك لحد النهارده هتلاقيهم بيأكدوا كلامي .. إنسى الموضوع ده خالص. ليه كتير بنلاقيك في البرنامج بتتكلم عن القهوة مثلا وإنك رحت الحسين أكلت كوارع وغيرها من الأمور الشخصية.. الناس بتحس أنها بتتعاطف معاك وإنهم بيقربوا منك ففعلا الناس لما تكلمني يقولوا إحنا عارفين إنت بتاكل إيه وبتشرب إيه وبتقعد فين وبعدين خدوا بالكم من حاجة: إنتم عندكم 20 مذيع مثلا على الساحة.. لازم يكون فيهم واحد مختلف.. يعني أنا مثلا مش مساء الخير معاي ورقة بقرأ منها والأسئلة مكتوبة.. لعلمك أنا الناس اللي بتشتغل معايا متعرفش هقول إيه وعمري ما كان قدامي أسئلة مكتوبة ولا ورق وعلى فكرة لو درست في كلية الإعلام هقولهم متعملوش زيي أنا المذيع الغلط.. يعني كتاب كيف تصبح مذيعا أنا عكسه كله.. وده مع الخبرة يعني مثلا في ابو تريكة يحب إنه وهو جنب الجون يحط الكورة بكعب رجله دي محدش هيعملها غير لو لعب الكورة دي 40 أو 50 مرة وهو عنده الموهبة دي إنما لو أي ناشيء هيقولوا له حطها ببطن رجلك كده وخلاص.. بمناسبة الكرة.. إيه حكايتك مع الزمالك؟؟ أنا زملكاوي وبحب الزمالك وبزعل عليه وهعمل إيه؟؟ وعلى الفكرة أنا المذيع الوحيد الذي يجهر بزملكاويته، في زمالكاوية كتير وإعلاميين كبار جدا إنما ميقولش علشان ميفقدش جماهيريته.. إنما أنا هعمل إيه ربنا خلقني كده زملكاوي.. يعني اخويا الكبير أهلاوي وأخويا الصغير أهلاوي إنما أنا ربنا خلقني زملكاوي هعمل ايه يعني؟؟ لكن إنت لما الأهلي بيخسر بتعمل فرح!! أنا بجهر!! أنا راجل مش زي بقية الإعلاميين اللي هو بيوائم ومش عارف إيه.. يعني لما بتغلب مصر كلها بتبعتلي لدرجة إن في أهلاوية بيتبسطوا مش من إن الأهلي كسب ولكن لأني إتنكدت .. يعني سعادتهم إن عمرو زعل ومسجات زي الرز.. فلما يتغلبوا بقى يأخذوا شوية.. في بعض الأحيان بنشوفك بتعمل طيارة ورق وتطيرها أثناء حديث الضيف.. تقصد إيه بكده؟؟ طيارة ورق درجة في البرنامج عندي معناها إن الكلام اللي بتقوله مش داخل دماغي بنكلة فهعمل طيارة ومركب.. ولكن لما عملت كده في حلقة مساعد المدعي العام الاشتراكي الأسبق الناس فسرت ذلك بأنك خايف!! لأ أبدا ما هو قال اللي هو عايزه ولو كنت خايف مكناش جبناه أو كنت أمشيه الفقرة اللي وراها أنا كملته للآخر وسبته يقول كل حاجة.. قضية الرأي العام عمرها قصير في مصر؟؟ بص: أي قضية دعارة في مصر إديها 6 شهور.. شوف بقى.. 6 شهور ومحدش هيفتكر عنها حاجة!! ده بيساعدك ولا يصعب مهمتك؟؟ لا ما ده دوري.. نفضل نتابع دي شغلتك وأجندتك.. إزاي.. مثلا قضية العبارة.. مين يفتكر ممدوح إسماعيل دلوقتي؟؟ إحنا كل ما يجي مناسبه بنجيب سيرته لكن مينفعش نطلع عينه لأن الراجل لازم يأخذ محاكمة عادلة فهو مكانش جوز أمي وإنما كل ما تيجي مناسبة بنفتكره وحاطينه على الأجنده.. ليه أجريت استفتاء " تمراوي ولا عمراوي " ؟؟ انت مش بتخش ع النت؟؟! أيوه وعليه قالوا ان عمرو عمل كده علشان يضايق عمرو دياب لأنه زعلان منه.. لعلمك.. الإثنين زعلانين.. كلم تامر حسني واسأله تروح لعمرو في القاهرة اليوم وشوف هيقولك إيه وكلم وعمرو وشوف هيقولك إيه.. عمر ما تامر أو عمرو هيطلع في البرنامج .. في رأيك ما سبب تكبر الفنانين والهالة التي يصنعونها حولهم؟؟ والله بص اللي لاقى الدلع ومدلعش يحرم عليه الدلع!! ده راجل شالوا عربيته زي عبد الناصر في سوريا لما توصل للمرحلة دي فين بني آدم عقله ميخفش يعني!! مزهقتش؟؟ بزهق طبعا.. إنت ممكن النهارده متروحش أنا لا يمكن.. أنا لو ضرسي وارم قد كده بروح وأفرج الناس وأقولهم شايفين ضرسي وارم إزاي ومش عارف أشتغل.. بمناسبة ذكرك للإعلانات.. مش شايف إن وقت الإعلانات في البرنامج مبالغ فيه لدرجة تخنق حتى إن على الفيس بوك في حملة تطالب بتقليل وقتها؟؟ عندك حق وعلشان كده طلع قرار اننا هنضرب ثمن الإعلان في 3 علشان نقلل زمن الإعلانات.. لماذا أفردت نصف ساعة من البرناج لتؤكد أنه مصري؟؟ لأن في ناس قعدوا يروجوا عن هذه المسألة كتير وكانت عايزة تقفل البرنامج وأنا كنت بدافع عن وجودي، أنا معرفش أي حاجة عن السعودية يعني أنا لو بعمل الرياض اليوم ههاجمها وبعدين هو مين أول واحد إتكلم عن كلاب الأمير في مصر وهو صاحب السمو الملكي يعني مش أمير صغير.. ليه شاركت في أحد الحملات الإعلانية؟؟ أنا عملت إعلان لشركة محترمة جدا معملتش اعلان لا زيت ولا سمنة وبعدين خد بالك أنا مباكلش عيش غير من البرنامج اللي بشتغل فيه بليل ومعنديش أي وظيفة أخري فعلشان أقدر أحافظ على البدل والكرافتات والساعات وإن ميبقاش في حد يقدر يشتريك أو يسيطر عليك بشكل أو بآخر يعني متبقاش إعلامي بصندوق بيض أو فرختين دايما لازم يكون عندك دخل يخليك تقدر تقول آه أو لأ يعني لو البرنامج ده وقف النهارده هعمل إيه؟؟ هاكل منين بعد كده وعندي عيال وكده؟؟ كل حاجة في الدنيا لها عمر افتراضي.. لما يخلص عمر القاهرة اليوم الافتراضي هتعمل ايه؟؟ هبطل.. أنا بقالي 10 سنين عملت فيهم رقم قياسي مفيش مذيع عمله في الوطن العربي .. اضرب 3 ساعات في 10 سنين وشوف ساعات الطيران دي وشوف اي مذيع تاني في الوطن العربي ومش عايز اقولك في العالم كله!! انا يوم ما أبطل النهارده هيكون عندي حجات كتيرة قوي أتكلم عنها.. والمفرض الواحد اللي يكون مكاني يبقى خلص.. في بعض الأحيان نجدك تؤكد نجاح البرنامج وإنه أصبح زي الجنيه الذهب.. مش شايف ده غرور؟؟ لا أنا مش مغرور لكني حاسس بالجدوى وبنجاح البرنامج وقصة الجنيه الذهب مبقولهاش غير المناسبات التاريخية بس.. يعني خد عندك لما كان عندنا موضوع بنك الطعام ودخل رجل أعمال وحط 10 مليون في دقيقة.. مش تحس بالنجاح؟؟ شوف دول هيأكلوا كام واحد في كام سنة وإنت عامل حلقة.. أنا ساعتها قلت إني هقوم أرقص.. حادثة رمي مادة كاوية على عربيتك وصلت لك رسالة معينة؟؟ رسالة تافهة وأنا يوميها قلت لهم كان ياريت يسيبلي الكارت بتاعه علشان نعرف هو مين ومنقربلوش.. أصل لما جه الضابط سألني وقال بتشتبه في حد قلتله خد يوم من أول النهار كله ومش هعرف أنهي واحد فيهم لأن عندنا مشاكل مع ناس كتير. قلت لنا إن في ضيوف يخافوا يجيوا القاهرة اليوم.. في ضيف ممكن تخاف منه؟؟ لأ أنا بعمل حساب الشغل إنما مبخافش من حد.. يعني ببقى جاهز والباقي على ربنا فلو إنت شاطر ومدقدق وعرفت تجيب جول فحلال عليك ياعم المتش.. إنما أنا بكون مدرب ومظبط نفسي وكل حاجة.. حمدي قنديل قال لي أحد المرات إنه بعد كل حلقة يحس إنها قوية بيكافئ نفسه بشراء كرافته.. إنت بتكافئ نفسك إزاي؟؟ لما بكون سعيد ممكن أروح اقعد على قهوة وآكل حاجة حلوة وبعدين خد بالك إحنا عندنا صلاحية الحلقة الكويسة ساعتين ثلاثة لأن تاني يوم في حلقة تانية ولو وحشة الناس بتبهدلك وينسوا اللي فات عادي يعني.. ممكن تقرر تنهي حلقة قبل معادها؟؟ أبدا ولا الهوى هو في حد يقدر ينزل الطيارة قبل معادها.. لو نزلت قبل معادها هتنزل في الميه.. دي ليها مكان للوصول لازم تهبط فيه. تعمل إيه لو: الصوت اتقطع على الهواء؟؟ هنقعد نكمل البرنامج عادي جدا والناس هتتفرج علينا في كل الأحوال وهيبقوا مستنين الصوت يرجع وهنكمل الحلقة ونهزر ونضحك ونجيب حد يرقص. الضيف اللي معاك بيرد عليك بكلمة؟؟ ببتدي أنا أتكلم وأستفزه وأناكشه لحد ما يتكلم.. ضيفة لقيتها بترد عليك بأسلوب مائع وغير لائق.. تعمل إيه؟؟ محدش بيعمل معايا كده.. مينفعش.. بص في قواعد في القاهرة اليوم وحجات مفهومة.. إنت جاي تتكلم وإنت جاي برنامج صعب.. اللي ناوي يعمل الحجات اللي بتقولها مبيجيش..
