ضد الوطن والدين!.

اكتب يا قلمى وبوح ...... سطر آلام وجروح
عن وطن حزين مجروح ..... قل لى الحقيقة فين؟
آمال كتير بتروح ...... والفرح مش مسموح
والحلم فيه مذبوح ....... والدمع مالى العين
الحق فيه ضايع ...... والقتل فيه شايع
والشارى صار بايع ...... وبقينا مش فاهمين!
عن فوضى فى الشارع ....... وشباب بيتصارع
خلّوا البلد والع ...... وروّعوا الآمنين
اكتب عن الهلفطة ....... والسرقة والمرمطة
ومؤامرة متخططة ....... ضد الوطن والدين
عن ناس كتير محبَطة ....... أوضاعها متلخبطة
أشكالها متحنطة ....... عايشين ومش عايشين!
اكتب عن السفسطة ...... عن نخبة مستعبطة
بالدنيا متشعبطة ...... قلبت شمالنا يمين!
فضايحها مترطرطة ....... فى خيانة متورطة
ع الشعب متعفرتة ....... قابضة الثمن ملايين
اكتب وقول يا قلم ...... عن شعبنا اللى اتظلم
من السعادة اتحرم ...... تعبان بقاله سنين
مهموم وحاله عدم ...... مجروح بينزف ألم
عايش عشان يتصدم ....... يا مين يداوى مين؟
اكتب عن الخيبة ....... والضعف والعيبة
ورئيس بِلا هيبة ....... ساكت على الخاينين!
يكونش مش عارف ....... لا سامع ولا شايف!
معقول يكون خايف؟ ....... ده يبقى أمر مشين
فيه كارثة ومصيبة ....... وطن بقى نهيبة
شبابنا زاد شيبة ...... والهم صار همين
دفع الثمن غالى ...... وَطَّ اللى كان عالي
ظلمه نظام حالى ....... ثاروا ومش طايلين!
اكتب عن الفَتّة ....... والكعكة والتورتة
لا حد ساب حِتة ...... للفقرا والمساكين
قلوب بقت شتى ...... أخلاق بقت فالتة
أزمات كتير ثابتة ...... والمسؤولين نايمين!
اكتب ولا تخبيش ..... كلام يدوم ويعيش
صادق وما بيؤذيش...... يواسى المظلومين
الوضع ده ما يرضيش ...... ضغوط ما بتنتهيش!
تعبنا إمتى نعيش؟ ...... ونكون م المرتاحين
زهقنا واحترنا ...... يا رب صبّرنا
ع الظَلَمة قَدَّرنا ....... خلَّصنا م الفاسدين
أعداء بتقهرنا ..... قاصدة تأخرنا
قادر تحررنا ..... آمين يا رب آمين.