يا حكومة.. يا معارضين

الناس زهقانة.. الناس قرفانة الناس عايشين على طول خايفين
يا حكومة.. يا معارضين جربتوا تشوفوا الناس أزاى عايشين
يا حكومة.. يا معارضين
فى ناس تعبانة.. وفى ناس زعلانة وفى ناس عايشة كويس .. وناس كويس إنهم عايشين
فى ناس غلبانة.. وناس حزنانة وناس بتموت بعض عشان جاعنين
يا حكومة.. يا معارضين
فى ناس شقيانة.. وناس طهقانة وناس بدأت تبيع فى الناس علشان مش لاقين
فى ناس غرقانة.. وناس عطشانة وناس تتمنى تعيش بنى آدمين
يا حكومة.. يا معارضين
فى ناس مهمومة.. وناس مكتومة وناس بتحاول تلقى فوسط الناس(قنديل)
فى ناس محكومة.. وناس مظلومة وناس مش لاقية الرحمة بتلف دموعها بميت منديل
يا حكومة الاناديل .. يا معارضة المخابيل
فى ناس بيضيعوا .. وفى ناس بيصيعوا وناس محتارة.. تمشى فى أى سبيل
يا حكومة.. يا معارضين
بصوا فوش الناس.. هتحسوا ده الإحساس
زمان عرفنا حكمة عظيمة
الجنة من غير ناس.. ما تنداس
يا حكومة.. يا معارضين
إلى متى هذا التناحر والصراع إن ما تفعلوه يجعل البلاد على أعتاب خراب وهلاك فكل منكم يمسك بطرف من الحبل ويجذب الآخر نحوه بشدة وبعنف والخاسر الوحيد فى هذه المعركة هم الناس.. الشعب المصرى العظيم فهو الذى تنهار مقدراته ويهوى اقتصاده.. وأنتم مازلتم تتنازعون يا حكومة الشعب وصل إلى مرحلة اليأس، وما كان هذا عهدكم عندما وصلتم إلى سدرة الحكم فإلى هذا الحد يهون عليكم الشعب المصرى الذى أجلسكم على كراسى الحكم؟! الشعب يتمزق مما يحدث فى البلاد، وأنتم لا تحركون ساكنا.. أناشدك يا دكتور مرسى اتق الله فى البلاد والشعب.. يا دكتور مرسى الشعب بيتحرق فى اليوم مائة مرة فما أنت فاعل؟ وأنتم أيها المعارضون المفسدون أتعتقدون أننا أغبياء لا نعلم أهدافكم هل الديمقراطية أن تخرجوا على 12 قناة فضائية تسبون رئيس البلاد بشتى الطرق وأحط الألفاظ أكنتم تستطيعون فعل ذلك فى العهد البائد، أقسم بالله لكنتم فى مكان لا يعلمه إلا الله ده إذا كنتم أحياء أصلا.
اتقوا الله فى البلاد والعباد وكونوا أداة بناء لا هدم لأن الكرة سوف تأتى عليكم يوما وستعاملون بالمثل.. كونوا معارضة بناءة تفيد الراعى والرعية.. أيتمزق أحدكم كما يتمزق الشعب المصرى أيجوع أحدكم، كما يجوع الناس فى الشارع.. يا أهل المعارضة الشعب ينقسم وقريبا سيقتل الأخ أخاه.. إن ما يحدث فى البلاد لم يمر على تاريخها إلا فى عهدكم أنتم والحكومة فلن يغفر لكم التاريخ أبدا.. فى ناس الموت ريحها.. وفى ناس الحزن دبحها.