كَانْ حِلْمْ وِتَاه !!

فاكرين الحلم اللى حْلِمناه
كان حِلم كِبير
ولا فى الأحلام
ولا فى الأساطير
بس الأحلام عندنا بتطير
زى العصافير
ساعات نتغدى بنفس الحلم
ونسأل إمتى يعيش و بخير
الحلم يا ناس اللى حلِمناه
كان من سنتين
كان عيش حرية معاها حَياة
و عدالة و دين
كان حلم بفرحة بنتمناه
لسنين جايين
كان حلم شيوخ الْمُر عَاشُوه
لكن صابرين
كان حلم بيوت و شباب ثوار
و بنات حلوين
لا يخافوا من موت ولا ضرب النار
و دخان وأنين
وعشان الحلم ساعتها يعيش
الكل بيجرى على الميادين
وفى يوم الجمعة ملاك الموت
واقف بثبات مستنى حزين
الثورة الطاهرة تبتدى بمظاهرة
و الفجر بِيِدَّن للثايرين
الشعب يْكَبَّر كُله معاه
الحلم حقيقة واخدنا لفين
الحلم ساعتها كتب له ميلاد
بدماء شهداء و زهور بساتين
الإيد فى الإيد كتبوا المواعيد
لجنان رايحين
المسك العنبر هيقول إيه
شاف دم شهيد وَرْد و رياحين
من قلب ميدان الثورة لفوق
طالعين للجنة مع الخالدين
الحلم يِكَبَّرْ الثورة تِطَهَّرْ
فى فساد و عناد ظلم الحاكمين
الله يا ولاد على الحلم ساعتها
على لحظة وِحْدَة بلدنا دَعِتْهَا
.........................
و تْمُر ساعات و شهور و سنين
لا اتغير حال ولا شفنا جمال
ولا شفنا السعد ولا الملايين
والصورة مكسورة
مش نفس الصورة
بدلنا الحلم بحلم حزين
العيب فى الحلم ساعتها أكيد
و لا العيب فى البنى آدمين
أحقاد بتزيد والنار بْتْإِيد
وبتحصد أرواح المساكين
دلوقتى بدأنا نفوق م الحلم
لا لقينا العدل اللى عشقناه
ولا جه بحصانه صلاح الدين
العيش بكوبون وتلاتة فى اليوم
وكوبون بنزين
و جنيه بيعُوم و دولار بيقُوم
ضارب اْسْفِين
بِيْغَلِى الدنيا بحالها معاه
وغِيلاَن واقفين سَانْيِنْ سكاكين
الحلم يا ناس اللى حلمناه
إزاى هنجيبه فى يوم لو تاه
لو ضاع حلمنا كده من وسطنا
علشان فيه ناس مننا قاتلاه
حلمنا كان إيه كان حلم جنون
كان حلم حقيقة و طوق لنجاة
الحلم هَيِرْجَعْ لما الإيد هتكون فى الإيد
الحلم حقيقة لو هنحافظ عالمواعيد
لو قلنا استنوا سنة سنتين
نستنى أكيد
مش نجرى نقول فى حلول ميت يوم
ونعيد ونزيد
و نقول للناس الجنة خلاص
حتى الغلبان هيبات كسبان
فرحان و سعيد
و يمر بدال الْمِيَّة اتنين
والْبَلَّة يزيد وياها الطين
وعشان الكرسى نعادى فى بعض
ونقتل بعض
بلاها سياسة بلاها أحلام وتجارة بدين
كان حلم و تاه
كلنا ننساه .... باركوا لآسفين
كان حلم عبيط
أحلام مجانين .... أحلام مجانين