أصل إِللى بَنَى مَصر

اِللى بَنى مصر.. كان فى الأصل حَلَواني
استقبل النيل من أخِّين: أثيُوبى وسُوداني
هدية العمر... طول العمر لهم ممنون
قال ما أنساش فضلكم لو كل الدنيا تنساني
***
وطلب من الله لمصر سماء صافية تغطيها
وشمس تسطع بنورها وخيرها... تراعيها
وبَدر باسم خَجول بلونه الفِضّى يتسَحَّب
ونجوم جواهر بتضوي.. مَبْدورة فى نواصيها
***
وقال للربيع مرحبا.. جاب له نسيمُه رقيق
نبَتت زهور الرياض ألوان مدهبة بعَقيق
ومَيِّة النيل بتروى الوادى على الشطين
مَيِّة زلال فى التِرَع والزِلَع والقلَّة والأبريق
***
فَرش الشطوط بساط أخضر خَصيب غالي
وزوَّق الشطين شجر صَفِين يحرسوه، عالي
والبط والوز.. والعصفور والنسر والكروان
والقطن والقمح والبرسيم فى الغيطان مالي
***
الله عطاه أبناء من أفضل عَيِّنات الناس
فيهم بَسَاطة وخِفِّة دم، ومودة مع احساس
إخلاص فى عِشرة وعَمَل.. ومراعاة الجار
أما الوطن عندهم... شرف... وتاج ع الراس
***
هَيَّأ وِلاده بأمانة.. فكانوا فراعنة.. ملوك
بعَدل وقانون، فلا سَيِّد ولا عَبْد ولا مملوك
فى الحرب والسلم... أبطال.. ما لهم تاني
فى العلم والدين والأخلاق يا مُدَّعي.. سَبقوك
***
الدين منارة ف حياتهم.. نورها رضا وإيمان
والوحدة... أسّ المواطنة... مع تعدد الأديان
أسّ الحضارة عَمَل.. والحكم عدل وقانون
والدين فى قلب وضمير مش كرسى فى الديوان
***
اللى بَنى مصر "فرعون مصري".. إنساني
أكرم ولاده... وأكرموه... والحُب ربَّاني
وأنشأ مداين عظيمة من النوبة للدلتا
وبَنى أهرام وآثار.. ما بَنى زيِّهم باني
***
وجالها هكسوسى وفارسى وأشورى ويوناني
وجالها رومانى وتركى وفرنسى وبريطاني
كل اللى جالها رَحَل.. شال عِدَّتُه.. وانزاح
ولما جالها العرب.. حيلاقوا فين زيّها تاني!
***
سألونى آدى مصر.. وفين اللى كان لها باني؟
راح فين ياترى؟ وليه سابها؟ والجواب جاني
حَلَوانى شُغله سُكَّر وسَمنة وعَسَل، يعمل إيه
بالعنف والتمييز والظلم بين الناس!؟
لو نزرع العدل والحق فيها... يرجع لها تاني
*****