هل أنت مستعد لقراءة كتاب حياتك؟

كتير مننا بيحب القراءة وبيتفاخر بنفسه ويحب الناس تعرف أنه مثقف وبيحب القراءة، لكن فى كتاب واحد بس هو اللى كلنا بنخاف نقرأه ومفيش عندنا استعداد إننا نقرأه لإننا بنخاف منه، ألا وهو كتاب حياتنا.. تعرف إن ده الكتاب الوحيد اللى كلنا مرغمين نقرأه، ومش بس أمام نفسك أو معارفك ده أمام الله عز وجل وأمام البشرية كلها.
تخيل نفسك كده ماسك كتاب بيحكى كل اللى أنت عيشته فى حياتك بالتفصيل، كل لحظة عملت فيها إيه، كل يوم قضيته إزاى ومع مين، وقلت إيه وسمعت إيه وشوفت إيه.. وللأسف ده غير كل الكتب.. متقدرش تقطع صفحه مش عاجباك أو حتى تفوتها، كتاب إنت اللى كتبته بإيدك صفحة صفحة وكلمة كلمة، حاجة صعبة إنك تقرأ كتابك بنفسك لأن أكيد هتلاقى صفحات تخجل إنك تحكيها، هتلاقى مواقف وتصرفات كتير هتخجل إنك تقرأها مش بس أمام الله والناس، لكن أمام نفسك كمان.. الموضوع مش سهل
عشان كده لازم كلنا نراعى إحنا بنكتب إيه فى الكتاب ده، قبل ما تعمل ذنب أو تغلط فى حد أو تغتاب حد أو بتعمل ذنب فى الخلوة، افتكر إن آه جايز محدش شايفك من البشر، لكن ربنا مطلع عليك وشايفك وكمان يوم العرض عليه هيخليك تقرأ اللى عملته ده أمام الناس كلها.. وساعتها المنافق فى الدنيا هيظهر، والمخلص هيظهر والكذاب هيظهر.
لو حسيت للحظة إنك خايف من اليوم ده، ومن الموقف ده يبقى انت كده فوقت، بس فاضل انك تاخد كام خطوة، وهى إنك أولاً تتوب على كل اللى عملته فى حياتك، استغفر ربنا على الذنوب اللى فاكرها واللى مش فاكرها، والأهم إنك تاخد عهد على نفسك انك مترجعش للذنوب دى تانى، وتدعى ربنا يثبتك على ده، وتدعى ربنا انه زى ما سترك فى الدنيا.. يسترك فى الآخرة.