مستنى إيه

يا زمن؟
ما العمر راح!!!
هو اللى يفرح حبتين
زى اللى تكويه الجراح
مستنى إيه يا زمن
والحلم بيموت انتحار
ما هو كل ليلة بيتولد
ويموت مع طلوع النهار
مستنى إيه؟
طول السنين متغربين
بنلف نفس الدايرة
ونتوه فى المدار
أنا يوم ما مليت الزمان ده
الحلم ملّ الانتظار
أنا يوم ما جيت الدنيا دى
شفت العروسة مكسرة
والناس وجوهها مغيرة
وأتريها جد ومش هزار
مستنى إيه يا زمن
وأنت اللى بتحدد مسار
طول السنين ماسك قلم
بكتب قصيده بالألم
خلص الديوان
لفيته بأكفان العدم
مليت وملّ الانتظار
...... ............... .............
فى الصبح سامع
صوت أدان الضهر
صليتُه
نقطةْ بدايه ف سكتى
ومداها لفيتُه
سامع أدان العصر
بحر العمر عديتُه
والشمس غابتْ
يبقى اللى باقى ف عمرنا
أيام!!!!
والليل بيرحل
يبقى اللى باقى ف عمرنا
أحلام
ماسك خيوط متلخبطة
ألوان كتيرة مبعترة
أصل الحقيقه ف عمرنا
أوهامْ
يمكن صلاتك فى العِشا
والعمر بيعدى
دانا من يومين
طفيت شموع
كفنت أنا وردى
ورميت على الدنيا السلامْ
يمكن صلاة الوتر
آخر صورة فى المشهد
أحلام كتيرة
كل يوم عن عمرنا بتبعد
واقفه النهاية ف سكتى
قدااااااااااااام
شايف خيوط الفجر
آخر ليلة مرسومة
يمكن عبورك للزمن صورة
يمكن وجودك فى الوجود صورة
كل اللى رايح
كان كلام فى كلام
ما تقول عبورك للزمن ده
بكااااااااااااام!!