تقى الفوال: التمثيل فى ألمانيا جاء صدفة ودعمي للقضية الفلسطينية واجب إنسانى

أكدت الفنانة المصرية الألمانية تقى الفوال، خلال مشاركتها في مهرجان شرم الشيخ الدولي للمسرح الشبابي، أن رحلتها الفنية بدأت من دون تخطيط، وتحولت تدريجيًا إلى مسار إنساني وفني مؤثر، بعد أن أصبحت أول فنانة محجبة تحقق نجاحًا واسعًا داخل ألمانيا.
من طنطا إلى ألمانيا
وقالت تقى الفوال خلال ندوة الاحتفاء بالمكرمين بمهرجان شرم الشيخ الدولي للمسرح الشبابي: أنا من طنطا وسافرت ألمانيا وأنا صغيرة، ومكنش طموحي أدخل الفن، صاحبتي قالتلي إنهم بيعملوا مسلسل وعايزين بنت محجبة، ووقتها مكنش فيه حد محجب في ألمانيا. جربت وقلت ليه لا، رغم الخوف في الأول".
وأضافت: "في أوروبا فيه صورة ثابتة عن العرب، وبيفضلوا يحصرونا فيها، لكني أخدت الدور وده فتحلي باب معرفتش إنه هيغير حياتي".
وكشفت الفوال أن أول وقوف لها أمام الكاميرا كان نقطة تحول: أول مرة قدام الكاميرا حسيت إن كل حتة في جسمي حية.. ومن بعدها نجحت فجأة، وبقيت معروفة جدًا، وقدمت أكتر من 20 عمل، وخدت جايزة أفضل ممثلة مشاركة في ألمانيا".
وقالت تقى إن نجاحها كان مضاعفًا بسبب كونها أول فنانة محجبة تخترق الوسط الفني الألماني من دون أي فرص جاهزة: كنت أول محجبة في المجال هناك من غير واسطة ولا ورش.. ومع الوقت كمان دخلت مجال الموديل، وده كان أصعب لأن محدش كان قابلني بالحجاب".
وتابعت: مؤمنة إن مافيش صورة واحدة للست، وخاصة الست المحجبة.. ومن حق كل واحدة تحقق اللي هي عايزاه".
وأشارت إلى أنها حصلت لاحقًا على الكثير من الورش والدورات لتطوير أدواتها، مؤكدة أن الفن بالنسبة لها رسالة: أنا مؤمنة إن الفن إنسانية قبل أي حاجة.. ولازم أعبر عن كل قضية إنسانية في أيّ مكان أتواجد فيه.
وعن تكريمها في مهرجان شرم الشيخ الدولي للمسرح الشبابي قالت: ده أهم تكريم في حياتي.. وأول ظهور ليا في مهرجان كبير يكون من بلدي اللي اتعلمت منها الفن، ده شرف كبير جدًا.
الكوفية الفلسطينية.. موقف لا تنازل عنه
وكشفت الفوال موقفًا حدث أثناء مشاركتها في أحد العروض: كنت بمثل شخصية شهرزاد، وكنت عايزة أحيّي الجمهور بالكوفية الفلسطينية. رغم الرفض واللي اتعرضت له، عملت كده؛ لأني لازم أعمل اللي أنا مؤمنة بيه".