قط وفار!!

دنيا ملانة بالأسرار
وأجمل حاجة
أما بيلعب قط وفار
وأسوأ حاجة
أما اللعب يكون بالنار
تيجوا نفكر مع بعضينا
أما إتنين يحرقوا فى سفينة
وألا أسيب فكركوا يحتار
بين القط وبين خربشته
وبين الفار آخر المشوار
....
مَرَّة الفار يشتاق للقط
ويعمل حاوى ويجرى ينط
ومرات تانية يهز ف ديله
يروح يمسكه وبسرعة يفط
....
أدام الناس الإتنين أكبر أعداء
ضرب فى بعض خصام وفراق
وجوة الأوضة شوف الأشواق
حضن فى حضن وبوس وعناق
أتارى الفار بيحب القط
والمصلحة محتاجة لوفاق
....
عسل القط بيشفى الفار
ولعب الفار بيحبه القط
والأسرار بتحب اللعب
والإتنين لعيبة كبار
....
واد لعيب إنما إيه
يلعب باشا ويلعب بيه
ويلعب لو على عشرة جنيه
ويلعب كُومى ويجرى يِقُشْ
ويلعب بَصْرَة ساعات ويغش
وساعات تانية يسيب اللعب
يروح للأكل يعبى الكِرْش
.....
ألف خسارة
لما تكون اللعبة بمصر
الاتنين عاملين أبطال
وبيرفعوا فى علامة النصر
واحد يضرب بالملايين
وواحد عايش عمره فى قصر
ومصر الغالية ما بين الاتنين
عايشه فى هم ومعصورة عصر
.....
وشعب الغالية ياعينى عليه
غلبان غلب
ونص الشعب يمد إيديه
لو ملايين الفار تتوزع
كان القط هيعمل إيه
....
كانوا الإتنين خلصوا على بعض
ولا فيه كلمة ولا فى الأوضة
كان الوعد وكان العهد
وكنا قلبنا اللعب جنازة
وتشوف فار مقتول فى جوازة
وتشوف قط مسممه شهد
وتبقى ساعتها مصر تفوق
وأزمة تعدى وبرق ورعد
.....
الوقت بيجرى يعدى قوام
زى ماعدت ثورة وشهدا
وعيش حرية وكُتر كلام
عالملايين سلم واتعلم
سلام للفار وسلام للقط
وإنتى يا مصر ألف سلام
ألف سلام .. ألف سلام .. ألف سلام