رسالة إلى الرئيس القادم

صدقنى قلبى معاك والله يكون فى العون
علشان هتحكم وطن فيه ألف صنف ولون
وكلهم فى الميدان قاعدين على الوحدة
خايفين يشيلوا هامان يطلع لهم فرعون
.........
صدقنى قلبى معاك وأوعى يا صاحبى تنام
وتفكر أنك خلاص واحد من الحكام
دا أنت وقعت ومحدش قام يسمى عليك
والشعب عايز رئيس عند الوطن خدام
.........
صدقنى قلبى معاك وكل مصر معاك
الحمل غالى وتقيل لازم نشيل واياك
وطول ما أيدك فى أيد الشعب راح تنجح
ومنين متمشى هتلقى مصر ماشيه وراك
.........
صدقنى قلبى معاك بس أنت متخافش
وعن طريق القانون حاول مترجعشي
خليك ديمقراطى عند الساقطة واللاقطة
والأغلبية كلامها بالأصول يمشى
..........
صدقنى قلبى معاك وسهرت أدعيلك
ورغم فرحى الكبير أنا خفت أغنيلك
خايف النهارده أغنى وبكرة أبكى عليك
خايف رياح الغرور تطفى قناديلك
.........
مد أيديك للبلد خليها ماسكه إيديك
والبنت ذى الولد خليها غالية عليك
وارفع رايات العمل عالية فى كل مكان
علشان كتاب التاريخ هيقول قراره فيك
.........
صدقنى قلبى معاك وقلب الأمة دى بحالها
برجالها وكهولها وبنسوانها وعيالها
لازم تكون مصر على قلب رجُل واحد
علشان نعيد مجدها ونذل عزالها
.........