الرئيس السيسي يوجه التحية لأهالى مطروح: أهلا وسهلا وسعيد بلقائكم.. ويؤكد: ما فيش مكان فى مصر إلا وفيه شغل لصالح المواطنين.. ومشروعات التطوير مجرد خطوة على طريق التنمية.. ومشروع الدلتا الجديدة يوفر فرص عمل عديدة

** الرئيس السيسي: الدولة غير مسئولة عن أزمتي "كورونا" و"الحرب الروسية"
** الرئيس السيسي: "بنحاول بكل قدرة نقلل من تأثير الأزمة الاقتصادية على المواطنين"
** الرئيس السيسي للمصريين: "اطمئنوا.. بفضل الله لا نريد إلا الخير للناس ولبلدنا"


وجه الرئيس عبد الفتاح السيسي، التحية إلى أهالي محافظة مطروح، قائلا: "السلام عليكم.. سعيد أن التقي بكم.. أهلا وسهلا.. بسم الله الرحمن الرحيم.. أوجه لكم جميعا التحية والسلام".
وأضاف الرئيس السيسي، خلال كلمته فى لقاء مع أهالي محافظة مطروح: "أشكركم أن اتيحت لي الفرصة أن أتكلم معكم واشوفكم.. محافظة مطروح وما يطلق عليها المنطقة الغربية.. مش بس مطروح.. من قبل مطروح بكتير.. مكنشي فيه اهتمام كبير من الدولة خلال السنين اللى فاتت".
وقال الرئيس عبد الفتاح السيسي، إن الدولة المصرية منذ 10 سنوات تعمل بشكل كامل للتطوير والبناء فى كل مكان، متابعا: "مفيش مكان فى مصر إلا وفيه شغل بيتعمل لصالح مواطنى مصر بالكامل.. كان فيه خطة ورؤية للدولة تجاه شكل الدولة المصرية حتى عام 2030 ".
وأكد الرئيس عبد الفتاح السيسي، أن الدولة المصرية تنفذ مشروعات فى محافظة مطروح والمنطقة الغربية في إطار البناء والتطوير، متابعا: "واخدين بالكم احنا مهتمين أوى وشغالين كويس أوي.. واقدر أقول المشاريع المستهدفة واللى بنفذها فى محافظة مطروح.. سواء مشاريع زي الموانئ أو القطار السريع.. أو المدن الجديدة.. احنا كمواطنين وطبيعة المحافظة اللى هى فيها شكل معين بتعيش بيه.. هيكون له تأثير كبير اوي خلال المرحلة دى".

وأضاف الرئيس السيسي، خلال كلمته في لقاء مع أهالى محافظة مطروح: "لما جيت من سنوات افتتح ميناء جرجوب جيت بالطائرة.. والنهاردة جيت بالطائرة برضه علشان اشوف شكل الدنيا عامل إزاي بعد 4 سنين.. وادى لنفسى فرصة اشوف.. فيه تطور كبير.. خطوة على الطريق.. التطور اللى بتعملوا والدولة بتعمله.. بنتكلم عن مدن جديدة وعلشان الناس تقول القطار السريع اللى هيجي لغاية جرجوب.. او هيطلع لغاية السلوم.. يعني هنستفيد إيه.. لا طبعا فيه استفادة.. وحتى مع منفذ السلوم.. الهدف تسهيل حركة التجارة مع الأشقاء في ليبيا.. وفيه منطقة لوجيستية 250 – 300 فدان جنب المنفذ.. كل فرص العمل.. بتوفر تطور وتنمى محافظة مطروح".
وقال الرئيس عبد الفتاح السيسي، إن الدولة المصرية خلال السنوات القليلة الماضية تعرضت لأزمتين "أزمة كورونا".. وأزمة حرب روسيا وأوكرانيا، موضحًأ: "الازمتين دول مكناش سبب فيهم.. أزمة كورونا كان لها تأثير كبير على العالم.. احنا مش السبب فيها.. حتى الحرب الروسية.. واحنا ما أخدناش قرار ورطنا الدولة المصرية.. وبالتالي انعكاس ده القرار الصعب والخطير أو أي إجراء فيه عدم رشد من الدولة".

وأضاف الرئيس السيسي، خلال كلمته في لقاء مع أهالي مطروح: "احنا في أزمة وبنتكلم بمنتهي الوضوح.. والأزمة تحدي من ضمن تحديات.. زي تحدي الإرهاب من 2011 و2012.. والناس كانت بتقول الموضوع هيخلص ولا لا.. واستنزاف شباب مصر.. وحالة عدم الاستقرار.. وكنت بقول بفضل الله هيخلص.. وبالمناسبة فيه برنامج تطوير كبير لأهلنا في سيناء.. وده حق لهم وبتكلم علشان الرسالة توصل لهم".
وقال الرئيس عبد الفتاح السيسي، إن الدولة لا تتحدث عن المشروعات الجديدة إلا بعد التأكد منها أنها تحقق الإفادة للمصريين، متابعا: "عاوز اقولكم على حاجة.. مش هتكلم في موضوعات زي دي لغاية ما تخلص.. بس مشروع زي الدلتا الجديدة هل بعيدة عن المحافظة هنا؟.. طب ممكن تشغل ناس وأشغال مختلفة.. تجارة وتاخد منتجات زراعية تروح للأشقاء في ليبيا.. ودي مشروعات على أطراف المحافظة.

وأضاف الرئيس السيسي، خلال كلمته في لقاء مع أهالي مطروح: "فيه مشروعات تانية زي توشكي وشرق العوينات.. وفيه حتت تانية لغاية لما نشوف المياه.. إجراءات الدولة والدراسات اللى بتتعمل تحقق ده.. لا نغامر بالناس في أي حاجة يكون لها مردود مش جيد على مصر.. لكن أزمة كورونا وأزمة روسيا.. مش عملنهم لكن بنتأثر بيهم".

وأكد الرئيس عبد الفتاح السيسي، أن الدولة المصرية سوف تكون قادرة على تخطي الوضع الاقتصادي الحالي، متابعا: "الظرف الاقتصادي الظرف ده هينتهي.. لازم مش علشان انا موجود.. دي حكمة ربنا في الدنيا والمجتمع والعالم.. نقابل التحديات بالجهد والتخطيط والإرادة.. احنا في صراع مع ظروفنا.. والظرف الاقتصادي تحدي واحنا مصرين بفضل الله سبحانه وتعالي وقادرين على تخطي هذا الظرف".

وأضاف الرئيس السيسي، خلال كلمته مع أهالي محافظة مطروح: "موضوع الناس متأثرة بيه أنا عارف.. والأسعار مرتفعة وانا عارف.. بنحاول بكل قدرة نقلل من تأثير الأزمة دي خاصة المواطنين اللى ظروفهم صعبة".
وأكد الرئيس عبد الفتاح السيسي، أنه يثق في قدرة الدولة على تخطي الأزمات، متابعا: "مفيش أزمة بتمر على مصر إلا بنكون متأكدين بالإرادة والعمل والتخطيط وقبل ده كله بالله.. احنا بنعمل خير.. احنا كمسئولين لا نريد إلا الخير لكل الناس ولبلدنا".

وأضاف الرئيس السيسي، خلال كلمته في لقاء مع أهالي مطروح: " اطمئنوا بفضل الله رغم الظروف الصعبة دي.. وزي ما مرت على مصر ظروف صعبة خلال السنين اللى فاتت.. بالله والجهد والإرادة بنعبر التحديات زي ما حصل في 67 وفى 73 عبرنا.. وحاجات أخري بالمستوي اللى هو اللى يخلي الناس تقول يا تري هنقدر نتغلب على الأزمة دي ولا لا.. لازم تكونوا متأكدين.. احنا كمصريين.. الدولة مش لوحدها هتعبر الأزمات.. بيكم وبكل المصريين وفهم الناس وتحمل الناس.. نقدر نعدى".