أنا راجع لأيامى

وأيه الفرق ف المعنى
ما بين قاسى وبين أعمى
ده أعمى القلب لوعنا
وخلى الشوق بلا معنى
وآه م القاسى وعمايله
وآه من نومى.. مش طايله
مفرق ليه أراضينا
ده حبى كان بيسمعله
يا حب اندم على حالك
ده قاسى وقلبه محتالك
و لو فكرت يوم تصرخ
يقول الهجر منوالك
ده ليل الغربه كان أصله
ملوع قلب فات وصله
وعطر الورد صحانى
وقالى الحب مش فصله
أنا راجع لأيامى
وهنسى حب ورانى
نجوم الليل ف يوم كانت
شموسه تايهه ف كيانى
يا عاشق رمشى وعيونى
مكنتش لاقى مجنونى
بسهر قلب مش قاسى
وفكرى لصورته كان ناسى
وجه يومك وجه وقتك
وأدينى بحكى ف روايتك
واعذرنى ده كان إعصار
مموت عقلى وخيالى
وبوصولك لوسط النار
بقول للكل ينسانى
ده انا ف حبك بقول أشعار
وفرحتى بيك دى شىء تانى