أطفال الشوارع والمولوتوف والحرائق.. يريدون حلا

لا توجد إحصائيات دقيقة حول عدد أطفال الشوارع رغم تعدد الجهات التى تهتم بهم، فالإحصائيات غير الرسمية تفيد بأن عددهم يقترب من ثلاثة ملايين طفل يشكلون قنبلة موقوتة فى المجتمع المصرى.
بالقرب من ميدان التحرير، التقت «اليوم السابع» بمجموعة من هؤلاء الأطفال فبدوا وكأنهم شيوخ طاعنون فى السن دفعتهم التجارب المريرة وأيام الحرمان إلى الشيخوخة المبكرة، يتحدثون بلغة الميدان ويطرحون مشكلاتهم وأنهم فى طريقهم لتنظيم مسيرة خاصة بهم للمطالبة بحقوقهم.
أصر بعضهم على تعريف نفسه بالاسم الأول فقط، والبعض الآخر أكد أنه ليس له إلا اسم واحد بس، فكان شهاب ذا ال 15 عشر عاما بوجهه الجنوبى الأسمر يروى حكايته منذ أن جاء من أسيوط هربا من زوجة أبيه ودخوله عالم الشارع بكل ما فيه قائلا: «إحنا الوقود اللى ولع الثورة، واحنا اللى كنا بندافع عن الثوار لما الجيش يضربهم، مع الأحداث جينا مجموعات للميدان ناكل ونشرب وننام ما احنا مالناش مكان نعيش فيه بنبيع مناديل ونمشى حالنا، مش متعلمين بس فاهمين، محدش سأل فينا ولا عارف احنا عايشين ازاى».
إحدى الفتيات واسمها عبير 20 سنة قاطعت شهاب وصممت على عرض مشكلتها بحثا عن حل بأى شكل «يا ابلة إنتى عايزة إيه، احنا مبنخدش فلوس من حد ولا حرقنا الكتب احنا كنا بنشيلها مع الثوار وكنا فرحانين اننا بنعمل كدا، زمان أنا كنت فى مكان بيلم بنات الشوارع وكانوا بياخدو علينا فلوس ومكناش بنستفيد بيها، لكن دلوقت احنا أحرار عايزين نعيش ونتجوز، أنا وحمادة صاحبى كنا عايزين نتجوز بس معرفش يطلع بطاقة لا ليا ولا ليه، فعشنا مع بعض ودا حرام بس مش حرام نفضل فى الشارع كدا مش حرام ننام فى الطل وتحت الكبارى؟ على الأقل فى الميدان بنلاقى خيمة ننام تحتها.
ومع صوت عبير الذى بدأ يتعالى ومطالبتها لى بمغادرة المكان، اندفع شلاطة 16 سنة فى الكلام قائلا احنا ما ولعناش حاجة احنا عايزين نتعلم صنعة ونشتغل ونتجوز ونعيش زيكو، هو انتى تقدرى تسيبى ابنك ينام فى الشارع، أو يشحت أو يشم كله، ياابلة.
رضا 17 سنة كان له رأى آخر عن زملائه، حين قال «احنا فيه منا غلط وساب بيت أبوه وفيه مننا اللى ما يعرفش أصلا ليه أهل، وكنا عايشين مع بعض بناكل ونشرب ونشتغل وكل ما ضابط يحب يعمل شغل ييجى يقبض علينا، وربنا يكفيكى بقى شر الحبسة فى دار الأحداث.
كانت دهشة سلومة 14 سنة كبيرة حين نقلت له الاتهامات بأنه ورفاقه مسؤولون عن حريق المجمع العلمى وأنهم كانوا يلقون المولوتوف على المبنى وسجلت كاميرات التليفزيون كيف كانوا يرقصون فرحا كلما ارتفعت ألسنة النيران، وقال «إحنا كنا بنحدفهم بالطوب لأنهم كانوا بيضربوا البنات اللى زى أخوتنا.