هنا الثوار

رجعنا نقولوا كلمتنا ونعلنها هنا الثوار
ميدان تحريرك الخاوى على عروشه
بقى دلوقتى خط النار
فخطى معاية ع العسكر وع المهاويس
بكراسيكى وع التيار
ودوسى معاية وبرجلك على اللى راحوا
يبيعوكى لأسيادهم ببترو دولار
ومتهوديش ولا ترضيش يمثل كل أطيافك
تلات خوازيق ويبقى خيار
ولا يحكمنا بالتخطيط وبالبرانيط ويحظر كل
أحلامنا متجولشى فى الأفكار
ويستعمر طموح الشعب بالقوة ويجبرنا على
انتخابات بلا اختيارات ولا استقرار
ويجيى بحزب متهمش يمثل مين وهوه محرم
الثورة ومتسلق على الأسوار
وسارق دم شهدائنا ومتصالح على المصابين
ومتحالف مع الشياطين وراكب فوق كتاف
الثورة باستحمار
فصحى كل ميادينك تقوم بالثورة من تانى
وتبقى فى حالة استنفار
ويبقى الكل مصريين بلا إخوان ولا جماعات
ولا أحزاب ولا تكفير ولا تبليغ ولا استهتار
ولا يبقاشى بينا عميل ولا دلاديل بتستنطع
عشان تتصنت الأخبار
وقولى لمجلس العسكر بلاش حوارات ولا
مجاملات وليه ساكت لدلوكتى على
الطراطير وحزب العار؟
وفين شرعية الثورة وليه ساكت على
المسروق من الدولة أراضى وزرع
واستثمار؟
وليه ممنعتش التصويب وفقع العين وكسر
الأيد وقتل النفس بالساهل كأنه بيقتل الكفار؟
على بكافة الأيمان ما نخضع تانى ولا نضعف
ولا نطاطى لأى كان ومستنى فى تحريرها
سيادتك تبعت الأشرار
وطالبينك فى قعدة حق فى التحرير نشوفوا
الثوره دى ثورة ولا استعمار؟
ولو تسمح ياريت تجاوبنى ليه مخلوع بيتحاكم
تزوروه ملوك دول وشيوخ وليه يتزار؟
وليه يقعد فى مستشفى سبع نجمات وهوه سليم
وتعمله علاج ومساج وزفه وزار؟
ويتعالج على حسابنا وهوه سارقنا وناهبنا
ومتعلجوش شباب الثورة والثوار؟
وأيه غيرتوا حضراتكم لدلوكتى فساد زايد
وأمن مفيش وطافحين دم فى زيادة غلا وأسعار؟
وكل اللى يقابلنى يقول عملنا الثورة مفدتناش
وأقوله إن المشير فى العيد عطاكم مكرونات
فى كياس بكل وقار
وقسم لحمة الثورة على المحاسيب وساب
الشعب يتلوى على شواية الأعذار
كأنه مفيش ميدان تحرير ولا ثورة ولا
محاكمات وسى مبارك ما بين أيدينا
لسه ما غار
ونفس العسكرى هوه بخوذه ودرع وعصايه
وقنابل غاز ومطاطى وبينشن على الأنظار
ولسه الويندوز الشغال على عقولهم
(مبارك أف)متفرمطش فى الثورة
ولا أتعلم من التكرار
وعمرى ما شفت ثوره تقوم ومتقدمش غير
القهر لصحابها ومتتقدمشى لو أمتار
كأن الثورة مش مبسوطة بالحراس أو أن
الثورة حلفت تمشى بالمندار
فسلم حضرتك حالآ قلادة السلطه واتفضل
بلا مطرود ولا استفتاء ومضيعشى ثورتنا
بالاستمرار
تحيه لجيشك الباسل تحية لشعبك المغوار
تحيه لكل عين راحت تحية لكل روح صاحت
تلاحق زمرة الأطهار
تحيه لكل ميادينك وكل اللى نصر دينك
ومسح الدمعة من عينك تحيه لكافة الثوار
وبعلنها أنا باسمى وباسم كتيبة الأحرار
هنا الثوار..هنا الثوار.. هنا الثوار