سر رفض فيفى عبده الزواج من رجل متزوج.. وسبب هروبها من المنزل.. فيديو

يتصدر اسم الفنانة "فيفى عبده" محركات البحث بعد تصريحاتها أمس بالحديث عن طفولتها، وكشفها لملامح أكثر عن نشأتها وصفات والدها ووالدتها، وفى هذا الصدد بث "تليفزيون اليوم السابع"، تغطية خاصة من إعداد إسراء عبد القادر، وتقديم هشام عبد التواب، والتي استعرض خلالها أبرز التصريحات التي كشفت عنها الفنانة فيفى عبده.
وتابعت التغطية الخاصة أنه تحدثت فيفي عبده عن قصة هروبها من المنزل فى عمر 12 عاما قائلة: "واحدة أعرفها قالتلى تعالى معايا نروح السينما وروحت معاها واتفرجت على أغنية طلعت يا محلى نورها والبنات بترقص عليها، ودى كانت أول مرة أدخل السينما، ومكنتش عاوزة أروح البيت من جمال السينما، ولما رجعت البيت ضربتنى علقة جامدة.
كما تابعت فيفي عبده: "هربت من البيت وروحت عند خالى وقلتله امى علطول بتضربنى وأنا عاوزة أروح مع البنت دى وبرده موافقش وفضلت قاعدة معاه كام يوم لغاية لما البنت قالتلى تعالى عند الكوافير وروحت من ورا خالى كمان، وإن جوزها هيشغلنى معاه في الاستعراض ونرقص فنون شعبية على أغنية يا محلى نورها، وفى مرة واحنا مروحين لقيته وأخدنى لبيت تانى، غير البيت اللى متجوز فيه البنت صاحبتى، ولما لقانى مطولة لسانى وقلتله هاجيبلك الشرطة، راح طاردنى وقالى انتى وش فقر".
واستكملت فيفي عبده: "لما طردنى روحت أشتغل في فرقة تانية بس مكنش في مكان أنام فيه، وكنت بستنى الليل وأشوف أي بيت أقعد تحت السلم لغاية لما النهار يطلع، وأروح الصبح عند الكوافير أو الخياطة اللى عرفتنا عليهم البنت، وفضلت بالشكل ده كام شهر على كده، وفضلت 4 سنين سايبة البيت.
وأضافت: "وفى مرة مسكتنى أمى عند المصور كنت بتصور، وضربتنى علقة جامدة وأخدتنى للدكتور عشان تطمن عليا انى سليمة، واخدتنى لقسم الشرطة لأن وقتها كنت أنا سايبة البيت والمفروض انى قاصر ولكن أنا وريتهم البطاقة وقالولوا مش هينفع خلاص هي منسؤولة عن نفسها، ووقتها بقى والدى ووالدتى قالولى لو عاوزة تعملى اللى بتعمليه ده حد فينا يروح معاكى".
واختتمت حديثها: "بدأت أرقص وأخد 150 قرشا وكنت بدى لفردين الفرقة معايا كل واحد 25 قرشا"، وعن أول بدلة رقص ارتدتها قالت "كانت سعرها 15 جنيه بالقسط، وأول مرة أقف ولابسة البدلة عشان أنا مش متعودة عليها حييت الموسيقيين بدل الجمهور".