لقيتني فجأة ليك يا أبوي حنيت

إزيك ياشيخ العرب والله وحشتنا ووحشتنا الضحكة.. عارف إنك لسه واخد على خاطرك منى بس ماتنساش انت اللى قولتلى روح وغيب براحتك وماتطلش على حد وراك أهى جات فيك أنت..
المهم قبل ما فوتك فى الكلام عاوز أقولك على كام حاجة.. مش أنا كلمت البنت حكمت من سبوعين لما كان الجو سقعة وقولتلها تروح تطل عليك، عارف إنك بتكره الوحدة وما تحبش تغيب عن البيت. تخيل ردت عليا وقالتلى كلامك ماسخ غور انت كأنك اتجنيت وزعلت وبكت وبكتنى معاها، والله ما كان قصدى بس لقيتنى فجأة ليك يا أبوي حنيت.
طب سيبك من الكلام اللى يزعل، مش الواد علي زميلى فى الشغل خطب بنت زينة قوى ورحت حضرت الخطوبة وغنينا ورقصنا مش انت لو صبرت شوية وماكنتش استعجلت المرواح كنت خدتك معايا ورقصنا بالعصاية زى زمان، فاكر يا أحمد ولا نسيت والله شكلك نسيت.
اوعى تكون نسيت خضرة وأبوزيد الهلالى والزناتى خليفة اللى كان بيحكى عنهم عم جابر أبوحسين اللى كنت بتغنيلى حكاويه وانت قاعد قدام البيت.
طب فاكر يوم ما لفيت النجع وانت فرحان ورجليك مش طايلة الأرض لما قالولك الواد الديب نجح وطلع الأول على المدرسة... انت ما بتردش ليه ولا صوتى مش واصلك ياراجل ما تكبر مخك أنا برضه ضناك.
عموما.. أنا هكلمك كلمتين جد وما فيناش من الزعل، انت وعدتنى ماتمشيش وقولتلى خليك في شغلك واطمن أنا بخير، لكن خلفت الوعد وروحت من غير ما تقول حتى سلام ولقيتهم بيتصلوا بيا ويقولولى روح أبوك مات ولما روحت البيت لقيت ناس بتواسينى وتقولى البقاء لله اللى خلف مامتش.. طب ده حديت ... ينفع ياعم أحمد أروح البيت بدل ما أسمع غناك أسمع نواح وصريخ ؟!!