جانا العيد

أهو جانا العيد انسى الحزن وروح لبعيد
جاى بيجدد لينا الفرحة يخلِّى شموع الحب تقيد
اقلع كل شجر أحزانك واسقى الحب ف كل قصيد
خليك زى الشمس تنور تنشر خير فى كل صعيد
اصفح سامح كل الناس امسح دمع معاه تنهيد
خليك زى الطفل برئ يرن الضحكة بصوت تغريد
الناس محتاجة منك ضحكة مش محتاجة فلوس ورصيد
دا العيد جاى يمسح أحزانا ويرقق قلب معانا حديد
جدد ود لكل قرايبك جارك أوعى تسيبه وحيد
إياك تنسى زميل وصديق أو طفل يتيم فى هم شريد
طفل يتيم محتاج لحنان مش بس الكسوة ولبس جديد
ومريض زوره خفف عنه ورد فى إيدك أمله يزيد
افتح كل بيبان للفرحة رايح تلقى الحزن طريد
اقلع كل اللون الأسود خلى الأبيض رمز أكيد
شيل تكشيرة من على وشك وارسم ضحك بوِّش سعيد
افتح بيت الناس هتزورك وابعت هنِّى فى كل بريد
جانا العيد أهو جانا العيد انسى الحزن وروح لبعيد