حازم إمام: كفاية عنصرية وتنمر.. بنت السولية عندها 3 سنين المفروض تلبس إيه؟

تضامن حازم إمام، نجم الزمالك السابق، مع عمرو السولية لاعب خط وسط الأهلى بعد واقعة تعرض ابنته للتنمر على السوشيال ميديا، وقال الثعلب الصغير فى برنامجه وان تو عبر إذاعة أون سبورت، "بجد جدع السولية إنه خد إجراءات قانونية ضد الناس اللى تنمرت على صورة بنته، مش عارف بنت عندها 3 سنين المفروض تلبس إيه؟، الناس بتقول الكومنتات على السوشيال ميديا وتمشى ومتعرفش أثر الكلمة على اللى علقت ليهم إزاى".
وأضاف حازم إمام، "كل الدعم لعمرو السولية خاصة أن الراجل لم يخطئ بالعكس واجه وخد موقف لازم كلنا ندعمه، ومن الآخر التنمر بقى كتير أوى فى مصر والعنصرية زى ما حصل فى صورة شيكابالا مع ابنه وكلها تصرفات مرفوضة، وكذلك الخروج عن النص والشتائم من أى حد مرفوض بردو، ليه الكورة كلها أزمات، فى أوربا قبضوا على طفل عنده 12 سنة كتب كومنت خارج.. بجد لازم يكون فيه نهاية للمواقف دى".
وشارك عمرو السولية لاعب خط وسط فريق الأهلى، متابعيه وجمهوره عبر حسابه الرسمى على موقع التواصل الاجتماعى إنستجرام صورًا جديدة برفقة ابنته ليلى معلقه عليها: "كل شيء بالنسبالى" ليفاجأ بموجة من التحرش ضد نجلته الصغرى.
ورد لاعب النادى الأهلى عمرو السولية على تعليقات عدد من متابعيه بموقع إنستجرام، والذين زعموا أن ملابس ابنته ليلى التى تبلغ من العمر 3 سنوات ونصف غير محترمة، موضحًا أنه سيتقدم ببلاغات ضدهم. وكتب عمرو السولية، عبر حسابه بموقع إنستجرام: "ليلى بنتى عندها 3 سنين و نص (لسه قالعة البامبرز من كام شهر) الكلام ده بيتقال على طفلة!! أيه اللى يخلى (بنى آدم) خنزير ممكن يبص على لبس طفلة ويركز غير أنه فعلاً خنزير؟! ايه المرض ده".
وأضاف السولية، "دول اللى لما بيكبروا بيكونوا مغتصبين ومتحرشين واللى بنخاف على بناتنا وأهلنا ينزلوا الشارع عشان ميتعرضوش لأذاهم، أتمنى الشيوخ اللى بيبرروا للتحرش ولبس البنت يكونوا مبسوطين دلوقتى وهما شايفين اللى بيحصل".
وتابع: "قررت أتقدم ببلاغات لأصحاب الكومنتات دى عشان اللى زى دول مينفعش يكبروا وسطنا قررت أحمى بناتى اللى لسه مشافوش الدنيا وللأسف خايف عليهم يشوفوا كمية القرف والاشمئزاز ده".
وحرص لاعبو الاهلى على دعم السولية على رأسهم رمضان صبحى والمالى أليو ديانج ومحمد مجدى "قفشة" ومروان محسن بعد واقعة التنمر التى تعرضت لها ابنته الصغيرة ليلى.