عمرو أديب: "التعويل على وعى المواطن فى أزمة كورونا مشروع فاشل"

علق الإعلامى عمرو أديب على تجمع عدد كبير من أهالى الإسكندرية لإقامة إفطار جماعى، وقال: "هل ده منظر يرضى ربنا، دول لوحدهم ممكن يكونوا السبب فى زيادة أعداد إصابات النهاردة، ومينفعش المنظر ده حقيقى، ومينفعش برضه بعد ما طلعت أعداد الإصابات الكبيرة اللى قربت من 500 إصابة، نرجع نقول مش ممكن والأرقام كبيرة، أنا بقولكوا التعويل على وعى الناس والاعتماد عليه فاشل، وده فى كل دول العالم".
وأضاف عمرو أديب، خلال برنامج الحكاية الذى يذاع على قناة mbc مصر: "منرجعش نقول إن الأرقام لسة والإصابات مش كبيرة، لا الأرقام كبيرة وإحنا أكبر دولة عربية فيها عدد وفيات بسبب فيروس كورونا الجديد، والحكومة حتى الآن مخدتش أى إجراءات قاسية مع الناس فيما يتعلق بحظر التجول، إحنا فى شهر واحد الاحتياطى بتاعنا نزل من 45 مليار دولار إلى 3 مليارات فى أسبوع واحد، وده معناه أنه مينفعش نوقف الدنيا والإنتاج".
وقال عمرو أديب: "معظم أهل مصر شباب، وبيقولوا معندناش مشكلة مع الإصابة بالفيروس، ولكن أتوسل إلى الحكومة أن تكون فى منتهى الحزم وتشديد الإجراءات الاحترازية، على فكرة أنت من أول مايو لحد دلوقتى 34% من كل الإصابات اللى جاتلك، الألف إصابة بتتعمل فى 3 أيام بس، التجمعات دى فى كام واحد بيجيلوا كورونا، ولكن عندما تقرر الدولة المصرية الفتح الكامل، يجب أن تكون عنيفة فى تنفيذ إجراءاتها".
كما علق الإعلامى عمرو أديب على تجمع عدد من المواطنين للاحتفال بخروج أحد المصابين بفيروس كورونا المستجد، وقال: "المنظر ده كمان المفروض نشوف حل، الأبحاث دلوقتى بتقول أن اللى خف من كورونا ممكن يعدى خلال 70 يوم، يعنى كل اللى احتفلوا بيه دول ممكن يجيلهم الفيروس بمنتهى السهولة، بالمناسبة مش لازم نطمن الناس أوى فى موضوع كورونا، الناس أول ما تسمع كدة بتنزل الشارع ولا كأن فى حاجة".
وأضاف أديب: "أبرز المحافظات المصابة القاهرة الإسكندرية، والمحافظات الكبيرة فى مصر بتكبر وتزيد والموضوع بقى مرعب، فى دول عدت من القصة دى بعد خساير كبيرة، إحنا ليه واخدين الأمر ببساطة، احنا الدولة الوحيدة فى العالم اللى هتفتح الدنيا وأعداد إصابتها بتزيد، كل الدول اللى هتفتح الدنيا عندها الكيرف بتاعها بينزل فى الإصابات، واللى بيقول الإصابات والوفيات عندنا مش زى أوروبا".
وقال عمرو أديب: "فى ناس قاعدة بتعمل كتيبات بتقول الدنيا هتبقى عاملة ازاي، تيجى تقرى الكلام اللى فى الكتيبات دى لا يمكن تصدق أنها ممكن تتطبق فى مصر، وعاوز أسأل سؤال، هذه الدولة بحكومتها وأطبائها، هل هتتحمل ضربات اقتصادية فى الوقت اللى منتشر فيه وباء، لازم الدنيا تتفتح بس لازم يكون فى إجراءات رادعة".

عمرو اديب
كورونا
فيروس كورونا
عدد اصابات كورونا في مصر
اخبار
الموضوعات المتعلقة
مستثمرو العاشر: لائحة جزاءات للمصانع المخالفة لإجراءات الوقاية من كورونا
السبت، 09 مايو 2020 01:00 ص
تخصيص نزل الشباب بشرم الشيخ لفرض الحجر الصحى لمصابى كورونا
السبت، 09 مايو 2020 01:00 ص
فنان برازيلى يضع كمامات على رسوماته فى المترو للتوعية بفيروس كورونا.. صور
السبت، 09 مايو 2020 01:00 ص
مدغشقر تعلن عزمها بيع عقار عشبى ضد كورونا
السبت، 09 مايو 2020 12:52 ص