التحرير كلاكيت تانى مرة

بينما استعد للخروج لميدان التحرير استوقفنى ابن أختى الصغير-كضابط شرطة برتبة مقدم-داخل الصالة فهممت بإخراج البطاقة للمرور لباب الشقة بآمان معتقدا ذلك إجراءات أمنية عادية تحدث دوما وقت الثورات داخل البيوت فباغتنى بسؤال خبيث مرتديا قفاز إجادة عبدالواحد السيد فى مباراة الزمالك والأفريقى التونسى.. هو أنت هتروح الميدان ليه تانى ياخالو؟ هيا مش الثورة خلصت وجدو مبارك مشى؟ استفزنى السؤال وحاولت كبح جماح غضبى عليه ليس بسبب السؤال وإنما للتأخير الناتج عن إجابة السؤال ومع محاولات داخلية عدة للتنفيض الفطرى لم أفلح هذه المرة و...........هجاوبك يالمض.
أولا ياحبيبى الناس الوحشين اللى كانوا عافئين البلد من ياقة قميصها لسه موجودين وشكلهم مش على وش محاكمة لحد دلوقتى ودول كتير وعلى رأسهم الراجل ده اللى كان بيحركهم من فوق زى عرايس الماريونيت.........ومع وقوع فكه فهمت انه لم يع بعد.
يعنى زى عرايس المولد كده والأحصنة السكر اللى بجيبهالك وبتركبها ياحبيبى
اااااااااااااااااااااااااااااااااااااااااااه
هكذا تبين لى فهمه للمعنى وخصوصا مع لفظ الركوب اللى الكل عارف انه كان شعار المرحلة السابقة............وثانيا ياحبيبى
اديك شايف البلد حالها مايل ومن سئ إلى أسوأ وحالها لا يسر عدو ولا قريب واللى ما يشوفش من الغربال يبقى أعرج........ طبعا لا تعليم اتعدل ولا صحة اتظبطت ولا امن موجود ولا رواتب اتغيرت وبعد ما وعدونا بالحد الأدنى للأجور رجعوا وقالوا شد الحزام على وسطك وشكلها كده هترسى على حملة تقشف عامة زى اليونان اليومين دول بالظبط ولا بحث علمى فيه أمل دول حتى بيقفشوا اليومين دول ف حملة الدكتوراه والماجيستير وبيقفلوا عليهم أوضة الفيران كمان
بص يافندم عاوزك أجيبلك م الآخر يعنى الثورة قامت عشان تغير أسس وقواعد مش تخلع دكتاتور وتحل حزب فاشى و تغير رجالة –اللى أساسا مطلعوش رجالة ولا أد المسئولية طوال تلات عقود متتالية- ياحضرة أمين شرطة البيت المحترم أنا وزيى كتير أوى نازلين تانى الميدان عشان نقول كفاية كده أوى كفاية تباطؤ كفاية ثبات كفاية طبطبة على كل أوجاع البلد .............نازلين نقول للحكومة الشرفية الموجود أنتى حكومة فشلتى ف إدارة المرحلة الانتقالية الحرجة دى –واحتمال نطالب جوزيه يمسك الحكومة الفترة دى لحد الانتخابات يمكن يعملها زى ما عملها مع الأهلى – لازم نقول ونعرف المسئولين الآن وأصحاب القرار أنه دى ثورة مش انتفاضة حجارة
ثورة يعنى حكومة ثورية يعنى قرارات ثورية يعنى وزراء ثوريين ثورة يعنى نثور على كل الأوضاع ونغير على أد ما نقدر ونقلب البلد رأسا على عقب زى ما بيقولوا يعنى لازم ننسف حمامنا القديم ونعيد تشطيبه من أول وجديد ما هو للأسف الشديد أحنا استلمنا البلد بعد 11 فبراير على الطوب الأحمر وأحنا اللى هنمحر وهنشطب وهندهن ونعمل ورق الحائط كمان
وفجاة وبدون مقدمات لقيت صوت يصدر من ابن اختى بصيت لقيته نام جنبى وانا بسترسل ف الكلام اخدت البطاقة وخرجت قبل ما يفوق من نومه ويستوقفنى تانى أو ياخدنى مخالفة خروج خاطئ وعلى الميدان كانت وجهتى لعرض مطالب الثورة والمطالبة بالإسراع ببناء مصر الجديدة على ذوق الثوار مش على ذوق الحكومة ولا أمريكا ولا على ذوق حتى الرئيس القادم لمصر .............والشعب يريد تظبيط البلاد