عمرو أديب: الإخوان قالوا زمان التغيير فى البرلمان ودلوقتى بيقولوا بالميدان

انتقد الإعلامى عمرو أديب، تخبط المعارضة بخصوص مشاركتها فى الاستفتاء من عدمه، مشيرا إلى أن البعض زعم بأن هناك عدم مشاركة من جانب الشعب، وفى المقابل يوجد البعض الآخر منهم يزعم بتدخل الدولة فى عملية الاستفتاء.
وقال أديب، خلال برنامج "الحكاية"، والذى يذاع على قناة MBC مصر: "استراتيجيتهم إيه بعد ما الناس راحت؟، أن نبوظ النتيجة وإنها كانت متوضبة ومترتبة ومعرفناش نبوظ حاجات كتير.. الجديد إنهم بيقولوا حاجات عكس بعض، بيقولك الأرقام هاتطلع كبيرة، والدولة زقت الناس، حد تانى يقول محدش راح خالص، طيب هى الدولة زقت الناس ولا محدش راح خالص، طيب نقاطع ولا نروح..أنا بحب فى المعارضة أن يرسوا على حاجة، زيها زى الخناقة اللى حصلت اليومين اللى فاتوا نروح ولا نقاطع".

وتابع عمرو أديب حديثه: "الحضور والناس راحت وكانت بتدخل بشكل محترم، ولكن بعد ما خلص الاستفتاء قالوا تعالوا نبوظ النتيجة، والجديد بقى أنهم قالوا حاجتين عكس بعض قالك طبعا الأرقام هتطلع كبيرة والدولة زقت الناس، والتانى لا لا محدش راح خالص، طيب هوا الدولة زقت الناس ولا محدش راح خالص".

وأضاف أديب: " أنا بحب فى المعارضة أن نرسى على حاجة زى الخناقة اللى حصلت من يومين فاتوا نقاطع ولا نروح، وسط ما قالوا نقاطع رجعوا تانى قالوا لا نروح، ولكن نقرر كلنا كمعارضة نقاطع ولا نروح، وبعدين رجعوا قالوا لا، طيب أيه اللى حصل الناس راحت ولا مرحتش".

وواصل أديب حديثه قائلا:" أنا عايز أحيى وأشكر كل من قال نعم، وكل من قال لا، يعنى اللى قال نعم بشكره شكرًا جزيلًا، واللى قال لا بشكره شكرًا جزيلًا، وبقولك عايز تعارض تعالى إحنا عندنا صندوق وعارض فيه قول اللى أنت عايزه وأعمل مؤشر أعمل رقم، ولقيت ناس زعلت وعملوا أيام خاصة لعمرو أديب ومزعلتش لأنهم مش شتموا فى البلد".

وقال عمرو أديب: "التجربة قالت أن الصندوق هو مكان الجميع، المعارضة لا كتير نعم كتير أصوات باطلة زى ما أنت عايز، وأنا دورى كدولة أمكنك أنك تقول تدخل تقول رأيك لأن رأيك مسألة مهمة وبتعمل تغيير، وبشكر الجميع، وبشكر المعارضة المصرية التى قررت عدم المقاطعة، وفى ناس كتير ورموز محترمة موجودة بنشوفهم على تويتر".

وأكمل أديب حديثه: "الحكمة دى علمهالنا الإخوان لما قالوا هو التغيير فى البرلمان ولا فى الميدان، قالوا التغيير فى البرلمان مش فى الميدان وأنا كنت موجود وسمعت".

واستطرد عمرو أديب: "الإخوان عارفين أن التغيير فى البرلمان يعنى الصندوق، وإحنا اتعلمنا من الإخوان أن التغيير دائما فى البرلمان هما قالولنا كده، وبعدين غيروا رأيهم، ولو غيروا رأيهم يقولوا لينا إحنا غيرنا إحنا شعب كبير حوالى 100 وشوية مليون، مش غاوين مشورة، وبالمناسبة تقريبًا على أخر السنة الجاية فى انتخابات البرلمان، وأظن هيتعمل انتخابات المحليات وندعوكم للصناديق، والاستحقاقات لهذه الدولة كثيرة، ال3 أيام اللى فاتوا مبظوش فنحاول نبوظهم فى الفترة القادمة بشكل أو باخر، وأيام قادمة ونعرف نتيجة الاستفتاء، وبعد كده نتكلم كمجتمع عاوزين ايه، والشعب له حق، مثل المكتسبات فى المواد الجديدة، ولازم الشعب ياخد حقه، لأنه ادى للدولة حقها، والحقوق مش من طرف واحد، والحقوق واضحة فى اشياء كثيرة فى الصحة والتعليم والحرية والخدمات والتوظيف دى كلها حقوق للشعب ويجب على الدولة اللى شعبها بيديها حقها فى المقابل لازم الدولة تدى للشعب حقه، وده مش ثمن انا بتكلم على حق".