أخى المسلم أحبك ولو حتى ما تحبنى

أخى فى الوطن
أخى فى الحياة
بحق الزمن
بحق الإلَه
أحبك إذا ما تحبنى
وأحبك ولو حتى ما تحبني
فى حضن مصر، مصر أمنا
وعلى أرضها، على أرضنا
اتولدنا سوا، ورضعنا سوا
نشأنا سوا، ولعبنا سوا
وطول الطريق، مشينا سوا
وكبرنا سوا
فى وقت هناؤها حنانها لنا
ووقت أساها وقت الضنى
نادت لنا
قاسينا سوا وحاربنا سوا
بذلنا دمانا ونجحنا سوا
أنت وأنا
لنا مصر واحدة
ومن حقها نكون لها وِحدة
لا يفصلنا لون.. لا يفصلنا جنس.. لا يفصلنا دين
فى وقت احتياجها لا فينا جبان ولا فينا ضنين
فمنّا الضحية ومنا القتيل ومنا السجين
أنت بتهتف دينك سلام
وأنا بانادى دينى سلام
دينك سلام ودينى سلام
خلاصة الكلام
دا وقت الحقيقة
فى هذه الدقيقة
تعالى نعيش فى حب وسلام
وننشر مودة وننشر سلام
الدين مش خطابة
الدين مش كلام
فى دينك ودينى
كُرْه الأخُوَّة
فى الاتنين حرام