من "حسناء" ل"آية": خطيبك بيتفق عليكى مع "ريهام" عشان يسيبك ويخطبها

رسالة من سيدة لفتاة، بثتها عبر موقع التواصل الاجتماعى "فيس بوك"، حذرتها خلالها من مؤامرة يحيكها خطيبها ضدها، أثارت الجدل على موقع التواصل الاجتماعى "فيس بوك"، بعد انتشارها وحصولها على آلاف المشاركات والإعجابات.
الرسالة جاءت على غرار فيلم "حياة أو موت"، الذى لعب بطولته الفنان القدير عماد حمدى، فى مشهد إذاعة الراديو "مناشدة من حكمدار العاصمة إلى المواطن أحمد إبراهيم.. لا تشرب الدواء الذى أرسلت إبنتك فى طلبه .. الدواء فيه سم قاتل .. الدواء فيه سم قاتل"، حيث نشرت سيدة تدعى حسناء الديباوى، على موقع التواصل الاجتماعى فيس بوك، تحذيرًا إلى فتاة تُدعى آية، لتلفت انتباهها إلى حيلة يدبرها خطيبها لها دون علمها.
وكتبت حسناء فى رسالتها ل"آية": "إلى آية القاطنة بمدينة العاشر من رمضان وخطيبك من طنطا وبيشتغل في العاشر، وبُكرة هيروح معاكي فرح بنت خالتك.. خطيبك قاعد دلوقتي ورايا في الميكروباص في طريقه للعاشر، وبيتفق عليكي مع واحدة اسمها (ريهام) عشان يسيبك ويخطبها، بس بيشوفوا طريقة عشان ترجعيله الشبكة وغالبًا هيقولك إن عنده أزمة مادية، وعايز ياخد منك كمان 15000 جنيه فلوس الجمعية اللى هتقبضيها أول الشهر".
رسالة حسناء لآية، انتشرت عبر ساحات الموقع الأزرق، كانتشار النار فى الهشيم، التى ردت بدورها من خلال بوست عبر صفحتها على "فيس بوك" قائلةً:" يا ناس أنا والله فركشت، وهو اللى مش راضى يسيبنى فى حالى، ده محدش عرف إنى اتخطبت قد ما مصرت كلها عرفت الموضوع، أتاريه راسم الدور على أهلى وبيتسهوكلهم، ولما ماما بعتتله البوست، مردش وعمل من بنها، ده أنا أقلب الترابيزة على دماغه".
ردود الأفعال، جاءت متعاطفة مع آية، وطالبوها بضرورة الخلاص من خطيبها وعدم العودة إليه مجددًا، فيما وجه البعض إليها أصابع الاتهام بفبركة الحوار من أجل الشهرة، إلا أنها ردت بقولها :"مبدأيا انا مش محتاجة شهرة في حاجة لا أنا ميك أب ارتست مثلا ولا مذيعة، فبلاش جو إنى عايزة شهرة ونجومية!".
وواصلت حديثها :" أنا واحدة روحت بيتها شافت أهلها وصحباتها باعتين البوست ده .. سبحان الله نفس المواصفات ( الاسم.. وبلد خطيبي.. شغله.. الجمعية .. وغيره) وبما إن فى مشاكل وهو بيماطل فى إنه ياخد الشبكة ويأجل الموضوع ده استنتجت انه بيعمل كده عشان الجمعية زي ما هو مكتوب! وبما إن فى فرح والمفروض ييجى باتفاق مع ماما عشان يصالحنى ونتصافى ف دى كلها اسباب أكدتلى!! ولما واجهناه فى الأول مردش بعدها قال لا ممكن حوار.. أنا طبيعي مصدقش يا جماعة ماهو مفيش عقل يستوعب كمية الصدف دى !! كل ده وحسناء مشافتش ال posts اللى قالبة الفيس بصوره!! معرفتش إن مش هو؟ ولا هى أصلا تحويرة ولا ممكن كل ده صدفة!".

تنبيه آية