بابا نويل

تزحف عقارب على مهل
لحد نقطة نص الليل
هل انتظاره شىء سهل؟
وأنا مستنى بابا نويل
ولا جانى.. طب جالك؟
ولا مر على بابى
طب دق على بابك
رغم كل استعدادات
رغم كل التجهيزات
بالشجرة والزينة
والزعبوط الأحمر
وأحلامنا فينا
تكبر.. وتكبر
لكنها منتظرة لهدية
أو كلمة حنية
تشيل عنها هموم كتير
أبص فى الساعة
أسأل تانى ليه التأخير؟
رغم كل استعدادات
رغم كل التجهيزات
ليه مردش عالمزدات
يطمنى على طريقه
واقف فى إشارة رمسيس؟
ولا اتقفش فى لجنة
وغزالته بدون ترخيص
طب استجوبوه.. ولا فتشوه
وبعتروا عالأرض
الهدايا.. الأمانى.. والأحلام
فاتكسف يجينى إيد ورا
وإيد أدام
وأنا قاعد على حالى
تجرى العقارب
تهرب من سؤالى
ماله غاب؟
جايز كبر وشاب
واعتزل المهنة
وسابنا إحنا
لنار الانتظار
تزيد فى الأشواق واللهفة
طب حيزورنى
بعد ما يخلص اللفة؟
بس ييجى ....!
ولا يقوللى جو متلج
ولا يتلكك ولا يتحجج
بس ييجى ....ا
انشاله آخر الليل
وأبص فى الساعة
مستنى بابا نويل
ولا جانى ....ا
وأنا حاضر بكل إنسانيتى
وكل كيانى
مش حيخلف وعده
حييجى بكرة أو بعده
فى يوم جديد
يشق طريقه وسط الجليد
وأجريله بأمانيه
وأشواقى لهدية
أو كلمة حنية
تشيل عنى هموم كتير
حيجينى مكان ما أكون
ويهتفلى بفرحة الكون