"رمضان فى سنة أولى جواز عامل ازاى؟".. حكايات بنات بيعيشوا رمضان لأول مرة فى عش الزوجية.. "إستوك" الأكل فى الفريزر الحل مع مواعيد الشغل.. وصفحات الطبخ والبرامج سلاح "المحتاسين" فى الفطار والسحور

مرت أول أيام رمضان التى عمت فيها البهجة أنحاء المنازل المصرية، وبالرغم من العزائم والموائد التى أثبتت فيها المرأة المصرية قدرتها على الإبداع فى الطهى وتقديم أشهى المأكولات المصرية الخالصة، إلا أن كثير من الفتيات ممن يندرجن تحت قائمة "سنة أولى جواز" كانت هذه الأيام بداية تجربة جديدة بالنسبة لهن، حيث وجدن أنفسهن فجأة مسئولات عن منزل كامل تعد فيه وجبات الإفطار والسحور يومياً، إضافة إلى العزائم التى سيتولين أمرها وحدهن، دون مساعدة من أحد.
ودخل اليوم السابع إلى مطابخ الزوجات الجدد ليعرف منهن كيف كانت استعدادتهن لأيام رمضان، وحكايتهن مع المطبخ وما صاحبه من خطط ومساعدات خارجية حتى يسيطرن على أوضاع المطبخ طوال شهر رمضان.
1-الأكل الجاهز فى الفريزر هو الحل
بدأت الجولة داخل مطبخ ألاء هانى 25 سنة وقالت "انا متزوجة منذ بضعة أشهر، وأعمل فى إحدى الشركات، وقبل شهر رمضان بفترة كبيرة وانا بفكر إزاى هتعامل فى رمضان وهعمل الأكل مع الشغل، ولاقيت إن مفيش حل غير إنى أعمل الأكل جاهز وأشيله فى الفريزر ويبقى على التسخين على طول، وطبعاً قبل رمضان بأسبوع بدأت أعمل صوانى الأكل، عشان أرجع من الشغل أحط الصنية فى الفرن على طول، وبالنسبة للعزومات اتفقت مع جوزى إن العزومة تكون يوم أجازتى عشان أقدر أعمل أكل، ده غير بقى توضيب الشقة اللى مكنتش متخيلة إنه لازم يحصل قبل رمضان بوقت كافى وزينت بيتى وأهو الحمد لله عدت أول أيام بسلام".
2-التجربة قبل رمضان تحسباً للمفاجآت
وكانت الحكاية الثانية من مطبخ شيماء شاكر 24 سنة وقالت "فكرة إن رمضان يجى عليا وانا فى بيتى ومتحملة المسئولية لوحدى كانت صعبة شوية، وكانت استعداداتى مختلفة شوية عن معظم الناس لأنى مش بشتغل وعندى وقت تفرغ للمطبخ أكتر، والفترة اللى قبل رمضان، كنت كل يوم بجرب أكلة جديدة عشان لما أعملها فى رمضان أكون متأكدة إنها هتطلع حلوة، لأنى مش هينفع أجرب وقت الصيام ويا تصيب ويا تخيب، وبدأت أعمل حلويات ونواشف، وقبل رمضان بأسبوعين نزلت جيبت كل حاجة نقصانى، وعملت جدول للأكل طول الشهر وشيلت منه الأيام اللى هنفطر فيها بره عشان أرحم من نفسى من حيرة سؤال هعمل أكل ايه بكرة".
سيرش على النت ومتابعة برامج الطبخ لأصحاب الخبرات الضعيفة
أما أمنية كمال 25 سنة فكانت لها استعدادات من نوع خاص تتناسب مع خبراتها القليلة فى المطبخ وقالت "انا متجوزة من كام شهر ومكنش عندى أى فكرة عن الطبخ، وفجأة لاقيت رمضان داخل علينا وانا مواقفى مع الأكل مكانتش كلها موفقة، عشان كدة بدأت قبل رمضان إنى أعمل سيرش على النت وأسال أصحابى وماما المفر وض ايه اللى أبدأ أجهزه، وعرفت إنه مكرونات ورز ولحوم وياميش، وازاى أتبل اللحوم والفراخ وأشيلها فى الفريزر عشان ماخدش وقت وانا بشتغل، وكمان عملت متابعة لعدد كبير جداً من الصفحات اللى بتقدم وصفات أكل، وبقيت متابعة أهم برامج الطبخ، وعملت أجندة جمعت فيها أهم الوصفات، ده غير كميات الأكل القليلة اللى بعملها لأننا فردين بس ولو الأكل باظ هيبقى الوضع صعب جداً، والحمد لله لحد دلوقتى مفيش أى خسائر".
ماما وحماتى
وكان لبسمة على 25 سنة رأى آخر فى مسئولية الطبخ فى أول رمضان بعد الزواج وقالت "انا لسة والدة من فترة صغيرة جداً، وفكرة إنى أعمل فطار وسحور كل يوم مع البيبى ده شىء صعب جداً، انا زينت البيت وجيبت الياميش واللحوم الخاصة برمضان، لكن قررت إنى أقضى نص رمضان عند ماماتى والنص الثانى عند حماتى، وممكن يكون فيه فى البيت كام يوم كدة أعمل فيهم نواشف وحاجات خفيفة، لكن أجواء المحاشى والمكرونات هتبقى شبه مستحيلة بالنسبالى حالياً.
موضوعات متعلقة..
- 3 نصائح غذائية لإفطار وسحور صحى فى رمضان